مدونة فخمة كن قوياً ،، فالحياة تميت الضعيف قهراً (2 زائر)

[A S T E R]

تكريم الإنسان


أعجب لمن خلق وهو كائن ضغيف ويتكبر على خالقه جل وعلى .!!
قبل فترة ليست ببعيدة سمعت قصة سيدنا ادم عليه السلام
وكلماا سمعتها أو مررت عن الايات التي تتحدث عن خلق الإنسان واستخلافه في الأرض،
تصيبني قشعريرة
من عظم هذا التكريم الذي منحنا إياه الله سبحانه وتعالى

من دون المخلوقات التي خلقها الله تعالى ،
اختار ادم ليعلمه أسماء الأشياء جميعها واستخلفه في الأرض من أجل إعمارها ،
وأيضاً ميزه وكرمه بالعقل عن باقي المخلوقات وقدرته على تعلم كل شيء

وأيضاً ،، أمر الملائكة كلها بأن تسجد له ..!! وما أعظمه من تكريم
فعلا أعزائي ركزوا بتفاصيل خلق ادم عليه السلام
وكيفية تكريم الله سبحانه وتعالى لنا

* قال تعالى :
(وَلَقَدْ كَرَّمْنَا بَنِي آدَمَ وَحَمَلْنَاهُمْ فِي الْبَرِّ وَالْبَحْرِ وَرَزَقْنَاهُمْ مِنَ الطَّيِّبَاتِ وَفَضَّلْنَاهُمْ عَلَىٰ كَثِيرٍ مِمَّنْ خَلَقْنَا تَفْضِيلًا) .
* وقال :
(ِإذْ قَالَ رَبُّكَ لِلْمَلَائِكَةِ إِنِّي خَالِقٌ بَشَراً مِن طِينٍ . فَإِذَا سَوَّيْتُهُ وَنَفَخْتُ فِيهِ مِن رُّوحِي فَقَعُوا لَهُ سَاجِدِينَ)

فهذا التكريم هو لبني الانسان ، يخاطب الانسان كافة ولا يميز بين عربي ولا أعجمي إلا بالتقوى
ولقد كان القران الكريم يركز على امرين هما ،
تذكيره بمدى ضعفه وقلة حيلته وأنه خلق من ماء مهين،
وعلى الصعيد الاخر تذكيره بتكريمه له وبعظم المسؤولية الواقعة على كاهله في استخلاف واعمار الارض
فإما أن يأخذ بهذه الأسباب والوظيفة التي كلف بها ولا ينجر وراء شهواته ،
او يقع في شراك الحيوانية واللانسانية .


اذن فلقد رفعنا وكرمنا منذ بداية خلقنا
وبالرغم من كل هذا وذاك نرى من يسعى في الأرض فساداً
ويتكبر ويتعالى على الله سبحانه وتعالى
فمنهم من يمشي ويقول انا ربكم ، ومنهم من يلحد ويقول بأنه لا وجود للخالق
ومنهم من يقسى ويهلك نفسه بالمعاصي ولا يرتدع !

فاللهم الثبات الثبات على الحق
واللهم قوي إيماننا واجعلنا ممن يسمعون القول فيتبعون أحسنه



والسلام
( ما حبيت أطول عليكم مع انو الموضوع لو بدي اكتب فيه ما بخلص، بس حبيت شارككم هالكلماتق9 )
+
فيه سبب اخر لكتابتي هالتدوينة
وهو إنو بالتدوينة الجايه رح أكتب عن العكس تماما
الله سبحانه وتعالى كرمنا بإنه احنا بشر
ولكن هناك بعض البشر من يلوثون هذه الانسانية بوحشيتهم
وسيكون عنوان التدوينة القادمة .. وحوش البشر

​

 

[A S T E R]

وحوش البشر


عندما تقرأ او تسمع كلمة - وحش -
مباشرة يتبادر إلى أذهاننا شيء واحد
وهو فيلم..أو قصة ..او أي امر في الخيال
ولكن،،
ومع الأسف الشديد
هناك من يعيش بيننا ويأكل ويشرب ويتصرف كإنسان
ولكنه لوث معنى انسانيته عند أول موقف تعرض له
فتحول إلى وحش ضار يؤذي أعز الناس على قلبه ، دون أن يستخدم عقله
أو أن يتروى
أو حتى أن يأخذ بنصيحة رسولنا الكريم " لا تغضب "
نعم أخوتي أصبحنا نسمع عن الكثير من الوحوش الذين يدعون بانهم بشر مثلنا مثلهم
ولكنني أطلق عليهم هذا اللقب لأن حتى الحيوانات لا تفعل فعالهم المشينة

فنسمع عن وحوش أطفال ..أطفال في عمر الورد يتم ضربهم وتعذيبهم وقتلهم أحيانا
ومن أجل ماذا؟
من اجل انتقام..من أجل الفقر..من أجل أنهم لا يريدونه فيقلتلونه - لانوبالغلط اجا _

وهنالك وحوش أموال،،
يأكلون أموال بعضهم بعضاً دون رحمة ، سواء افراد او شركات كبيرة تستولي على شركات اصغر
او استيلاء على ميراث وعدم إعطاء كل ذي حق حقه.!!

وهناك وحوش نساء ..!
تعذب وتضرب وتهان وتقتل سواء من قبل زوج او اب او اخ او محتل غاصب
من اجل ماذا؟
أحيانا تكن مخطئة وأحيانا أخرى تكن مظلومة ولكنها تذهب ضحية تهورهم وعدم عقلانيتهم

وفي كلا الحالتين على الاسرة جميعها أن تتكاتف من أجل ان تحتوي الموضوع سواء كانت مخطئة أم لا،،
لا أن تقوم بمفاقمته وجعل قضيتهم على كل لسان
عليهم أن يتصرفو بالحكمة والموعظة الحسنة ولا بأس بالعقاب ان اقتضى الامر ولكن..
بعقلانية وبإنسانية..ليس بجنون ووحشية مفرطة ؟!!

