مدونة مميزة A Ca$e for a Gentle Thief and a Treasured Heart - 7sN (2 زائر)

[7sN]

رد: we fall to learn how to pick ourselves up | 7sN

لعبة منذ الطفولة

تبع الفعالية

بسم الله الرحمن الرحيم

اوكي واجهت صعوبة بالتذكر لأن كل الي اتذكره مرتبط بالبلايستيشن
اما الشغلات الباقية كانت العاب عادية ما كان فيها مواقف معينة

لكن تذكرت و قلت بتكلم عن النادي

و انا صغير كنا نروح نادي انا و اخوي على اساس انه اهو بيشترك بـ كرة اليد
و انا كرة القدم , كنت احب هالرياضة بشكل كبير بس مشكلتي و انا صغير اني
ما اتقبل النقد ولا اتقبل اي شي ضدي , فـ من اول يوم صرت العب دفاع و كان
لعبي تمام بس لما شفتهم حطوا اللوم علي انا طلعت و رحت اشتركت بكرة اليد
مع اخوي

رحنا كرة يد اشتركنا و كان لعبي تمام و طولت فيه , بس المدرب اكتشفني اكثر
شي لما حطني حارس , كنت ابدااااع

صعب صعب ان كرة تدخل علي كنت جاهز و مركز و سريع و الحالة كانت تمام
التمام , بس ثاني يوم سحبت على النادي كله عشان كان مالي خلق

بعد فترة طويلة فتحوا نادي المبارزة , هذا نادي للسيوف و الوالد كان فيه من صغره
بس اغلقوه و الحين رجع انفتح فـ اخذنا انا و اخوي و اشتركنا , اول الأيام تعلمنا
الأساسيات نفس الوقوف و التقدم و التراجع كان شي حلو والله و طولت بالنادي , لين
اكتشفوني , شوفوا شلون اكتشفوني :

خلوا كللل النادي يوقف وقفة استعداد و اعطونا اوامر نسويها من اساسيات اللعبة
نفسها , فـ و احنا نسوي الحركات يطلع مدير اللعبة و يقول لأصحابي انهم خلاص
يقعدون , لين آخر شي صرنا بس اثنين واقفين انا و واحد ثاني بسس جدام الكل
و الي يسوي حركات و يضبطها اهو الي يفوز

فـ اثنينا بذلنا جهدنا بالحركات و الي يفوز راح يطلع اهو احسن واحد بالنادي و الجائزة
تلفون , انا ما كان عندي تلفون وقتها

, فـ بعد محاولات انا الي فزت

,
صفقوا لي كلهم و انا مستحي و رحت خذيت التلفون , و من ثاني يوم سحبت
على النادي كله

خلاص خذيت تلفون شنو ابي بعد اكثر

هذا يوضح ان كانت عندي فرص بوايد اشياء اقدر اتميز فيها بس ما استغليتها
و الحين محتاج اني استغل كل الي اقدر عليه عشان اعوض الي راح

المعنى من القصة : استغل الفرص -_-

تعديل : لما صفقوا لي الناس كان ابوي واقف جدامي يصفق لي بعد
ما كنت عارف شسوي من الخجل و رحت سلمت عليهم كلهم

​

 

[7sN]

رد: we fall to learn how to pick ourselves up | 7sN

مشكلتي مع المنتدى

احب المنتدى , جميل و يفتح النفس و الأعضاء محبوبين و يفتحون النفس بعد
بس بالنسبة لي مشكلته الوحيدة هي الردود و شلون ممكن تجمع ردود على
موضوعك

احس ان صار في تعود ان بعد ما احط موضوع لازم انشره عشان
احصل ردود , و انا ما ألوم الشخص الي ينشر انا ألوم الشخص
الي يرد عشان فلان نشر , احسن الردود الي تجي بدون ما تتوقع

الي مثلا ما اعطيت فلان الرابط بس فلان هذا رد علي , فرحة ما تنوصف والله
بس هنا احس الكل تعود على النشر و هذا شي ممكن تأثيره يكون سلبي
بشكل كبيير

