فخر المدونين Make Some NOISE (2 زائر)

[Selene]

-



#تدوينة فعالية المجتمع الشهرية




هلأ حابة شارككم احلامي و طموحاتي بس بالاول خلونا نحكي عن الفرق بين الحلم و الطموح من وجهة نظري الحلم الشي الي مستحيل يصير او شي من الصعب جدا جدا انو يصير لانو اغلبها بكون تخيلات بالعقل بدون العمل على هالشي اما الطموح ف هو الشي الي بيتحقق نتيجة تعب و جهد هالشخص . ف بمختصر هالكلام الأحلام بالغالب بتكون اكتر من الطموح لأنها اسهل انو الواحد يتخيلها من انو يحققها .

ف رح احكيلكم حلم من احلامي دام انو الاحلام ببلاش و لا تضحكوا منها . حلمي اني حِب حٌب صادق تخيلوا هاد حلمي اي والله لأني حسيت هالشي صار نادر و منقرض بمعنى اخر . هيك شخص يهتم من قلبو و يغار مع انو كتير بنات كانوا يعانوا من موضوع الغيرة ايه انا ما عشتو و ما حسيت فيه ولا شي . هالشي بالنسبة الي كان حلم وما زال و للأسف انا ذوقي بالشباب صعب و هاد حتى لو لقيت واحد عجبني انا صعبة ومو سهلة من ناحية هالموضوع ف كل الموضوع داخل ببعضو

و كان حلم من احلامي اني اخد جائزة نوبل بالسيارات اي بأي شي بخص السيارات من عشقي الهم و فتحت هالموضوع مع اخي الكبير و ما ضحك علي او انصدم من كلامي بالعكس شجعني و حكالي في كتير ناس كانوا نفسي و ضحكوا عليهم الناس و اخدوها بالاخر و حكالي طرق كيف باخدها و هيك . هاد بحسو حلم لاني عنجد حلم هههههههههههه يمكن يتحقق لما اتخرج و صير بالحياة العملية محدا بيعرف .

و من طموحاتي عندي اكتر من طموح لأني انسانة واقعية و ما بحب كون بعالم الأحلام ف طموحاتي اكتر من احلامي . عندي طموحات كتير . عندي طموح قريب و بعيد المدى . القريب اني اتقن اللغة الألمانية و اني اتطور بالرسم و التصميم لأنهم اختصاصي الدراسي و هواية بنفس الوقت .

طموحي التاني و الي هو بعيد المدى اني اتخرج هندسة ديكور و الأحلى بالدراسة الالمانية انو عندهم هندسة الديكور هندسة مو تصميم ك باقي الدول بتعتبرها تصميم Interior design مو interior architect الي هي هندسة معمارية عنا هون مندرس هندسة عامة بعدين منتخصص يعني لما اتخرج بقدر صمم مباني خارجية و الداخلية من ناحية الديكور ف هالشي كتير فرحني و فينكن تحكوا اني حمدت ربي اني ما تخرجت بالامارات لاني كنت رح صير هون مصممة مو مهندسة . ف هاد طموحي التاني




اما التالت ف هو افتح مشروع احلامي الي كنت احلم فيه من لما كنت صف سادس . من وانا صف سادس
و كنت بعشق السيارات و كبرت و كبر حبها بقلبي و مع حبي و عشقي للفنون و الرسم صاروا جزء من شخصيتي
ف حلمي هو افتح كراج للرسم ع السيارات هاد كان اول طموحي بعدين تطور و صار اني صمم هياكل للسيارات
متل شركة HAMANN مشهورة بتصميم هياكل السيارات او بالمسمى الصحيح تبعها body kit للسيارة و عشقت
هالشي لما شفت اديش هالمجال ضخم و كبير و خاصتا انو تصميم الكتات بتبلش ببرامج التصميم و هي شغلتي
و بلشت اتعلم ع اللاستريتور و بالإمارات كان عندي دكتور لمادة الفوتوشوب حكيتلو عن هالشي و انصدم من
الي ببالي و ساعدني و شجعني ع هالشي ف بإذن الله الا ما يتحقق بيوم .

و ليش كان طموحي كراج ؟ لاني بالامارات عاشرت اصحاب الكراجات شخصياَ و كنت شوف كيف شغلهم و الكراج
يشارك بمسابقات ع مستوى الخليج العربي و يفوز و من هالكراجات كراج ستريت فايتر مشهور بالامارات و تحديدا
بدبي . ف صاحب هالكراج كان بمثابة حافز الي اني كمل طموحي .

و اخر طموح الي خلص رح فككم . و بالنسبة الي احلى طموح اني كون مستقلة و مو معتمدة ع حدا ف كانت
فكرة هالمشروع الأساسية مشان هو الي يشيلني بكبري . و اني يكون معي معاش يخليني لما روح ع اي مطعم ما اتطلع ع السعر بدي اوصل لمرحلة اني اطلب اي شي بدون لا فكر بالسعر < مو تبذير بس هاد معناه اني بدي اشتغل كتير لحتى اوصل لهل المرحلة . و يكون عندي بيت لحالي طبعا السكنة لحال مو سهلة ابدا و مو فلة و واو تراها صعبة . و من طموحي اني اتحمل المسؤوليات و حس اني مهمة لو ما سويت هيك رح يصير هيك . و الطموح المعنوي اصعب من المادي لاني بدو شغل كتير .