أين هي عقولهم عندما يختبرهم الله سبحانه وتعالى؟
إن هذه الحياة الدنيا كلها دار فانية
وهي طريق من أجل وصولنا الى الجنة بإذنه تعالى بالأعمال الصالحة التي نقوم بها ونحن نحياها
فكل هذه المشاكل التي نواجهها والاخطاء التي يرتكبها من هم حولنا
هي امتحان من الله على مدى صبرنا ومدى تقربنا من الله تعالى وكيفية تصرفنا تجاه هذه الأمور

لا أن نقوم بأذية أحبائنا حتى وإن أخطأوا بوحشية مفرطة؟!!
ألم تمروا عن اية " إن الله غفور رحيم "
فعلا إنني أستغرب وبحق من هذه الحوادث التي اسمعها دائما
وتدمع عيني لما وصل اليه مجتمعنا من انحطاط ووحشية وعدم تفكير
وبعد عن دين الله

إنني لا أؤيد أي خطأ او أي تجاوز لاحكام الله الشرعية في حياتنا
ولكنني في المقابل أمقت وبشدة ما يتصرفه الناس تجاه مثل هذه القضايا

يستطيع الانسان أن يعاقب بكافة الطرق وأن يقلل من الفضيحة والقيل والقال
وينهي المسألة دون أن تخرج للعلن ويستطيع أن يتقرب من الله سبحانه وتعالى
ويأمر أهله بالتقرب اكثر والدعاء حتى يخرجوا من هذه المحنة

فعلا اعجز عن التعبير فيما يمر به مجتمعنا من بعد عن الله
والاغراءات التي يواجهونها سواء الشباب ام الفتيات وانجرافهم وراءها مما يسبب من مثل قضايا القتل والضرب وغيرها

إنني حقا أدعو من كل قلبي لأمة الإسلام ان يهديها سبلها وأن ترجع إلى رشدها وإلى طريق الحق..اللهم امين امين





ملاحظة :_ الي خلاني اكتب هالتدوينة هي قضية وحدة من بيت لحم اسمها اسراء الغريب ،
اذا بتحبو تعرفو اكثر عنها بس اكتبو عاليتويوب اسمها ورح يجيكم كل شي..
وشغلة ثانية بحب احكيها بالنهاية
وهي اني بكره تهويل الاعلام لقضايا معينة (مثل قضية اسراء )
واستغلالها لضرب ديننا وتعاليم ديننا متذرعين بمثل هذه القضايا وبحطو العيب على الاحكام الشرعية مش على طريقة تطبيقها الخاطئة عند بعض الناس ،
يعني لو الناس فاهمين صح ما كان بتصدر منهم هالتصرفات ..
وفي المقابل ما بذكروا قضايا ثانية لنساء اخريات تم اهانتهم واعتقالهن من قبل السلطة الفلسطينية ومن بعد ذلك تم تسليمها الى يهود..تخيلو!!
فقط لانها تدرس القران لفتيات صغيرات !! فمثل هالقضية ( قضية الاء البشير )
ما حد سمع فيها وولا حد عمل عليها ضجة وهي لحد هسا معتقلة وما حد تضامن معها ..ليش يا ترى؟
بتركلكم انتو الإجابة بس هي واضحة الشغلة،،
بوفرو اجنداتهم وجمعياتهم النسوية وطاقاتهم تنصب على قضايا معينة عشان يضربو مفاهيم الدين
اما قضية مثل قضية الاء البشير ولا بسلطو الضوء عليها ولا بذكروها حتى..
لانها بتدرس قران !!
قاتلهم الله جميعا انى يؤفكون ..
والله يفك اسرها الاء البشير .. بتقطع قلبي عليها من بعيد
والله يرحمك اسراء ويجعل مثواك الجنة وان شاالله الحق يبان



في امان الله اخوتي

 

[A S T E R]

مساء الخير

كيف حالكم جميعا؟

زمان ما كتبت هون ، ما صحلي أكتب

المهم ، هاد اليوم يا جماعة الخير وانا طالعة وماشية بهالشوارع ضليت صافنة وأفكر
وحبيت شارككم هالتفكير ونحكي سوا بهالشغلة

يا عمي ليش هيك احنا شوارعنا واماكنا العامة بتخزي ومو نظيفة ؟
عنجد والله اشي بقهر ، هالزبايل وين ما تروح
ومكان الحاويات يكون اشي بخخخزي ومققققرف الصراحة ، الواحد ما يعرف يمر من جنب الحاوية
غير الاوساخ الي هون وهون ،
ليش بس تفوت على بيت أي حد بتلاقيه نظيف وبلمع اما الشوارع لا؟!
ليه ما فيه جهات مسؤولة عن الشغلة - بالشكل الكافي قصدي- لحتى تحل هاي المشكلة جذرياً

هسا ممكن تحكو انو الأجانب كل شي عندهم نظيف وبحافظو عالنظافة بالشوارع والأماكن العامة
بس الصراحة لو نيجي على بيوتهم بتخزي ومو نظيفة بالمرة

وهالشي واضح ومبين بالبرامج لما يروحو عبيوتهم ، اكثر من مرة اشوف برامج على ناشونال جيوغرافيك
بس يروحو على بيوت ويدورو على الحية - قصدي الافعى- عمري ما بنسى هاللقطات
مو طبيعي العفن ، كنت مفكرة انه البيت مهجور
بس طلع لا فيه عيلة وأطفال
حتى هو صاحب الرنامج انصدم من كمية العفن والفيران بالبيت هههههه
وبرضو كثير بعرف ناس من الي عاشو ببلاد برا بعانو من قلة نظافتهم ووساختهم