الي يقرأ كلامي ممكن يقول اني بحاول اثبت نفسي بالغصب و هذا طبعا غلط ,
انا بس اتمنى ان الشخص المبدع يلاقي شي يقيمه من نفسه بدون ما يضطر
انه يروح ينشر عشان يحصّل التقييمات الي يستحقها

و ما اعتقد ان في شخص يبي يحط موضوع و يحط بباله ان في احتمالية
محد يرد عليه , صح؟

و الله يوفق الجميع

تم تعديل هالتدوينة عشان الكلام يكون عام مو مخصص لموضوع واحد

​

 

[7sN]

رد: we fall to learn how to pick ourselves up | 7sN

النقد

انا كـ انسان احب النقد و التأليف بس لو تشوفوني شنو اتابع بتقولون شلون عرفت
تنتقد و انت ما تتابع شي؟

الشغلات الي شفتها و تابعتها اهي الشغلات الي تستاهل اتابعها, هذي
شغلة ايجابية و سلبية بنفس الوقت

ايجابية لأن بجذي انا راح اعرف شنو مصدر نجاح القصص , و سلبية لأني ممكن اطيح
بفشل لو كتبت قصة عشان ما شفت الشغلات الي ما تستاهل اشوفها

كل ما تفكر بالعالم تعرف ان كل شي له معنى و كل شي له سبب , فـ حتى الافلام
الفاشلة لها سبب بوجودها و هي اننا نتعلم ما نكرر هالفشل

فـ مجرد انك تعرف النمط الي كل الأفلام ماشيين عليه بتعرف تنتقد و تعرف :

ليش Whiplash ناجح
ليش The room فاشل
ليش The dark knight اسطوري

لأن مع متابعتك و ملاحظاتك بتوصل لكل الإجابات هذي لا شعورياً و لما تحلل شعورك
تكتشف اشياء انت ما اكتشفتها رغم انك مستوعبها

و طبعا هالشعور يخليك تحب القصة اكثر و اكثر

فـ النصايح للانتقاد السليم :

1- تابع افلام
2- حلل افلام
3- تابع نقّاد واثق فيهم
4- تعلم منهم

طبعا من الحين اقول مافي ناقد كلامه صحيح 100% لأن النقد كلله يرجع لشي واحد
و هو الذوق .. انا كـ انسان ما احب القصص الرومانسية ما تقدر تقولي شوف الفيلم
الفلاني الرومانسي و تطلب رايي عنه مثلا

فـ اتمنى ان كلامي وضح بشكل عام ولو احد ما فهم يقولي ^^

​

 

[7sN]

رد: we fall to learn how to pick ourselves up | 7sN

سحر القصص

احنا كـ بشر محد فينا كامل , نعيش حياتنا و عندنا مشاكل نفسية او شخصية او حتى
عامة و هذا الروتين الي نعيشه كل يوم

فـ احنا نحتاج شي عشان نستمتع و يطلعنا من الروتين هذا و يخلينا نرتاح منه شوي

القصص و الأفلام يوفرون لنا هالشي هذا .. بالقصص احنا نشوف ناس ما نعرفهم
بس نتعرف عليهم خلال القصة , نعرف اطباعهم و الي يحبونه و الي يكرهونه و
كل شي خاص فيهم , باختصار نعيش معاهم

فـ بهالطريقة احنا عشنا حياة كاملة او حالة تطور طولت لساعة عالأقل , لأن احنا
نفتقد لهالتطور و نحتاجه , عشان جذي نشوف في افلام نفس روكي نظامها تساعد
تساعد الشخص و ممكن تكون مصدر حماس الشخص , في احد يتذكر موسيقته؟

[YOUTUBE]I33u_EHLI3w[/YOUTUBE]

لو شفتوا الفيلم اتحححددى اي احد فيكم ما يتحمس لما يسمع الموسيقا

بس هذا الحماس ليش؟ هذا مو عشان الموسيقا حلوة , هذا عشان احنا عشنا حالة
شخصية روكي خلال الفيلم و شفناه و شفنا حياته شلون كانت و شلون صارت
و لقطة التدريب كانت نقطة مهمة بحياته و بالفيلم , مع دمج الي قلته مع موسيقا
حماسية تصير عندكم لقطة اسطورية صعب انها تتكرر بالسينما

