الْجَمَالُ نُصِيبُ الْمُتَأَمِّلَيْنِ - مُدَوَّنَة سويزِنْ - (1 زائر)

[S U I S E N]

آنيووونغ ميناا عساكم بخير وصحة وعافية وم تشكون من شي
عسى بس م طولنا الغيبة عليكم هيهيهي

المهم كنت ابغى اهبد لكم من تدوينتي السابقة عن موضوع وتجربة مثيرة للاهتمام!
ألا وهو..... شاركت ف فعالية أنمي GAMERZ968 <<< يارب صح اسمه عاد
شاركت في قرية الفنانين برفقة 2 من صحبتي كفنان طبعا مدة الفعالية تقريباً 3 أيام
بس ع اليوم الأخير حرفياً م بغينا نشل قشنا ونروح ع كهفنا مرة ثانية
** تراني م عارفىة كيف أوصف شعور وأهبد لكم السالفة من زمان هبدت هنيه**
م علينا الموهم كيف دريت عن السالفة ! شفت لهم بوست بالانستا حق حجز طاولة للفعالية
وحرفيا تحمست مررة بس بما اني م قد شاركت من قبل فكنت مترددة ومدري ايش غير عن تكلفة ايجار الطاولة
لي بالنسبة لي كشخص غير موظف ومنتف فلوس غير مناسب أبداً لي فشلت الفكرة من راسي
بعدين رحت لقروب نادي الانيمشين وسالت لو حد بيشارك بس مع الاسف محد ناسبه الموضوع
فشلت الفكرة من راسي للـ مرة ثانية لان كنت ناوية اشارك الطاولة مع غيري

الموهم كنت اكذب على نفسي اني شلتها من راسي لكن في الواقع كنت حرفيا متحمسة اشارك
ف كان اي ادمي يخطف قدامي اجلس اسولف له واستشيره او اسئله لو يعرف حد يبي يشارك معاي
الموهم لين م اخر شي لقيت نفرتين صديقتي واخت صديقتي الارتست لي كانت لسة تختبر ثانوي اخر سنة
بس الحمدلله اخرو موعد الفعالية علشانهم وشاركت معنا عاد تحمسنا وكلشي وجلسنا اولشي نرتب وننسق الشغل بيننا
طبعا الصغيرة م خليناها تسوي شي يكفيها خيالاتها وهي تذاكر للفاينلز
سو اول شي رتبنا فكرة وثيم لتوزيع منتجاتنا ع الطاولة لي كانت عبارة عن التالي:
( بوست كاردز + فوتو كارزو رسمنا + توت باجز رسمنا + ستكرات + سويت أنا لايف سكتشنج )
وجلست احسب اقل تكلفة للي ابغى اسويه علشان احط ميزانية لكلشي ابغى اسوي وهكذا
الموهم جلست اشتغل وكدينا عللا الشغل حرفيا لان م كان معنا وقت غير اسبوعين نرتب ونجهز كلشي!
المهم تجربتي مع المطبعة كانت سيئة جداً مع ان تعاملهم كويس بس ستل تعلمت درسي ( م ودي استرجع الماضي الأسود )
في اليوم 0 لي هو اليوم لي تروح تجهز طاولتك فيها وهكذا حنا حرفيا م كان عندنا شي نحطه سو....
خلينا بس المنظمات وكانت فاضية واخترعنا طريقة نخلي فيها الاغراض وهكذا لين م تجهز بذيك الليلة
والمفروض كان نستلم الارتست باس بهذاك اليوم ولكن تاخر جداً تقريبا للساعة 8 بالليل كان م واصل
المهم خليت اختي تروح وقتها تستلم المطبوعات وهذا وعاد جلست اوزع الصالح من الطالح ورتبتهم للمعرض
اليوم لي بعده لحد يسالني س كم صحيت لان رايحة متاخر يمكن واصلة 12 وهو من قبل 10 المفترض نروح
م دام ممجهزين الطاولة كامل المهم وصلت ورتبت اغراضي عالطاولة وبما ان صحبتي يدخلون ببطاقة الـ ف.اي.بي
لازم ينتظرون يدخلون مع الزوار بس شنسوي وقتها خلاص عاد السفير الياباني المفروض يمر علينا وهكذا
سو رحت دخلتها ركضض حرفيا ورتبنا طاولتنا وكلشي واكتمل اليوم بسلام عاد م بقوللكم شصار ع الثالثة
المهم كان شوي يوتر وهكذا لان م متجهزين بس اول م خلصنا كان كل شي تمام ولله الحمد
طبعا م بكون كذا الا بفضل الرسامين جيراننا اخخ عاد لي وراي بالطاولة واجد كيوووت هففففف
وقفت معاي لين م وصلوا الربع وكذا حسيت بالمؤاخاه كان يرفرف
احس تعبت يكفي لهذا اليوم يمكن اكمل السالفة لاحقاً
آنيووونغغغ~

