انمي تون AniMe TOoN

وين

عندك تعليق عليه ممكن يخليه افضل ؟

فكرة التصميم كَكٌل ماخدة ستايل ال simplicity
و بالنسبة لأنو هو بالاساس طقم لتطبيق ف كان احلى انو يكون بهيك ستايل
و قصدي بال simplicity انك مانك مخلية التصميم معقد و فيو كتير تفاصيل
و سهل انو الواحد يقرا العنوان و ياخد الفكرة المٌضمنة من الهيدر .

ملاحظاتي رح تكون متعمقة بعناصر التصميم و طبعاَ بحكيلك من هلأ
التصميم كتير حلو بس مع تعديلات بسيطة ( بالمستقبل ) رح تطلعي
بتصميم احلى من هاد بكتير .

-

1- استخدامك لشكل الخط حلو بس لو خليتي العنوان الرئيسي او الفكرة المحورية
بلون بارز و العنوان الفرعي الكلام الي بكون مكمل للكلمة الاولى او الجملة
الاولى يكون بلون اقل تركيز و بروز . كان رح يكون احلى بالتأكيد
( استخدمي نظرية الالوان ) . - نفس ما سويت بالتلوين قبل شوي -

2- و حركة الظل من اليمين لو مخليتيها بدون ظل احلا , هيك ظل الو
استخدامات معينة ما بتزبط بكل مكان . لو مخلية لون البنفسجي
واضح مع هيك ستايل تصميم رح يكون أحلى بالتأكيد .

3- خط الحقوق حلو بس خلي الحروف كابيتل مشان يكون أبرز
و اعتقد انو هاد مو خط بيكسل مبين معي خط عادي و مصغرة حجمو
و حركة حلوة , بس ملاحظتي الوحيدة انك تخلي الحروف كابيتل
مشان يكون في وضوح بالكتابة ( هي ملاحظة عامة ) ان كان بهل التصميم
او بغيرو .

# و الأفضل تعتمدي على خط البيكسل لأنو انعم مع هيك تصميم
لأنو هالتصميم معتمد ع البساطة و عنصر السيادة و التركيز و اي
حركة بسيطة ممكن انها تبرز ( لانو تصميم مافيه تعقيدات )
و انتي ما بدك تعملي هيك مشان ما تلغي عنصر التركيز على
العنوان و مشان ما يخرب ثيم التصميم ككل الي هو البساطة .

و مشان كمان ما يشتت المشاهد ( بتقدري بحركات بسيطة الي ذكرتها
انك تتحكمي وين المشاهد يشوف اول و انتِ هيك بتخليه يتشتت )

ف خطوط البيكسل معروف انها ابسط من الخطوط الحرة , و انتِ
بدك تبعدي عن التعقيد و كترة التفاصيل .

4- الخطوط الحرة حلوة ك حقوق بس بتعتمد ع نوع مدرسة التصميم و ملاحظة اضافية
الحقوق لأنها بتكون بحجم صغير ف الأفضل نحطها على خيار SHARP او CRISP
من اعدادات الخط لما يكون الخط حٌر مشان يبرز اكتر و اذا بيكسل اكيد على NONE .

# شوفي الحقوق بالهيدر كأنو معمول عليها Blur و بدون ما نحط عليها ستايل
لأن لازم تطلعي خط الحقوق ابسط ما يكون ( هو اساساَ انوجد مشان يحفظ التصميم
لصاحب المصمم مو ضروري يكون كتير بارز لدرجة انك تحطي ستايل )

5- و اهم شي انو الحقوق بتنحط بالعادة بلون ذو تباين ضعيف جدا من اي لون
حابة تحطي خط البيكسل عليه - متل ما سويت قبل شوي بالتلوين -
بحيث انو هو مو بارز كتير و بنفس الوقت بيقدر المشاهد يقرأو لما يركز عليه
( مثلاَ لو حطيتي الخط على لون ابيض بكون التباين رمادي فاتح قريب للأبيض
هاد اسمو تباين ضعيف ) بحيث انها مع التركيز بالتصميم بتبين للمشاهد و بدون
ما تخرب التصميم بشكل واضح ( بتكون كأنها مندمجة معو ) و لأن اكيد ما بدك
المشاهد يركز كتير بالحقوق .

# أو يكون تباين قوي بس مو مع هالتصميم اكيد ممكن ينحط بتباين قوي لما يكون
مثلاَ تصميم بليند و كمان مع تصاميم البليند بيزبط معها التباين الضعيف .

6- بالنسبة لأشكال الاقتباسات الكبيرة الي فوق , لو مصغرتيها كمان شوي مشان تحقق
عنصر المساحة بالتصميم بتكون أجمل بكتير , و شو قصدي بالمساحة ؟

المساحة مابين الصورة ال 3 و الخط قريبين جداَ و لو طبقتي عنصر المساحة مع هيك
نوع تصميم رح تطلعي بنتيجة احترافية !

لأن ستايل البساطة او ال Simplicity كتير بيحتاج هالعناصر لحتى يتحقق بالشكل
الصح ( المساحة و الابتعاد عن التعقيد و التفاصيل الإضافية )

ان شاء الله تفيدك هالملاحظات

شكرا كثير هالملاحظات كثير رح تفيدني سيلينو
- سكرين شوت ! -
شكرًا الك كثثثيييررر تعبتك كثير بالملاحظات و كتبتي من قلبك الله يسعدك

و حابة احكيلك كمان
رح تصادفك كتير مرات رح تتجاهلي عناصر التصميم
خاصةَ مثلاً لما تكوني مستعجلة و بدك تخلصي التصميم
هالمحلاظات كتبتها اذا بدك تتعمقي اكتر بالتصميم

و هاد ما بيعني انو التصميم بكون مو حلو , بس مع الخبرة
و الايام رح تصيري تحققيها لا ارادياَ حسب حسك الابداعي
لأنو بيتطور مع التدريب و نظرتك للتصميم بتختلف .

انا مثلاَ كتير مرات بتجاهل هالعناصر لما بدي سوي تصميم
سريع , هيك عناصر بدها شغل و وقت ومخمخة لحتى نطلع
بنتيجة احترافية خاصةَ اذا نحن ما منتعامل معها يومياَ ( نفس
مصممين الجرافيك كعمل )

ولو ^^ و ان شاء الله كمان انا لما اعمل تصميم رح اخد ملاحظاتك

بتمنى اوصل لهالمرحلة

امشي على هالمقولة
Enjoy the Journey

استمتعي بالرحلة , و لا تفكري بالتطور كتير
لأنو انتي مثلاَ سويتي هالهيدر بتكوني تطورتي
و انتي مانك حاسة بكون تطور بطيء

التطور الملحوظ ببين بعد شهر من التصميم
يومياَ او التصميم اغلب ايام الأسبوع

استمتعي و كوني جريئة تجربي شغلات جديدة
بالتصميم هيك بتتعلمي اسرع