هاللقطات هذي و الموسيقات مو بس هدفها انها تكون لقطة من الفيلم تبين حالة
شخصية و بس , هذي لقطة تأثر فينا كـ مشاهدين و ممكن انها تغير الروتين
اليومي بإنها تحمسنا نسوي شي بحياتنا و ننجز , هذا سحر القصص

القصص ممكن تأثر فينا و تخلينا نعتبر شخصيات معينة انهم يكونون مصدر
الهام لنا فـ نتطور كـ اشخاص .. شي مبهر​

 

[7sN]

رد: we fall to learn how to pick ourselves up | 7sN

ألعاب الفيديو في الطفولة

انا اعشق الألعاب , بس حالتي مختلفة من ناحية اني اتابع اكثر من ما العب

مادري شنو السبب بس قبل كنت احب اشوف ناس يلعبون العاب و انا
اقعد اشوفهم مثلا الوالد كان كل يوووم بالليل يلعب لعبة كرة قدم < ناسي
عنوان اللعبة .. و كنت كله اقعد معاه اشوفه يلعب لين يقولون لي روح نام

ما اعرف شلون احدد من وين بدأت طفولتي بلعب البلايستيشن بس اول لعبة
لعبتها كانت من بلايستيشن 1 و اهي كرة القدم , كنت كله احطه اسسسسهل
شي عشان ما اخسر

< يغش وايد

بس بعده البلايستيشن 2 نزل و اتذكر الوالد اشتراه و اشترى معاه العاب وااايد

و من بينهم لعبة الطفولة و الي لها مكان خاص بقلبي : Tekken 4

كم كنت اعشقها و كنا نعشقها انا و اخواني و ولد خالي كلللل مرة نحطها
نلعبها و شخصية Kazuya Mishima كنا نسميه سمكه

عشان دايماً بالمقدمة لما نختاره يقول ساماكاه و ليلحين ما اعرف شنو المعنى

طبعا طبعا كنت مهتم بالقصص الي فيه من صغري يعني عادي اخلي اي احد
يلعب بس عشان نوصل للنهاية و اشوف شنو نهاية كل شخصية فيهم , و لما
عرفت النت دخلت ادور على قصصهم و اجزائهم و شفت كل شي عنهم

بعدين لما نزل Tekken 5 طبعا اشتريته بحماس قوي , لعبته خلصته كله و بعدين
اكتشفت ان كل الأجزاء موجودة بهالجزء هذا .. يعني اقدر العب من الجزء الأول
للثالث من خلال هاللعبة و انا استغليت الفرصة ما خليت واحد ما لعبته لين صرت
خبير بالقصص .. و الحين نسيت كل شي و بينزل السابع

طبعا بالنسبة للألعاب الثانية كنت احب العاب كرة القدم بيس و فيفا و طبعا ليلحين
العب فيفا و دايما اسوي Career اني اكون مدرب جديد و ادرب فريق معين لازم
آخذ معاه بطولات .. ما العب اون لاين طبعا عشان اعتبره شي ماله انجاز و دايما
احاول احط قصص بالالعاب الي العبها فـ حالة الـ Career تلوق انها تكون قصة

كنت احب GTA كانت من اول الالعاب الي لعبتها بحياتي , اتذكر مرة كنا متجمعين
نلعبها و فجأة طلعت اغنية كلماتها "يلا صبوها القهوة و زيدوها هيل"

بس للأسسسف ولد خالي غيرها بالغلط و احنا قعدنا نسبه .. حاول يرجع للقناة
الي حاطينها بس ما لقاها

بالنهاية طبعا تتذكرون لما تشغلون العاب على البلايستيشن و ما تشتغل شنو الحل؟

الحل كان اننا ندعي انه يشتغل و ان الله يغفرلنا على ذنوبنا

مرة كنا حاطين لعبة مااااا تشتغل ابد و كنا متحمسين لها , كانت لعبة سيارات نسيت
اسمها بس بلايستيشن 2 .. دعينا وايد و ما استجاب دعائنا فـ انا اقترحت شغلة