حتى لسا سمعت عن وحدة رجعت من بلد ما بعرف أي بلد بسبب قلة النظافة وعفانتهم ..
وما كملت دراستها بس لانها قرفت من الوضع ..مع انها ساكنة مع بنات

خالي لما درس بأحد هالبلاد ، بقول تتصوروش شو العفانة مو طبيعي ومش عارفة استخدم المصطلحات الي هو استعملها بالوصف ،، أولا بسبب انكم ما رح تفهموها هههههه هي بتضحك كثير وثانيا غير لائق احكيها
وكثير سمعت من ناس كثير انه الأجانب عفنين ببيوتهم وبنظافتهم الشخصية

اما شوارعهم واماكنهم العامة بتلمع لمع ، مو لانه عندهم ثقافة نظافة ، بل لأنه عندهم دول صارمة وقوانين
وبرضو في جهات مسؤولة وملحقة عالتنظيف ، مو مثل عنا
صح فيه بس مو بالكم الكافي ،

فأنا من رأيي الشخصي بقول هو بيرجع لعدم توفر الطواقم الي تكفي، يعني الصراحة بلادنا بصرفو كثير وقليل على الي بدهم إياه ، حفلات ومنداري شو ، وعشغلات تافهة وبمولوها
اما شغلات مهمة ومفيدة تفيد الناس والمجتمع لا ما بهتمو!!

وبرضو طبعا ما بلغي دور الشخص نفسه في انه هو لازم يحافظ عالبيئة الي عايش فيها
سواء عشان نفسه وعشان الي حواليه
عفكرة انا حتى لو كنت بمكان غير نظيف ما بوسخ بزيادة ، مستحيل

بناتي مجننتهم بهاي الشغلة وحكيتلهم مرة قصة عن المحافظة على نظافة البيئة لحتى يتعلمو ما يرمو أي شي عالارض
سواء بالبيت او برا البيت ، فيعني لو كل ام تعلم أولادها بشكل صارم مستحيل يوسخو بس يطلعو برا

يعني جد يا ريت لو كل أم تنجن بولادها اذا وسخو برا البيت زي ما انها تهتم ما يوسخولها بيتها

جد بتمنى دايما من كل قلبي يتغير هالحال لحال أفضل ونكون أحسن ناس بصورتنا الخارجية لغيرنا

بعين الله ،، بس هيك حبيت احكي هههه

​

 

[A S T E R]

بتجيكم هيك حالات فجائية مثلي انه تفتحو على شي اغنية بتعشقوها وتعلو الصوت على الااااخر
وتضلو تعيدوا وتزيدوا الاغنية عشرات المرات وتغنو معها بصوت عالي؟

ولا بس انا لحالي المعاقة ؟

أنا حاليا بعد ما خلصت كتابة الموضوع عن المسلسل
فتحت على هاي الاغنية

https://www.youtube.com/watch?v=NmSnq5VrCr8&list=PL7Mif1FiwcwCEL2Bsnuely3qz-RlE22ur

وعليت الصوت على الاخر وهيني صرلي ساعة بعيد فيها وبغني معها ههههه
والمشكلة على المسجل مشغلة ومعلية الصوت مو بسماعات الاذن ، خلي هسا دار عمي الي جنبي يقولول مالها هاي انهبلت لاني مو بالعادة وبعملش هيك
هههههههه بس انا مسكرة يمكن ما وصل الصوت كثير

تعرفوش قديش بعشقها هالاغنية

صوت المغنية ايمي هيتاري عششششق لا يوصف في الجمال والرقة والانوثة ق9
جد خرافي وفخم فخم صوتها
بسحرك سحر..مستحيل ما تحبو صوتها مثلي

وبعدين كلمات هاي الاغنية بموت عليها
يعني عز الدين الشويخ ابدع في هالكلمات الرائعة وفي اللحن الرااائع
جد ابداع في ابداع هالاغنية وكمان اغنية الحياة امل رائعة

حافظتهم الثنتين وكل فترة بيجي عبالي اسمعهم واكررهم

طبعا هي الاغنية بتحكي عن انه الواحد ما ييأس ويستمر ويضل يحاول
لحتى يوصل لهدفه ولغايته ولحلمه وما تستسلم لليأس
فطريق النجاح محفوف بلمخاطر والانتكاسات
ولازم نصبر ونواجهها بصلابة واذا ما تدعثرنا نقوم ونكمل طريقنا

جميلة جدا هالاغنية

اسمعوها يلا
واحكولي رأيكم فيها وهل اعطتكم طاقة ولا لا
وهاتو اعطوني أغاني مثل هيك ق8

