انمي تون AniMe TOoN

الإعلام الآلي هو تخصص مايقراوش فيه الوورد و الاكسال كما يخال الجميع يقراو فيه البرمجة من أول محاضرة.. و فيه التخصصات الآتية (برمجة مواقع الويب، برمجة الألعاب، برمجة التطبيقات، ذكاء اصطناعي، أمن سبيراني، اتصالات أو شبكات.. و المزيد من التخصصات الأخرى الي تتقاطع مع بزاف مجالات حتى مجال التصميم مثلًا كاين تخصص جديد للإعلام الآلي ليصونص بروفيسونال يقراو فيه الديزاين و اوف كورس البرمجة و تحويل التصاميم لمواقع و غيرها) بصح بمجملها كلها تعتمد على البرمجة يعني البرمجة ماشي تخصص فالإعلام الآلي أو علم الحاسوب.. البرمجة هي نفسها الإعلام الآلي لأنهم في هذا التخصص مايقروكش كيفاش تتعاملي معا الـ PC هادي شطارة شخصية هوما يقروك مستحقات البرمجة و البرمجة

وهههه حبيييت التخصص رهيب
انت تدرين اني حابة ندخل الesi واللي هو مدرسة عليا تاع اعلام TvT
مكاش علابالي بلي فيه التفرعات هاذو كاامل !
I'm in loooooveee I'm in lovvvveee

للاسف ماوصلتش معدل شباب وصلت في الموزون ل 15 أهلني ندخل هندسة معمارية وهاني معاوداتو بإذن الله

الحمدالله الخير في ماختاره الله

نقول كلمة لجانيت فرست

معدلك ماشاء الله ماهوش بالقليل راهو جيد جدًا و كان مخولك ديري informatique ingénieur الي هو التخصص الماشبه للـ ESI و يدخلوه بـ 15 أو 14 و مام و تلعبت كونتي قادرة تدخلي informatique LMD الي تختلف من ولاية لأخرى كاين الي حتى يدخلوها بـ 11 12 و الي هي نفس التخصص مي الفرق أنها نظام (ليسونس Bac+3، ماسترBac+5، دكتوراه) ماشي نظام كلاسيك الي تتخرج بشهادة مهندس مباشرة دون مناقشات (Bac+5) كيما ليزي و انجنيور.. و على فكرة النظام الكلاسيك غير معترف بشهادته دوليًا عكس LMD الي هو النظام الدولي كتنويه برك

و توفر كل التخصصات ماشي غير أنفوىماتيك فرصة للمتفوقين فالدفعات فالجامعات يطلعو يقراو فالمدرسة العليا التابعة للتخصص، يعني كنتي قادرة تروحي للـ ESI بلا ماضيعي عام من حياتك

و أساسًا ماننصحكش بيها لأنو الشهادة تاعها طيبي بيها تيزانة.. useless و ماتخدمك فحتى بلاص، لأنو فمجال لانفورماتيك يخدمو بالكفاءة ماشي الشهادة، منصات Google و Amazon خدمو ناس بدون شهادات ناس أمية من بين ملايين الراغبين المتحصلين على دكتوراه! بسك البرمجة عبارة عن دراسة ذاتية و الجامعات تقدملك أساسيات بسيطة ما تطوركش، يعني تقرايها وحدك سو لازمك تخصص يكون عندك فيه بزاف الوقت و حتمًا ESI مافيهاش كامل الوقت مالغري التكوين فيها أفضل مي ماتسمحلكش بالتطوير الذاتي و تخليك عبارة عن مجرد كوبي كولي كي نتي كي آلاف الخريجين قبلك و بعدك ماعندك حتى تميز عليهم باش تخدمك الناس.. راكي مأمنة بلي كاين ليبوست فالدزاير و تقدري تخدمي بسك برك عندك شهادة esi فوقت الي يشد كورسي مايطلقوش حتى يولي فالـ 60 سنة؟ كون مايحسوكش عرض لا يفوت ماعندهم مايديرو بيك

كتبتلك هاد الجورنان لأنو أنا كيما نتي ماديتش معدل الباك الي حبيتو و بكيت كي البهلولة و خممت نعاود الباك بسك كنت مزلني ضمن تفكير المجتمع المتخلف و المحتقر للتخصصات حسب معدلاتها، أنا ماكنتش نحب انفو فوقتنا كانت تبهديلة تقرا هاد التخصص تحشم بيه عكس وقتكم.. صدقيني جامي واحد من ESI سمعنا بيه دار إنجاز
تعرفي بلقاسم حبة واش قرا في رايك ؟!ماقراش ميدسين ماقراش فالمدرسة العليا للاكترونيك الي كانت الوحيدة فالجزائر الي تقري بالانجليزية و ماقراش فالمدرسة العليا للاساتذة.. قرا ST أكثر تخصص محتقر فالجزائر و وين راه دك حائز على مئات براءات الاختراع

كي تطلعي الجامعة حتفهمي أنو اتنصب عليك بحكاية بوست مضمون، سوق الشغل شطارة و CV ماشي شهادة فارغة أي واحد فوقتنا مهما كان غبي عندو شهادة Chatgp و شوية حفاظة

أخيرًا بالاكي تهملي عامك هذا فلافاك ماتظلميش تخصص الهندسة المعمارية قادر يشغفك التخصص و تلقاي روحك فطريًا ممتازة فيه و قادرة تروحي بيه لبعيد و تانولي تغيير التخصص هادي وحدة أما الدوزيام و اللخرة قراية الباك ماكاين والو ماتوالفيهاش لأنها حفاظة و تتشوكاي بصعوبة الماقاييس الجامعية اومبعد

دك تقولي علاش راي تزيدلي هادي و حكات كامل هاد الشي.. توسامبلومو بسك كي كنت قدك تمنيت واحد يقلي هاد الكلام

اتفق ، المُجتمع مقرف وكرهني في القراية ونظام التدريس كامل نهار الباك
آماني!! وين راحت 17/18 اللي كنتي تجيبيهم !! صحاباتك كامل دارو ميدسين، شوفيهم راهم طبيبات ! شكون كان يتخيل
متتخيليش كمية الاكتئاب اللي جاتني
مزالت عندي فرصة نغير للاعلام ولكن الجامعة هذيك مليئة بالزواحف وقادر يخرج عليك ثعبان من حيث لاتدرين
الارزاق بيد الله أيضا ، قادر تكون طبيب غير كفء وتقعد في بلاصتك وقادر تقرا حاجة سامببلل و تتفوق
مثلا عندي صحبتي دارت علوم فلاحية ولات مضحكة !
ولاو يقولولها الفلاحة وهوما مش واعيين أصلااا لماهية هذا التخصص ولا حتى التفرعات اللي راهم يتفرعوا بيه كمهندس دولة في التغذية
أكره مجتمعنا ونظراته السطحية