قلت لـ ولد خالي يطلع برا و يمكن تشتغل .. و فعلا طلع برا و اشتغلت

بعدين لما رجع اول ما دخل اللعبة قامت تعلق .. قلتله يطلع برا و لما طلع رجعت
تشتغل

هذا موقف مستحيييل انساه

و بس هذا بالنسبة للفعالية من ناحية الذكريات

من ناحية الألعاب فـ انا وايد احب العاب باتمان الـ 4 اليديدة شفت 3 اجزاء بس
قدرت اشتري الرابعة و ناوي اشتري الباقيين بعد
​

 

[7sN]

رد: we fall to learn how to pick ourselves up | 7sN

الأفلام

في عدة طرق و اساليب لعمل الفيلم , و المخرج يقدر انه يسوي اي فيلم
بأي اسلوب يعرفه و يبيه و هذا من حقه اهو و المؤلف

لكن بالنهاية احنا نعرف ان الفيلم نوع من انواع الفنون

لما تشوف لوحة فنية ما تقول شلون فلان سواها او رسمها , بالعكس تنعجب
فيها لجمالها و لمعانيها

الافلام تمشي على نفس نمط اللوحات الفنية لأنها افلام لها قصة و لها معاني ,
لكن الناس للأسف في الآونة الأخيرة قاموا يقيمون الفيلم على منطقيته لعالمنا
الواقعي و هذي خطوة خاطئة لانتقاد الفيلم

لأن مافي ولا فيلم بالتاريخ واقعي , كل فيلم خيالي و من نسج خيالنا فـ من حق
المؤلف انه يغير و يسوي و يحط على كيفه و مو من حق الجمهور يقولون له
انه أخطأ

عشان اكون واضح اكثر .. المعنى العكسي هو المعنى الصحيح

لو رحت قيّمت فيلم على منطقيته تطلع انت الغلطان لأن الأفلام الي لازم
تقيّم منطقيتها هي الأفلام الي تبي تكون واقعية , و مو كل الأفلام واقعية
بالعكس الأفلام الواقعية تقريبا مالها وجود بعالم السينما

كـ اختصار :

الفيلم فن و الفن ابتكار

,,

شكرا لـ رغد على الطقم

 

[7sN]

رد: we fall to learn how to pick ourselves up | 7sN

القصص الثانية الي كتبتها

مثل ما شفتوا قبل كم يوم كتبت لكم اول قصة كتبتها بحياتي و شفتوا البداية شلون كانت
موفقة , الحين بكتب القصص الثانية الي كتبتها بعد هذيج

بنفس المنتدى هذاك في ناس عجبتهم قصتي الأولى ( لا تسئلوني شلون , اتوقع انهم ما قرأوا
قصة من قبل بحياتهم ) فـ انا تحمسسست كوني عمري 11 قلت بكتب قصة ثانية بسرعة , و
كتبت

هالمرة قلت بكتب قصة رعب .. و انا انسان اصلا اخاف من قصص الرعب

فـ هذي قصة ما نجحت نجاح الي قبلها الحمدلله , كانت تتكلم عن مجموعة من 3 اشخاص
واحد فيهم متهور قرر انه يروح بيت مهجور , الي معاه ما وافقوا بالبداية بس لما شافوه
مصمم على الحالة راحوا معاه , قبل ما يدخلون البيت كان في رقم 8 على باب البيت فـ
ركزوا على هالنقطة لأنها مهمة بالقصة

خلال القصة واحد من المجموعة يعرف ان ابوه مات بهالبيت هذا .. بدون سبب
و بعدين يطلع وحش يلاحقهم بس يقتلونه و ينحاشون من البيت و يعيشون