و @RELENA مالك ما بتعملي فعاليات أسبوع او فعاليات شهر؟
اعملي خلينا نشارك ونحكي


يلا تصبحو على خير حبايبي

هاي كلمات الاغنية

حلمي تحطم واختفى
و العزم في قلبي غفا
و الدمع من عيني يسقط مرهفا
أملي تحطم في الصخور
و الحزن أضحى بي يدور
و اليأس يكتب نفسه بين السطور
الخوف قيّد أضلُعي
لم يبقَ لي شخص معي
و شعرتُ همساً خافتاً في مسمعي
همسٌ يقول الى متى
ستظل تغرق في البكاء
قم نحو شمس الصبح لا غيم الشتاء
يأس القلوب نعم يزال
لا لا يدوم فذا مُحال
فانظر إلى الدنيا معي هيا تعال
انظر الى تلك النجوم
مهما تغطيها الغيوم
ستظل تلمع حرة .. حباً تحوم
انظر الى البدر الجميل
بدل البكاء أوالعويل
مع نور شمس الصبح في لطف يميل
فانسى المآسي والهموم
و امسح دموعك والغموم
و اعلم بأن الحزن شيءٌ لا يدوم
في قوةٍ قم للطموح
لا لا تبالي بالجروح
كن مؤمناً أن النجاح على السفوح
سر خلف حُلمك قل نعم
و انسى التراجع و الألم
و بروعةِ غني التفائل كالنغم
فبدأت أبكي في رجاء
والشمس تشرق بالضياء
ورفعت رأسي عالياً نحو السماء
و صرخت أني استطيع
اكمال حُلمي لن اضيع
سأسير في أملٍ الى الدرب الوسيع
ودّعت يأسي ها هنا
وتركت آلامي أنا
ووقفت في عزم لامشي للمنى
فتفتحت حولي الزهور
وبعطرها نشر السرور
وبراحة أحسست لامسني الشعور
ما عدت أعرف ما اقول
فالقلب أضناه الذهول
و بداخلي فرحٌ و إصرار يجول
فأعدت حلمي للأمان
حلقت قد آن الأوان
كالنسر نحو الشمس أطلقت العنان
و بدأت أمحي ما مضى
بالحب طرت الى الفضاء
عن كل شيء داخلي أنا في رضى
حزني تحطم واختفى
و الخوف في قلبي غفا
و بفرحة قد عدت أشعر بالصفا

 

[A S T E R]

تابع لفعالية الشهر

(ما هو إحساسك تجاه فصل الخريف)

" بما اني الي طلبت ولبولي الطلب ع السريع
فلازم يعني اكون أول وحدة تكتب عنها "


بالنسبة الي فصل الخريف غالبا غالباً بعاني فيه
وبكون كئيبة..ليه ما بعرف
مرة قرأت أنه هالشي طبيعي وانو هيك بصير في كل الناس
خلال فترة الانقلاب بين الفصول ..بكون فيه طاقة سلبية اشي مثل هيك
هو أصلا يمكن لسا بدري..يمكن كمان شوي اكتئب

بس بدكم الصراحة انا بحبو فصل الخريف
الجو فيه لطيف جدا ..لأنه بلدنا الجو فيها بالصيف مقرف ورطوبة قاتلة

فما بصدق على شهر تسعة وعشرة يجو وننبسط ونتبورد شوي ههههه
وبرضو بنطلع اكثر بهدول الشهرين لأنه الجو حلو مش شوب
فبنتشجع نطلع ونطش على الأرض
لانه جد قرف الطلوع بالشوب

فهو فصل حلو كثير بالرغم من بعض السلبيات الي فيه ..واحد هالسلبيات هي ..هسا رح اشرحلكم

هاي السنة شو عم بصير فيي هالفترة؟

صرلي عشر ايام بالزبط ...ما بخلص حك في شعري ..ما بدي اترجم اكيد فهمتو قصدي
والله مو عارفة شو صرلي
ايدي ما تنشال من راسي وانا احك شعري ههههههههقق
وطلع كلو قشرة ... وجلدة راسي مبين قاعدة بتطلع بقشرة
وانا لاني غبية وما بصبر فبزيد الطين بلة لاني بحك كثير ههههه

وامي صارت تقول أنه هاد فصل الخريف ..
بسقط فيه الورق من الشجر وبيسقط فيه الشعر من البشر هههههههه ««سجع سما3

وانه بس يطلع الشعر الجديد بدل الي يتساقط اكيد بعطي شعور للحكة
وانا بالفعل بعاني من تساقط لشعري ..صرلي شهر هيك
بسقط بشكل مش طبيعي بالمرة


وهاي ابشع شغلة بالخريف هو تساقط الشعر وحتى تقشر جلد الجسم مو بس الراس..بصير فيكم هيك ؟
كلو بتبدل ههههه

بس أنا هاي السنة زيادة ولازم اعالج هالتساقط قبل لاصير قرعة

بس هو بالفعل مثل ما قلت صح في سلبيات
واصلا كل فصل الو سلبيات
بس هو فصل جميل جدا وممتع،، وأنا بحبه هو وفصل الشتاء الرائع

وبكفي أنه كمان شغلة حلوة بهاد الفصل وهي أنه الشهر الجاي أن شاءالله رح يبدأ موسم الزيتون الجميل
،شو بحب موسم الزيتون وطقوسه واجواؤه ، بروح مع اهلي بساعدهم في تلقيط الزيتون..
صح متعب جدآ بس بجنن .
بكفي لمتنا وحكينا وضحكنا ،
واحلى شي تذكير أخوي في قراءة القرآن ونسمّع لبعض الي حافظينو..
غالبا بنطلع يوم جمعة فأخوي بصير يحكي يلا شو رايكم واحنا نشتغل كل واحد فينا يقرأ عشر آيات من سورة الكهف وهكذا بكمل حد ثاني فينا،، لحد ما تخلص ،
صح منضحك ونعمل مواقف ببعض ، بس دايما قعداتنا بتكون حلوة وتحفّها الملائكة بالذكر والقرآن،
صح كلهم أهلي مشايخ
بس هاد اخوي أحمد بالذات زينة المشايخ الله يحميه وفي اي قعدة بستغلها ليكون فيها ذكر،،
ما اروعك من اخ يا غالي




لهون بكون خلصت ما بدي اطول عليكم وانا أرغي

سي يو جايز،،
يسلمووو الغالية تولاي عالطقم الي بجنن

 

[A S T E R]

والاكتئاب بدأ يتسلل إلى قلبي مرة أخرى

ولا أدري لم أبدأ بكره نفسي أيضاً

لي عودة في المساء بتدوينة أخرى ​

 

[A S T E R]

الظلاميين والسلبيين




أكره هذه الفئة من الناس وأمقتها بشدة

ممكن البعض منكم ما فهم معنى كلمة ظلاميين

هم الناس الي اختاروا يعيشوا في عزلة تامة عن العالم الخارجي

عدم مخالطة البشر ، او النظام او الدولة الي هو عايش فيها

وعدم قول او فعل أي شيء تجاه أي شيء!
سواء صح او خطأ !