 

[S U I S E N]

هيلو مينا عساكم بأحسن حال و م تشكون باس
عندي هالصحبة لي أبغى نصيحة كيف أتعامل معاها T^T
شوفو هي حياتها ومحور اهتمامها الجيمنج 24س من وقتها تقريبا
حتى بالكلية الصراحة م عندي مشكلة مع هالشي بالعكس اتونس واحيانا العب معاها
بس وقت البروجكتات وذا التاخير مليووون وتبغانا نحن نجلس نذكرها باولوياتها
ان فلانة اشتغلي... فلانة بسج لعبب . فلانة فلانة فلانة.......ألخ
و فيوم من الأيام تم توكيل مهمة لي وهي رسم خلفيات لفلم أنيميشن حلو!
هي جات بكل حماسة وطلبت ان تشاركني رسم الخلفيات... بحكم اني اعرف اسلوبها فالشغل
انزعجت شوية بس قلت ف خاطري دامها هي طلبت من نفسها هالشغل بهالحماسة!!
أكيد راح تشتغل ع الأقل بريت أحسن من المعتاد فسويت انا بلان للشغل كامل على اساس
ان نخلصه ف قرابة اسبوعين ونص بما ان عندنا تسليماتنا للمشاريع مالت الكلية
حلووو! شاركتها البلان وكل شي وخلصت السكتشات حرفيا بكل تفاصيلها عليها بس لاينارت حرفياً
حاولت ما اثقلها بالشغل والتلوين مشترك بيننا لكن تخيلو ايه اللي حصل...
4 اسابيع ويزيد كل م اسئلها ها ي فلانة خلصتي.. تقول لا وكل مرة تطلع عذر
عاد قبل 3 اسابيع من اليوم ساللتها مرة لان طفح الكيل الصراحة وقالت لي:
(بفيسها اللي يحس بتانيب الضمير الفيك) بسويه بسويه، بس انتي ذكريني !
جلست انازعها عاد بس انا متعودة انازعها على الشغل يعني خبرتها انتي مو طفلة
ومو معقولة كل اسبوع اجلس اذكرج حتى انا معي شغل + عطيتها مهلة اسبوع ان لو م خلصت
شغلها بروح عند المسؤول عن اخراج الفلم ان اكمل الشغل وحدي!
طبعا توقعت انها تشتغل بعد ذا اللي صار جات نص السبوع لي بعده لان كانت مختفية قبل
طبعا م كلمتها كلمت المسؤولة على طول وخبرتها كذا كذا كذا السالفة والحين انا اخبرج
ك اعلام ان تكوني ضمن الصورة واذا جات م مسوية الشغل م تكون ضمن فريق العمل!
طبعا جات م مسوية الشغل وتراكمت علي المشاريع انا والحين فاينل درزن مشاريع
احس مدري ما في وقت اشتغل ع الفلم بس بنفس الوقت هو مو اولوية بالنسبة لي عن مشاريعي
مالت الكلية + متضايقة فكرة ان ممكن اشتغل مع هالفلانة في المستقبل لان في النهاية
نحن من نفس الدفعة والا يشبكونا بوحدة من المشاريع الجماعية معا
وبس والله اقترحولي اساليب للتعامل مع هالشهخصيات

 

[S U I S E N]