رقم 8 ما كان يعني شي بس جذي شي حطيته بالقصة عشان يبين اني ذكي


القصص الأخرى

بعد فترة طويييلة ما كتبت قصص قصص بس كتبت قصة قصيرة بمنتدى نسيته
و اعتقد انه النبراس بس مو متأكد من هالمعلومة .. كانت قصة عن مدرب اخذ
ولد يدربه و بعدين الولد يكبر و يصير شرير لأن تفكيره عن العالم مختلف و
سلبي فـ ينقلبون على بعض و طبعا المدرب يفوز , هذي كانت قصة حلوة
بس التكرار وايد كبير فيها -_-

فـ لقيت منتدى سجلت فيه .. كان منتدى قريب مني وايد حبيته و الاعضاء عرفتهم
و تعرفت عليهم و الحالة كانت كأننا عايلة يعني , هناك في اقسام اسمها استوديو الأنمــي
و هذا قسم لتأليف القصص , يعني في قسم اسمه قصص و الروايات هذا يكون للقصــص
العادية المنقولة بس استوديو الأنمي لقصص الأعضاء

و في نظام الي لو انت عضو و عندك اكثر من قصة يسوون لك قسم داخل هالقسم و
يحطون قصصك بشكل مرتب فوق بعض , هذي مجرد فكرة حمستني أألف عندهم
و اعتقد بهالوقت كان عمري 13 و اسلوب كتابتي ما تطورت ابداً , فـ كتبت قصة

كان اسم القصة النمر الأبيض .. كانت صورة شفتها لواحد ماسك نمر او شي جذي
و قلت اوكي هذا اسم قصتي كانت قصة مالها داعي ابداً و اصلا اول تشابتر
فيييييها سخييييف

3 قاعدين بالصالة و فجأة يدخل واحد عليهم يطقهم .. بسسسس

حتى بالردود قالولي شهالتشابتر وايد قصير و انا اقولهم هذي البداية بس على اساس
ان ردي منطقي انا اشك اني ما كنت مريض نفسياً

بعدين كملت القصة و اصلا من البداية ما عرفت شنو قصة قصتي بس كنت بسويها
و انا ماشي و هذا الي صار

بعدين طلعت قصة عن اسطورة و وحش و مادري شسويت بعد المهم انها نجحت

شي نسيت اذكره .. بأستوديو الأنمي لما تكتب قصة الشخصيات يكونون الأعضاء
طبعا براحتكم تبون الأعضاء بالقصص او لا بس هذا الي كانوا يسوونه دايما ان الأعضاء
يكونون هم شخصيات القصة

بعد هالقصة تطور مستواي الكتابي شوي و استوعبت ان لازم اخلي الناس يحبون
الشخصية الرئيسية و لازم حالته تكون واضحة و عنده هدف

بس ان شاء الله راح اكتب التكملة بـ وقت ثاني عشان حالياً عندي
Presentation احضرله , فـ دعائكم ​

 

[7sN]

رد: we fall to learn how to pick ourselves up | 7sN

AMV


امس انا شفت تدوينة سيلفر لما حط فيديو AMV و حمسني اني اتكلم عن هالمجال
من الفنون < اعتبره مجال

اهو مجال من الفنون لأنه يدمج الموسيقا او الأغنية مع فيديو و يطلع من الدمج قصة
لها احداثها و شخصياتها .. بدوون ولا صوت من الفيديو نفسه فقط الموسيقا و هذا
شي بروحه يعتبر فن

بعطي مثال على فيديو الحين فيه موسيقا مافيه اغنية

[YOUTUBE]gXCATpwTO68[/YOUTUBE]

لو شفتوا الفيديو ترا الموسيقا وايد عادية مو نفس الي متعودين
عليها تكون ازعاج بزيادة او شي بالعكس تماماً

و هنا يجي دور الانتاج , الي مسوي هالفيديو بواسطة الانتاج قدر انه يحول
الموسيقا هذي و يستغلها الى انها تقولنا قصة او حدث و من هالحدث عرفنا
شخصيات الي بالفيديو