من اجل ماذا ؟

لأنه - ومن وجهة نظره السوداء -

إنه هالحياة التي عايشها هي حياة غير صالحة
وكلها اثام ، وبانه لا جدوى من التغييرر
وبأن الحل فقط في الانعزال
وعدم قول شيء
لا كلمة خير ولا كلمة شر !

في أي دين وأي عقل وأي منطق بيقول انو هو هيك الحل يا فهمان ؟!

صحيح اننا انولدنا بزمن تكثر فيه المعاصي والاثام
والفساد منتشر مثل المرض بحياتنا
سواء بالأنظمة المطبقة علينا من قبل حكام ظالمين ..كلها انطمة لا تمت للاسلام بصلة
لذلك بنلقى الناس بعيدة عن دينها
وبتقوم بأفعال لا تليق بنا كمسلمين

فنرى السيئين اكثر من الطيبين

وبأن النفوس تغيرت عن ذي قبل
وهو بالفعل هيك الدنيا حاليا
والوضع من سيء الى أسوء

وما بدنا لسا نتطرق لشغلة الاحتلال الي بتعاني منها اكثر من دولة

فالمهم ، هدول الفئة من الناس ، بفضلو ينسلخو عن مجتمعاتهم بشكل تام تقريبا
وما بخالطو غير للضرورة !

حتى بعرف شخص ما ببعت اولادو للمدارس من اجل انو نظام التعليم غير صالح وبيخرب الجيل !!
ببعتهم لسن معينة بعدين ببطلهم منها سواء أولاد او بنات ،
كلهم حاليا تزوجو اولادو ، بس هو هيك عمل معهم
- لا تحكو شي عليه لانه بقربلي هالشخص -

وهذا امر خاطئ جدا وليس من الدين في شيء
صح احنا كل أنظمة حياتنا بائسة الصراحة ، سواء التعليم
او ااقتصاد ..او السياسة الداخلية ككل
ما في شي صالح او حسب تعاليم ديننا

بس احنا كمسلمين شو واجبنا نعمل تجاه هاد الواقع؟

إنه نواجهو ونعيشو ونخالط الناس حتى لو أحيانا رح نضطر نعمل حرام
لانه واقعنا زفت
- يعني مثلا الاختلاط في التعليم حرام ..بس كلنا مضطرين نعملها عشان ندرس ونتعلم
(بس عادي كل واحد يلتزم بتعاليم دينو بس يطلع وان شاالله ما نأثم ) -
او التعامل بالبنوك ..معروف انو أي شي بالبنوك حرام وحرام كبير
بس مثلا الموظفين مضطرين يروحو يقبضو منو ويتعاملو معو
بس انه الواحد ما يزيد تعاملو مع البنوك لحتى ما يأثم اكثر

فيعني قصدي انه منعمل شغلات بحياتنا هي حرام كبير
بس لأنه واقعنا سيء جدا وبعيد عن الدين
بنعملها بس بما يرضي الله وما بنزيد في الاثم

والأمور الأخرى الي منقدر عليها ومنقدر نستغني عنها..نستغني عنها
ما بنمشي مع التيار ونقول مهو كل الناس هيك!
لا بنمشي عكس التيار اذا الامر بنقدر نتملص منه
ونحكي وننصح الي حوالينا انه ما يعملوه ونوعي الناس

هيك صفات الانسان المسلم لازم تكون
لا يغرق بالحرام من ساسو لراسو ويقول مهي هيك الدنيا
ولا ينسلخ عن مجتمعه بحجة انه الواقع فاسد

حاول قدر الإمكان تلتزم بتعاليم دينك ببيتك مع اهلك
مع اقاربك ..في لبسك ..في كلامك ..في اخلاقك
في شغلك
وان شفت الغلط - قصدي الحرام - احكي وانصح ووعّي غيرك
ولا تقول ما دخلني
الرسول قال :

عن حذيفة بن اليمان عن النبي - صلى الله عليه وسلم - قال: «والذي نفسي بيده لتأمرنّ بالمعروف ولتنهوّن عن المنكر أو ليوشكنّ الله أن يبعث عليكم عقابا منه ثم تدعونه فلا يستجاب لكم. » (الترمذي)

و عن قيس بن أبي حازم عن أبي بكر الصديق قال: يا أيها الناس إنكم تقرؤون هذه الآية (يا أيها الذين آمنوا عليكم أنفسكم لا يضركم من ضل إذا اهتديتم) وإني سمعت رسول الله - صلى الله عليه وسلم - يقول: «إن الناس إذا رأوا الظالم فلم يأخذوا على يديه أوشك أن يعمهم الله بعقابه. » (أخرجه أحمد)

وفي رواية عند ابن ماجه، قال الرسول - صلى الله عليه وسلم -: «إنّ النّاس إذا رَأَوُا المُنكَرَ لاَ يُغَيِّرُونَهُ، أَوشَكَ أَن يَعُمَّهُمُ اللهُ بعقابه. »


ركز بأحاديث الرسول كيف العقاب وخيم ان لم تأمر بالمعروف وتنهى عن المنكر،
فالحياة بصعوباتها ، بالفساد الي فيها ، لازم نعيشها وننخرط فيها بما يرضي الله
ونستعين بالله على ذلك ولا ننعزل عن الناس وعن الحياة كلها ونضل ننشر اليأس والاحباط

