عايشين توتر رهيب .. و حالة نفسية صعبة .. و خوف كبير من شدة القصف و النسف حاليا نحنا ع الحد الفاصل و اليهود تقرب ، و فقدنا الأمل بالعرب
رغم الخوف و التعب للنفسي كلنا عايشين لآخر لحظة انو ممكن تصير معجزة من ربنا و يوقف الجنون اللي قاعد يصير
و اللي العالم كله صامت عنه ..
انا حاليا عايشة و انا عندي اقتناع كامل انه العالم هذا ظالم جدا جدا جدا ظالم
العدل عند رب العالمين ، هالشي واثقين منه ثقة عمياء الصابرين سيوفون آجورهم
أتمنى بكل صدق لو الناس تصحى لو العالم يصحى لو الانسانية تصحى انا متأكدة هالشي ما كان صار و هالظلم ما كان وقع
لكن أمر الله نافذ .. و يا حسرة انه النوم هذا ربنا ما صحاكم منه و يا خسارة على العباد
ان متنا متنا بكرامة و ان عشنا حتبقى هالسنتين حسرة لعمرنا كله
يديعوت أحرونوت: إعلان الجيش الإسرائيلي انتهاء الهدنة التكتيكية في مدينة غزة خطوة تمهيدية لبدء عملية "مركبات جدعون2" .. الأسبوع المقبل سيطلب من جميع سكان المدينة ببدء الإخلاء إلى جنوب القطاع قبل بدء عملية السيطرة على المدينة
اقسم بالله منا عارفة اضحك و لا اعيط
هو احنا كنا بهدن انسانية ؟ و الله ما كنت اعرف
رصاص الكواد كابتر .. قبل فترة كنا ناويين نجلس بحوش البيت و قبل ما نطلع بدقايق ضربت رصاصة بالحوش الله اعلم من اي منطقة جت لانو نحنا بيتنا مخبى بين عمارات طويلة فصعب يجي هيك شي عنا لكن سبحان الله انضربت عنا
اول امبارح كان اخي الصغير طالع ع باب البيت انضربت الرصاصة بجانبة بعيدة عنه كم سنتمتر بس
امبارح ابن عمي عم يشتري من بسطة فلافل رصاصة كواد ضربت بنت صغيرة واقفة جمبه
قبل شهر رصاصة كواد ضربت امرأة كانت رايحة تجيب لاولادها تكية من المدرسة و المرأة وقعت جمب بابا و اخواني
اليوم ابن جيرانا استشهد كان رايح ع المساعدات مع شباب الحارة و معروف مكان المساعدات يعني رايحين للموت كانوا ماشيين و ماسكين يد بعض عشان ما يضيعوا عن بعض و فجأة الرصاصة اخترقت صدره و العجيب بلموضوع االي ماسكين يده عم يقولوا له قوم مو وقت المزح لازم نمشي قبل ما نضيع عن بعض و هو عم يطلع بالروح .
احنا حرفيا كأننا عم ننصاد كل يوم ما نعرف جاي دور مين او مين اللي رح يخطفوا الموت من بينا
الأعصاب متوترة اخي طفل صغير بقى مرعوب بشكل غير طبيعي بعد ما شاف الرصاصة تضرب جنبه
غير الرصاص اللي بشكل يومي يضرب بللحيطان هون و هون و التصفييرة
عمرك سمعت تصفيرة الرصاص ؟
المشكلة اي ينحرق القلب على اي حد يموت بس عمر نقول استشهد و ارتاح لكن الصعوبة فعليا بحياة الشخص اللي يفقد حد
شعور الفقد جدا جدا صعب و مخيف و مرعب
انك تعيش و كأنه حد سرق قلبك و تركك من الداخل جوفك فاضي بشكل مؤلم هالشي مرعب مرعب انك تعيشه و مرعب انك تتخيله و مرعب انك تعيش و انت خايف تمر فيه
لما رجعنا من الجنوب بعد النزوح لبيتنا كان في دمار كتير بس قلنا مو مشكلة بنصلح اللي نقدر نصلحه و كنا فرحانين انه بيتنا مو كله رايح
اي في اضرار كبيرة لكن في سقف و في حيطة أفضل من الخيمة
كنت كتير بدي ارجع بيتنا و اشوف رسوماتي كنت متعلقة فيهم
لما رجعت لقيت رسوماتي ذايبين حرفيا من المطر و الشمس و الدمار بس قلت مو مشكلة برسم غيرهم
اللي انصدمت منه انه في رسمة هذه رسمتها بحزن للنابلسي لما استشهد - اللي حابب يعرف مين النابلسي يبحث عنه بالنت -
رسمته و انا متأثرة كتير بوصيته لما استشهد و سبحان الله من بين كل رسماتي اللي ذابو كانت هالرسمة حاضرة رغم انه كل اللي تحتها كان مو مبين و مطبق ع بعضه
وصيته كانت للشباب انهم ما يتركوا البارودة و يبقوا يقاتلوا اليهود
عنا الشباب معروفين لاهل الارض أو ما معروفين انا عندي يقين كامل انهم عند ربنا و بالسماء معروفين
يقاتلوا بكل ما فيهم و دافعين شبابهم و و حياتهم و مالهم في سبيل الله و سبيل جنته
ما يهمهم الارض و الدنيا و لا اللي فيها يهمهم سباقهم للعلا ربنا يعلي مقامهم
..