تخيلوا لو ما تعرفون روك لي ولا قارا ( و يمكن فعلا ما تعرفونهم ) فـ الفيديو هذا
بيقولكم كل شي عنهم , قارا هادئ و عصبي و من ديزاينه و لقطه منه بالفيديو نعرف
انه فيه شر داخله فـ بهالفيديو اهو الشرير

روك لي متحمس و حركي و نشيط و دايما اهو الي يدور حلول للمشاكل الي يواجهها
خلال الفيديو فـ اهو يعتبر كأنه البطل مع محاولات التغلب على المشاكل هذي

و هذا اهو دور المنتج لما يدمج الفيديو و يختار الموسيقا
و يقعد مدة طويلة توصل لأشهر عشان بس يضبط حركة
توصّل شعور قوي للمشاهد

افضل الفيديوهات بالنسبة لي الي تحمل قصص , ما امانع الي مافيهم قصص
بس الي مافيهم قصص لازم يكونون فيديوهات مدتهم قصيرة مو مثلا 3
دقايق بل اقل , الفيديوهات الي تحمل قصص عادي لو 5 دقايق


​

 

[7sN]

رد: we fall to learn how to pick ourselves up | 7sN

ادري اني قاعد انزّل وايد و بسرعة بهالمدونة بس المواضيع هذي
متحمس لها

كل ما اتحمس لشي اروح اكتب عنه و اليوم نفس الحالة بالضبط
و موضوعي بيكون عن :

Three Animators

3 رسامين اعشقهم بأستوديو اكرهه و اهو Toei Animation

بالتدوينة هذي راح اتكلم عن واحد منهم اتوقع انكم راح
تحبونه اسمه Naotoshi Shida

ملاحظتين :

1- ما راح اتكلم بالتفصيل عن اي احد منهم بس بتكلم عن
الي انا حابه فيهم مع بعض اللقطات
2- امثلتي بتكون عن دراغون بول لكن الكلام نفسه ما راح يكون
عن دراغون بول فقط بيكون عن قدراتهم كـ رسّامين

اتمنى تعجبكم

نبدأ :

Naotoshi shida

من الرسامين المفضلين عندي , صعب اختار منهم افضل واحد لأن كل واحد
له شي يميزه و يبدع فيه عن الثاني .. شيدا عنده اسلوب بالرسم اعشقه و اهو
تحريك الكاميرا بالأكشن و اختيار الزاوية المناسبة بدون تقطيع كثير

بعض الرسامين يستخدمون التقطيع عشان يحسسونكم بـ قوة الضربة
لكن شيدا يستخدم ابداعه بالرسم عشان يوصل لكم ان الضربة ممكن
تأثيرها يكون قوي بالدقة الصحيحة مو بالقطع المفاجئ

اوريكم لقطة منه قديمة بسنة 1986
و شوفوا الي قلت عنه فوق و اهو يتطبق بالفيديو هذا :

على وقتها هذا ابداع مو طبيعي و هاللقطة على بساطتها بشكل سطحي
الا انها من افضل اللقطات بتاريخ دراغون بول بسبب الابداع
الي فيها الي قام يقل وجوده مع السنوات

الحين ابيكم تشوفون له لقطة رسمها بسنة 2013 من فيلم
Dragon Ball Z : Battle of the gods
و لاحظوا تحريك الكاميرا + نظافة الصورة + السرعة

ملاحظة : اهو بس رسم اول دقيقة فـ ما يحتاج تشوفون الـ 48 ثانية الباقيين
بس لو بتشوفون شوفوا عشان تلاحظون الفرق بين رسمه و رسم غيره

ابداع ق4ق4

لو في احد فيكم يتابع ون بيس ترا هذا رسم افضل اللقطات الي فيه تقريبا :

- ظهور لوفي من البحر و وقوفه جدام الأدميرالات الثلاثة
- ماركو ضد الأدميرال كيزارو
- تحول لوفي لـ Gear Fourth امام دوفلامينغو
- مقدمة فيلم غولد ( طاقم لوفي ضد قراصنة long long )

و طبعا الكثير و الكثير و مثل ما تلاحظون هذا رسام مهم جدا
في شركة Toei Animation و يجيبونه بكل الحلقات المهمة