مثل جمل : عمرنا ما بنصير!
عمرنا ما بنتغير
احنا شعب متخلف ومعاق
الواقع سيء عمرنا ما بنتحرر ، طبعا انا ما بحكي بس عن بلدي ،
بحكي عن كل بلاد المسلمين
...الخ من الجمل المحبطة والمقرفة صراحة

بس بحكي لأي حد بحكي هيك ..مع انو هالاشخاص ما رح يقرأوها ..لأنو في حواليي ناس هيك
بحكيلهم انتو المتخلفين
وسلبيتك وظلاميتك خليها لنفسك
ترا احنا احسن ناس وفينا العاطل وفينا الطيب
وبعمرو ما العاطل طغى على الطيب
الخير ما انعدم
والرسول لا ينطق عن الهوى
واحنا بالفعل امة بنرفع الراس فيها

+
انت يلي بتحكي هيك روح تابع اخبار اخوتك المسلمين بالعالم كلو
وشوف امثلة الناس المسلمين المضحيين بحيواتهم ومواقفهم

مغرقلي حالك بمستنقع بخزي ومركز ع الأمور المخزية الي بعملوها بعض المسلمين ببعضهم
وبتبث سمومك بين الناس مثل اليأس والقنوط من رحمة ربنا الي هي أوسع من الكون كله

وبحب اذكرك انه اليأس والقنوط من الشيطان وبتأثم عليه إثم كبير !!

الله يصلح الحال يا رب ويهدينا ويثبتنا عالحق وعلى جادة الصواب

​

 

[A S T E R]

إخوتي سر قوتي ،،!


خليط من الحنون والشديد

مرهف الحس والقاسي ،، المعلم والطالب

الذي يقدم النصيحة ويأخذ بها

صاحب القلب الكبير الطيب الجميل
الذي يستوعب أي صدمة تأتي على عقله

هو ذاك الأخ الذي إن أكملت لكم في وصفه لن انتهي اليوم ولا غداً ولا بعد الف سنة

يوم عن يوم وشهر عن شهر وسنة عن سنة نكبر فيها ، يفاجأني بشخصيته
وبعقليته
وبحكمته
وبجنونه
وبفلسفته المقيتة التي يستحيل أن تجلس معه ولا يقنعك بوجهة نظره في أي أمر في الحياة حتى وإن كان تافهاً


معاذ الغالي ، سمّي بذلك تيمناً بالصحابي الجليل معاذ بن جبل ،،
فاللهم اجعل له من اسمه نصيب
أخونا الكبير وسندنا العظيم ، ونبراس حياتنا ونورها وملجأنا الامن في حالات ضعفنا

بحبك يا اخوي يا غالي والله يديمك تاج فوق روسنا ق9ق8
.
.
.
.

الملجأ الامن الثاني ، الأقرب إلى الأم الثانية ق8

العزيزة الغاليه الحكيمة ،
التي تستوعب أي مشكلة تطرح امامها
حلولها دائما هي الصائبة
كلماتها دائما مؤثرة ومقنعة
هي أقرب أيضا إلى شخص أخي معاذ
تتكلم بالمنطق والعقل والدين والرزانة
ضحوكة خفيفة الظل محبوبة لمن هم حولها
ام رائعة جدا وحنونة

حبيبتي دعاء ، من أكثر الأسماء التي احبها لان أختي اسمها دعاء
اللهم انفع فيك امة الإسلام والمسلمين وحقق لك أمانيك وأعانك على تربية أبناءك
أعشقها كثيراً
.
.
.

شيخ العائلة اللطيف الجميل
أبو صدر رحب
يستقبل كل صدمة ب - لا حول ولا قوة الا بالله ،،
انا لله وانا اليه راجعون ، لعله خير ..الخ -
لا يتأفف من أي أمر أو مصيبة
تبهرني قوة تحمله العجيبة في تلقي الصدمات وقرنها بالصبر والاحتساب عند الله

الذي يذكرنا دائما بكل ما هو خير ولا تخلو جلسة له معنا بذكر الله وتذكيرنا بعدم اللغو في الحديث والحديث في أمور تتعلق بالمسلمين واخبارهم او بأمور الدين
هذا غير مزاحه ونكاته وأحيانا يكون عقله صعب ولكن لا يوجد أطيب من قلبه

عزيزي أحمد ، حبيب القلب ومهجة القلب انت ،،حفظك الرحمن وأدامك لنا وجعلك ذخرا للاسلام والمسلمين ونفع بك وبعلمك ورزانتك وجمال اخلاقك وعذوبة صوتك ورقي حديثك ومناقشتك للناس .. بحبك ي خوي ق9
.
.
.

اللطيفة الظريفة البسيطة الحنونة
الحساسة ، صاحبة التفكير الفذ
الذكية في كل شيء
اللامبالية أحيانا في كثير من الامور

صاحبة كلمة وصوت وحضور قوي في الجلسات ورد مفحم دائما
لها نظرتها الخاصة تجاه الأمور ..آرائها تسبق عمرها..تتسم بالعقلانية دائما
تضحك وتمزح وتجن معنا احيانا...
لن اجد مثلها ومثل حكمتها وجمال أفكارها والتزامها بدينها...

انها عبير..اسم على مسمى...اعشقك بكل شيء بك ..اسمها يليق بها وبشدة...حفظك الله عزيزتي
.
.
.

نسختي المصغرة مني..على حد قول امي هههه

مجنونة..عصبية..احيانا حساسة..شايفة حالها
ذكية..قيادية ..قوية جدا..تدافع عن نفسها..صريحة..
لا تسكت فيمن يخطأ في حقها..لطيفة..جميلة ..تخيف الاطفال
تحب المساعدة على مزاجها
حافظة للاسرار..هي اجمل ما في بالبيت بالرغم من قسوتها احيانا

منار..وهي بالفعل منارة البيت ومحبوبة الكل..اسعدك الرحمن ووفقك في دراستك
(في كثير من صفاتها موجودة فيي، ولكن هنالك اختلاف..ولكن الشخصية بشكل عام تشبهني لهذا تقول والدتي أنها مثلي)
.
.
.