اهلااا مساء الورد عساكم بخير وصحة وعافيةةةة
رجعت للتونيين مرة اخرة بسالفة قديمة بس لازم ارتبها قبل لا اقولها كنت ابغى اشارككم اياها
من يوم المحاضرة لكن كنت ففترة فاينل وامر بماساه مع ذاك المستر العبيط
م علينا من الاشياء السلبية خ اهبدلكم ما بجعبتي
.
قبل كمن اسبوع حضرت محاضرتين حق البروفيسرور المصمم ريان القدير
واحس ساعتين من وقته بينت لي كيف ان دراستي لي جالسة
ادرسها عبارة عن كذبة! حرفيا بين لي كيف ان التصميم مش مجرد خطين ينحطو معبعض بس!
بل شغل يندرس من الالف للياء بداية من الحياة اليومية للعميل لين المنتج النهائي!
طبعا هو استعرضلنا خلال هذيك الساعتين مختصر مشوار حياة واشياء هو تعلمها بنفسه واحس جاني شعور لاول مرة
اني ابغى اتدرب معاه علشان اتعلم واكتسب خبرة صدقية!!
مو علشان راتب وخلاص
لأول مرة ف حياتي استشعر الندم فعدم الاستقلال صراحة!
لو كنت مستقلة بذاتي كان مداني احضر كل ورشاته لي قدمها ف بلدتنا واحس صدق للحين ندمانه
لكني تخطيت خلاص وقررت ابحث عن كل مصادر التعلم القوية لحالي
طبعا ذاك اليوم كنت جالسة بالكلية لين 10 المساء
فجلست اخلص شغلي علشان احضر المحضار الثانية المساء اظني س 7 كانت
المهم فيها تكلم استاذ قدورة عن استراتيجيات المهنة 'الجرافيك ديزاين' وتتطرق لكثير اشياء مهمة
ستفدت حد النخاع منها حرفيا دونت كلشيي ممكن يهمني كان الحضور عندهم كليون سؤال واحس واو!!!
كيف قدرو يسالو كل ذي الاسئلة اثناء بالنسبة لي افضل اسمع للنهاية بعدين اقرر وش السؤال لي ابغى اعرف اجابته ~
المهم في وحدة بغيت ارفسها حرفيا لاول مرة فحياتي
جالسة تقول من وين تشوف انسبو وعطاها الاجابة الوافية
م عجبتها الاجابة وجلست تقول ان مافي اعمال عربية كافية علشان تكسب منها تغذية بصرية في الشي لي هي تباه!!
قالها انتي تريدي تغذية بصرية ولا تريدي تسوي كوبي بيست للارت المهم حاول الرجال يفهمها ان ذا م يعتبر تغذية بصرية بس م فهمت

اتمنى تكتسب تعليم اضافي وتشتغل على تنمية مهاراتها بما انها جديدة في المجال وتتعلم ذاتيا
هو احد الاشياء لي للزوم نتجنبها ف عملية التصميم ان التغذية البصرية للازم تكزن قبل الشغل بوقت كبير
يعني م تشوف انسبو وتشتغل على طول بعده لان غالبا راح تصير عملية كوبي لا ارادية في الشغل
علشان كذا ينصح بوقت استراحي فالوسط تسوي فيه شغل او اخر او اي شي قبل بدء التصميم الفعلي يعني
كان سؤالي الوحيد لي جا فبالي بما اني خاشة فراسي فكل المجالات من الرسم للجرافيك لتخصصي لي هو الانيميشن
هو الارت الستايل الخاص فيني مهم اكثر او اني اكون مرنة! اكثر شي شاغل براسي ان لازم اروي الناس علامتي
الشخصية في العمل الفني او الانيميشن او الجرافيك!

كان الجواب جدا بسيط! انصدمت بس اقتنعت فثانية..

هو اصلا موجود في روح العمل لكن غير ملاحظ!
مع الخبرة والاستمرارية وتكثيف التعلم راح تقدري تميزيه وتبرزيه بشكل اكبر

 

[S U I S E N]

جالسة اعيش فحيرة اي باكز من سيمز لازم احذف علشان احمل الفوتوشوب

قررت أنقل كل الفايلز للهاردسك لان م يهون علي الكولكشن لي مجمعته

 

[S U I S E N]

"ستمكثون تحت الأرض زمنًا لا يعلم مداه إلا الله
لن تتمكنوا فيه من أي عمل تنتفعون به ولو تسبيحة
فخُذوا من حياتكم لموتكم - فلا تزالون في مهلة.
فهنيئاً لخفِي العمل ....
هناك أناس يعيشون معنا في الأرض وأملاكهم في السماء عظيمة
قصورهم تُبنى - وبساتينهم تُزرع - فأكثروا من الخبايا تغنموا"

اللهُم إنا نسألك أن تحفظهم بحفظك وترحمهم برحمتك وتتقبل شُهدائهم وترحم كَبيرهم وصغيرهم يارب العالمين