بأهم انمياتهم

و بس هذا بالنسبة لأول رسام اتمنى ان تعجبكم الفكرة
هذي و ان شاء الله بالمرة الياية اتكلم عن واحد ثاني
من افضل الرسامين ق4


​

 

[7sN]

رد: we fall to learn how to pick ourselves up | 7sN

Three Animators



Naoki Tate

الحين بتكلم عن ثاني رسّام بشركة Toei Animation و على عكس الأول
ما اعتقد كلكم بتحبونه اسمه Naoki Tate راح اذكر الي يسويه و
السبب الي يمكن ما تحبونه

بينما اسلوب Shida كان يعتمد على تحريك الكاميرا , اسلوب Tate يعتمد على
تحريك الشخصيات .. صعب صعب صعب تشوفون له لقطة من رسمه و تكون
الشخصيات واقفة لازم يكون في حركة تخلي المشاهد مندمج و يكون في تقدير
منه للرسام , و يحـــب يغير بتعابير الشخصيات .. هذا شي بتشوفونه وايد
لو ركزتوا عليه و من احد مميزاته عن غيره .. و طبعا من اهم مميزاته
اهي تأثير الضربات بالأكشن , يحب يسوي جو ان البكس تأثيره كأنه
زلزال من ناحية حركة الصورة و اهتزازها

شوفوا هاللقطة الأسطورية من ون بيس و لاحظوا الي قلته من ناحية :

- الأنيميشن ( التحريك )
- تعابير الشخصيات
- تأثير ضربة لوفي

للأسف انا ما اتابع ون بيس بس اعرف مدى اهمية هاللقطة و تأثيرها
عند متابعينه , مثل ما شفتوا باللقطة هذي جمعت كل شي من مميزاته
بشكل طبيعي , هذا لأنه اهو يستغل هالمميزات بشكل طبيعي و يستخدمهم
بشكل دائم

دراغون بول سوبر و ناوكي تاتي

لو في احد يتابع دراغون بول سوبر يمكن يعرف ان الرسم كان سيء جدا جدا جدا بالبداية ,
و بصراحة محد يُلام من الرسامين .. الي يُلامون بالمرتبة الأولى هم الأستوديو الي تحمسوا
يعرضون الأنمي بدون تجهيز مسبق و كان بس همهم الفلوس و المشاهدات

الحلقة الخامسة من دراغون بول سوبر كانت من اشراف ناوكي تاتي , و كانت اسوأ
حلقة من ناحية الرسم , لدرجة ان الناس تركوا مشاهدة الأنمي من بعدها و الكل قام
يقول ان تاتي اهو السبب و محد قال شي عن الأستوديو , لكن تاتي رجع بحلقة 11
و اثبت للكل قدراته بالتجهيز المسبق الي المفروض يكون متواجد من بداية الأنمي
و الحين اهو من اسباب نجاح الأنمي

بوريكم لقطة من رسمه الي اعتبرها من افضل اللقطات عندي لأسباب :

- رغم عدم دقة الرسم نفسه ( بسبب الأستوديو ) تاتي استخدم زوايا رسم مناسبة
جدا عشان يوصل لنا احساس اللقطة
- استمراره بإظهار قدراته و مميزاته كـ رسّام

مشكلته الوحيدة للناس اهي انه مو دقيق بالرسم كثر ما اهو
دقيق بالأنيميشن او التحريك , هذي انا عن نفسي ما اعتبرها
مشكلة لأنه يخلق تنويع بالأنمي الي اشوفه بس في ناس
يفضلون ان الأنمي من بدايته لنهايته نفس الرسم و نفس
الطريقة

بكل الأحوال الحمدلله ان Toei Animation يعتبرونه مهم بالنسبة لهم
و يجيبونه بأهم الاحداث نفس حالة Shida

ان شاء الله بقى بس واحد اتكلم عنه بس هالواحد كلامي عنه
ممكن ما يكون مفصّل لأني ما اعرف عنه وايد و توني
اكتشفه و انعجب بأسلوبه ق4


​