كتكوتة البيت وآخر العنقود ..
تمتلك اطيب قلب على وجه الارض ..حنونة..
تحزن اذا ما آذاها أحد لكنها تنسى بسرعة
تحبنا جميعا وتخاف علينا...وبالأخص أنا...
فلقد ربيتها اول سنين عمرها ..هي روح الحياة في منزل أهلي..تضفي طعما لا يضاهى على الحياة
تعشق أطفالنا بالرغم من غيرتها..وتحب المساعدة
عنيدة ..اجتماعية ..متسامحة..هي مهجة قلوبنا كلنا

سوار العسل.. أعشق تفاصيلك وتفاصيل ذاك اليوم الذي ولدتي فيه.. أحبها حباً لا يتخيله اي إنسان فهي اجمل ما حدث لنا في عائلتنا..
.
.
.

هؤلاء هم سر سعادتي وسر حزني وسر غضبي وسر هدوءي ..هؤلاء هم سندي وسر قوتي ..
نعم أنني أشعر بالقوة بالجدار العظيم خلفي الذي اذا ما اتكأت عليه لن ينهار..
استمد القوة والطاقة والنصح منهم ..هؤلاء هم إخوتي
أعظم كنوزي في هذه الحياة
فاللهم لا تريني فيهم بأساً ولا تفرقني عنهم واحفظهم بعينك التي لا تنام هم وعائلاتهم

.
.
.
.

سأجعل تدوينة خاصة أتحدث فيها عن أمي وأبي ..
ممكن البعض يقول لماذا ليس زوجك هو سندك وقوتك...
وهو بالفعل سندي وقوتي أيضاً..حفظه الرحمن

ولكن القوة والسند التي من أهلي واخوتي أحس أنها طعم آخر ولأنهم اخوتي وتربينا وتعلمنا من نفس المنبع..
فكلنا نتشارك نفس الأفكار ..
ودائما ما نحس ببعضنا..حتى بعد أن تزوجنا
ويكفيني فخراً ..
وأحب دائما أن أفخر بأننا أبناء أبينا العظيم بشخصيته ..الراقي..صاحب العقلية الفذة والملتزم بدينه








في امان الله وحفظه

​

 

[A S T E R]

تابع لفعالية الشهر

أتمتلك هدفًا تظن أن تحقيقه سيؤثر في هذا العالم،
أيًا يكن سيئًا أم جيدًا، حدثنا عنه




مرحبا ،، كيف حالكم جميعاً؟

حبيت أحكي وأشارك بالفعالية ،، حلو السؤال بداية بيلا

بالنسبة الي ، عندي كم هدف بحياتي

بس الهدف الأساسي والي تتمحور حوله حياتي

هو إني أكبر بناتي وأعلمهم وأثقفهم ، وأخليهم قياديات وناجحات ويأثرو بالمجتمع حولهن وبالعالم، وما رح أطمسهم
ان شاءالله يطلعو موهوبين ويفيدوا العالم

سواء بدراستهن أو بعقلهن الي بدي اشتغل عليه لحتى يفكر صح وملتزمات بدينهن

وحتى لو اختارن الزواج ، وما حبو يتعلمو ( مثلي )
رح أهيأهم يكونو قد الحمل والمسؤولية متل ما أمي نجحت في هاي المهمة وبامتياز

ممكن قسم منكم وبالأخص صبايا ،
وفيه كثير ناس كمان بتفكر إنو هاد الأمر اشي عادي وسهل وانو مش هالهدف السامي!

بس انا بحكي للي بقول هالحكي
انو لما الوحدة تختار انها تتزوج وتنجب وتربي جيل صالح بعقله وبتفكيرو وبالتزامو لدينه
بفيد هاد المجتع اكثر ما انت فايدو ،

لأنو هاي الانسانة يلي فيه قسم كبير من الناس بقللو من شأن المرأة ودورها

بكون اثرها بالمجتمع أكبر من أثرك ، لأنها بتنشر فكرها بين الناس وبتربي أطفال صالحين بنشرو نفس الأفكار وبنفعوا الأمة أكثر لأنك انت شخص واحد ،
أما هي عدة أشخاص ..طبعا اقصدها هي واطفالها

اكيد طبعا فيه ناس لا توفق بالتربية ، ولا أنكر ذلك
ومش الكل بكونو ولادهم مثلهم وبأذوا المجتمع

وفيه أهالي همي أذى وبجيبو كمان أذى للمجتمع !
بس أنا هون بحكي عن الناس الي بتربي صح وهمي صح وبطلعو أولادهم صحق9

لهيك انا هدفي الحالي الأساسي هو اني اشتغل على بناتي واطفالي المستقبلين كثير كويس ويكونوا صالحين مثلي انا واخواني وينفعو الأمة

وبعد ما يكبروا ويطلعو ويشقوا طرقهم الخاصة
رح أتفرغ لهدفي الثاني والي هو كلو لله
وان شاءالله رح اتفرغلو مزبوط


في امان الله

 

[A S T E R]

تدوينة اليوم
تعليق على تدوينة خيي @C A R B O N

فهنـــا نتعلم من هالموقف عدة دروس ،،
طبعا المثل الي يقول طرار ويتشرط انطبق على هالشخص ،، الطرار بمعنى الشحات الي يطلب او المتسول ،،
والدرس الثاني انه فية ناس وقاحين راح يواجهونكم في حياتكم وفوق شينهم قواة عينهم نفس مايقولوا ،،
فلا تصيروا طيبين بزيادة عشان ماتندموا وبس ،،

الوقاحة ،،

من اول ما قرأت تدوينتك وعجبتني كثير خيو كاربون وكنت رح أعلق بقسم التعليقات
بس قررت أخصصلها تدوينة خاصة وأحكي معك عن الوقاحة ..