الرسمة هذه كنت راسمتها زمان و راحت مع الردم و رجعت رسمتها من جديد على امل اني ارجع اعيد كل رسوماتي لكن الشغف رجع اختفى اتمنى يرتاح بالنا و يرجع شغف الرسم من جديد
افتحوا الاخبار حاليا كلها او أغلبها تتحدث عن حي الشيخ رضوان " اللي هو حينا طبعا "
من شرق شارع الجلاء و نهاية شارع الجلاء لاخر نقطة بشمال غزة مناطق حمراء و مناطق قتال خطيرة
نحنا غرب خط الجلاء من عيادة الشيخ رضوان الشارع الاول و التاني و الثالث لعند النصر
كلنا نتعرض لقصف عنيف و اطلاق نار من الكواد و بالليل غازات و قنابل حارقة و صواريخ و قنابل
و على اعتبار انه منطقتنا منطقة خضراء و ليست حمراء لكن متلها متل باقي المناطق بغزة
يكذب الاحتلال و يقول انها مناطق خضراء لكن كل القطاع بشكل عام يتعرض للقصف
نحنا حاليا نتعرض للقصف و الحرق بهدف التهجير الاجباري و القسري من بيوتنا و من الخيم للاسر اللي فقدت بيوتها
بس طبعا نحنا باقيين و ان شاء الله مش حنطلع و متوكلين على الله و ربنا الحافظ
هالفيديو ذكرني بيوم طلعتنا من بيتنا قبل كم يوم
قضينا ليلة سيئة بحينا " حي الشيخ رضوان " من الفجر استلمونا اليهود قنابل من الكواد و احزمة نارية على بيوت الناس و هم نايمين قبل اذان الفجر بدقايق
بهاي الليلة حرفيا حمدت ربنا مليون مرة انه قبلها بيوم نقلنا اغراضنا على الوسطى دير البلح و ماما و اخواني الاثنين أصغر اثنين كانوا مع ماما عند بيت خالي بعد توصيلهم للاغراض
ماما كتير بتخاف طبعا ما بتخاف ع نفسها بتخاف علينا و بتعمل لنا قلق و توتر بلبيت من الخوف و مجد اخي الصغير كتير كتير بيخاف الطفل بلفيديو ذكرتي كتير بمجد بيوم من ايام الحرب مرينا بهيك موقف و بقى يترجا بماما و اخي يطلعوه يهرب وين ما كان المهم يهرب من هالرعب اللي يعيشه .
بهديك الليلة اذن الفجر و الناس بدت تطلع من بيوتها لما بدا نور الفجر يطلع و كانت تمر بشارعنا و تبكي من شدة الخوف اللي مرت فيه و فعليا الليل يكون مرعب
الصبح بدت الناس تجيب سيارات نقل تنقل اغراضها و اليهود كان لهم اكثر من ثلاث اسابيع يحذروا المناطق اللي حولنا تخلي و شارعنا قبلها بيوم جت الكواد و صرخت علينا نخلي و الكل رفض
لهيك شافوا الناس تنقل بأغراضها ثاني يوم صاروا يرموا قنابل على سيارات النقل و فعليا تصاوبت عائلة و هربوا يحتموا ببيتنا الام و وحدة من بناتها ما تصاوبوا .. لكن زوجها و باقي اولادها كلهم تصابوا و للاسف صاحب سيارة النقل كان اخطر اصابة بين الكل و كان يوم سيء جدا السيارة تمشي و يرجعوا يقصفوها
انا من هول هاليوم لحد الان مو فاهمة شو صار
كيف القنابل و القذائف تنزل بعيد عني كم خطوة بس
تخيل نفسك بينك و بين الموت كم خطوة .. ما اعرف احساسي وقتها ما كنت خايفة كنت مسلمة روحي لربنا مع اني انا كثير اخاف بس يومها ما كنت خايفة لكن بكينا كتير مع العيلة اللي تصاوبت
و الام تهدي بنتها و تقولها كلهم تصاوبوا لكن ما حد مات و تحمد ربنا و تركوا اغراضهم اللي ما قدروا ينقلوها بعد ما قصفوا السيارات اللي تنقل اكثر من مرة
و كان اكثر شي مريحني انو ماما و اخي مجد مش بلبيت و انهم بأمان بعيد عن الخطر اللي نحنا فيه
نحنا طلعنا من بيوتنا لاننا تحت الموت طلعنا و نحنا عارفين انو اليهود لو قصفونا ما حد رح يسأل عنا و لا اي كوادر حتقدر تدخل المنطقة و تطلع جثثنا لانو الدبابات محاصرة كل الشوارع و القناص بكل مكان
الناس عم تخرج من بيوتها و من خيمها و تنزح و الناس و الله كلهم تعبانين كلهم مرهقين كلهم ما عاد عندهم طاقة احتمال
كمية القهر بقلب كل انسان ربنا وحده يعلم فيها .
و الله العظيم اننا خير من صبر على هذا البلاء و الحمد لله على كل حال .
.gif "At (138) ه1")