بس تعرف ،، جد معك حق بكل كلمة تقولها
ومن اول ما قرأت العنوان عرفت عن شو رح تحكي ،
لأنه - وللأسف - محاطة ببعض الناس الوقحين

وهاد الانسان الي حكيت عنو وصار الموقف بينك وبينه
جد قمة في الوقاحة ، انا استفزني ، يعني مش هيك الحياة يا اخي ههه
بس بنفس الوقت ما استغربت ، فيه ناس جد قمة قمة في الوقاحة وفش عندهم ولا شرش حيا بالمرة

وبتصرفو معاك وكأنكم تعرفو بعض زمان ويتصرف بقلة ادب ووقاحة وتدخل !
يعني مثلا عنا احنا جارة ، انا الصراحة شايفتها كثير قليلة ذوق وعندها وقاحة وللأسف ناقلتها لبناتها
وبتعمل تصرفات هي وبناتها ،، تأذي الجيران حواليها وما يهمها!
يعني عادي انا فش بيني وبينها علاقة غير سلام عليكم وبس
تيجي تفتح باب بيتها وما تكون لابسة زي العالم والناس ..ليش يا ترى؟
بس عشان تشوف مين مرق ومين راح ومين اجا على هاد البيت
وشو جاب ابن عمي لبيتو
وبس تطلع مرت ابن عمي من بيتها - هي يعني سلفتي -
تطلع تقعد تسأل فيها عادي وين طالعة وشو بتعملو ببيتكم وشو بتسوو
وليش ابنك هيك

يا جماعة فش حد بمر عن باب بيتها وما بتشوفو..
تفتح باب بيتها بس من اجل تشوف واذا هالشخص تقدر تحكي معاه ومعطيها وجه .. بتطلع وتقعد تحقق معاه !!
ياخي شو هالوقاحة..انا هاي بشوفها قمة الوقاحة ..تتبع اخبار وعورات الناس
هيك أخرى ع الملأ وما تستحي انو الواحد ينتبه عليها

انا الصراحة ما تتجرأ تحكي معي او تسألني أي سؤال
ليش..لاني قوية كثير وفارضة حالي وبتعرف ما رح جاوب
مرة وحدة حاولت معي وما جاوبتها وبينت على وجهي اني تضايقت من سؤالها وحرمت تسأل من بعدها ..بتسأل حماتي أحيانا اذا كنت طالعة وكانت مع حماتي واقفة ههههه فش فايدة منها
مش عارفة شو بتستفيد

سلفتي للأسف شخصيتها مو قوية وبتخجل كثير من الناس،،
وهي دايما تشكي منها ومتضايقة من تصرفاتها بس بنفس الوقت ما تعرف تاخد موقف هههه دايما اشجعها تاخد موقف وما تهتم وما تجاوب بس خلص هي بتقدرش ...



أو مثلا مثلا فيه ناس بس يفوتو يشترو من محلات مواد تموينية
- دار عمي عندهم محل ..قصدي دار حماي-
وخالي كمان عندو محل

على لسان خالي بقول انو مرة وحدة فاتت محل تشتري
والزلمة شايفها شو بتاخد وشو بتحط
وشافها اخذت غرض ..اه تايد حجم كبير
المهم بس اجت بدها تحاسب
اجا بدو يحسبلها التايد ..الا هي احزروا شو بتحكي للبياع
بتقولو لا هاد كيس التايد جبتو معي..احسبلي باقي الاغراض
صار يناقش فيها ويقولها يا بنت الناس مني شايفك اخذتيه وكذا
وحاول يناقشها وهي أبدا ...واجت بدها تعملو مشكلة وتحط الحق عليه يا جماعة

شايفين وقاااحتها ..شو هالناس هاي
الزلمة حلف 100 يمين انو شافها بعيونو اخذتو من عندو
وهيك على عينك يا تاجر بدي اسرقك
وراحت اخذتو طبعا..الزلمة اختصر الشر ..لأنو معروف عنه عاقل ودين كثير -هو بكون صحبة خالي -
وصار يقولنا خالي ملااان في هيك اشكال عادي بسرقو عينك عينك وما بهمهم
شو هاد؟ ..اما عالم جد وقحة
وخصوصي النسوان بقولو ياالله شو بسرقن ولأ بحطين الحق ع البياع وبعملن حالهن مظلومات هههه والله جد في نسوان كيدهن عظيم

وعمي برضو بقول ياما ناس وقحين بيجو يشترو من عندنا ويحاولو يسرقو قدام عيوننا

وياما رح نشوف برضو ناس وقحين

بس جد همي كثار ولازم الواحد يواجههم بالطريقة القوية
مو شرط تكون وقح مثلهم ..لا عادي افرض شخصيتك بكلامك واختصارك إلهم وخلص
ولا تتنازل عن حقك اكيد
يعني انا الصراحة مش مع البياع يلي تنازل للمرا..بعرف انو عشان لا تفضحو ..كانت حتفضحو وتخلي الحق عليه وانو بتهمها !!

بس خلص هي سبحان الله شخصيات ونفسيات تختلف وكل واحد بتصرف مع المواقف من منظورو الخاص وحسب شخصيته


وبس هيك ..سلمت اناملك خيو كاربون على تدوينتك

يسلمووووو للغالية كارين على الطقم الجديد ، كثير حبيتو ..مزوئة
حبيت اصير اغير طقم المدونة مع بداية كل صفحة