شكرا SKY NET على هالفعالية الجميلة ذكرتني بكتير اشياء ايجابية بحياتي


​

 

[Selene]

-

? Am I alive ? or Am I just breathing
I can't tell the difference between fantasy and actuality
when it's in my head and what the medicine clears
? Am I alive ? or Am I just breathing

Germany | saarbrücken -


بتسدئوا انو هالجملة Alive or just Breathing اول ما شفتها ضليت فكر فيها وقت طويل
لدرجة كتير دخلت مخي و اول مرة هيك جملة بتخليني فكر بمعانيها متل هالجملة انت حي ولا بس عم تتنفس ؟
جملة عميقة و كانت حياتي ضايعة لحتى قرأت هالجملة . ما كنت اعرف الفرق بين الي عايش ولا الي بس عم يتنفس
و الله الحياة عميقة و محتاجة كتير تفكير حتى بأبسط الكلمات ما كنت متخيلة ممكن توصل فيني لهل الدرجة !

كنت بيوم من الايام عايشة و ما احلاني . فرحانة كتير و كل شي عندي اكتر مما اي حدا بيتصور ! كل حياة
الرفاهية الدلع الطلعات الرفقات كان كل شي عندي كنت بقمة مرحلة التعايش عندي لحتى بيوم و ليلة ولحد هلأ
مو متخيلة كيف ممكن الحال ينقلب من انسانة طموحة متفائلة سعيدة عندها اصدقائها الي بحبوها و يخافوا
عليها الى انسانة وحيدة حزينة منحبطة في بعض الاوقات . ما بعرف شو الي سويتو الي كان خطأ فادح الي
الله عاقبني عليه مشانو ! مع اني ما كنت شريرة او حاقدة . الكل ظلمني و قبل ما اتهجم ع حدا الكل تهجم
علي الكل كان يحمل بقلبو ضدي شي مو منيح و انا كنت قطرة مي صافية لحتى هن عكروها .

ياااااه اديش اشتقت لزينة البريئة و الي ماشية على نياتها الانسانة الي كانت حياتها بسيطة ابسط من
ما بتتصور ! كانت ابسطت الأشياء تفرحني ك اغنية ك شوفة حدا ك رسمة رسمتها . . كانت علاقاتي مع الناس
بسيطة كتير و بعيدة كل البعد عن الخبث و الكذب و التعقيد كنت انسانة جدا واضحة و ما كنت اعرف ليش هالعالم كانوا
يتخبوا ورا قناع الكذب و الخداع ؟ و لحد هلأ ما عرفت ! هل الخطأ مني اني كنت كتير واضحة لدرجة الي قدامي
يكذب علي ؟ ولا الخطأ من الي عاشرتهم ؟ الموضوع عم يوجعني لدرجة البكي ! و مع هيك من زمان بطلت ابكي
و لما كون كتير محتاجة ابكي عيوني صارت تخذلني ! حتى عيوني ؟ انا بدي ابكي . . ابكي ع كل شي بتعرفوا ليش ؟
لأنو حياتي صارت كلها كلها ذكريات وين ما بروح يمين يسار كلها ذكريات . و الذكريات بتاكل الشخص و هو عايش
و خاصتاَ لو كانت سعيدة لأنها بتحزن اكتر من الذكريات السيئة الي راحت . السعيدة الواحد بيتمنى انها ترجع بس السيئة لأ .
مشتاقة لكتير اشخاص عاشرتهم و كنت ناديهم عيلتي ! لأني كنت عايشة بدون امي ف كنت دائما دور ع بديل للحنان
الي كنت فاقدتو بهديك المرحلة . اشتقت لزينة الي ما تخلي اي حدا يجرحها بس و الله العظيم ثقل هالشي ع قلبي !

الفرق بين الي عايش و الي بس عم يتنفس الي بس عم بتنفس بفكر بكل صغيرة و كبيرة و بيتوتر ع ابسط الأشياء
و بيحسب كل خطوة قبل ما بيخطيها و بحاسب حالو اذا سوا اي خطأ بسيط او تافه . ما بيستمتع باللحظة بكون مشتت بالاشياء
التافهة البسيطة التانية و عم بضيع من عمرو وقت و ايام هباءاَ منثورا بدل لا يستمتع فيها و يشتغل باليوم الي الله عطاه
ياه ك هدية و يحصد نتائج عمله تاني يوم .

اما الي عايش ف هو الي بجن و الي بخاطر و بروح للمجهول بكل شجاعةة و تحدي و روحه مفعمة بالحيوية لأنيه ما
بفكر مليون مرة قبل ما يخطو اي خطوة . بحب من كل قلبو بدون ما يفكر انا يمكن انجرح , انا يمكن انكسر . لا بالعكس !
هالشخص الي عايش براهن بكل شي غالي عليه مشان هالشي و هالشخص انا بسميه انو هو عايش . عايش لأنيه عم
يستمتع بكل لحظة . الحب و الفرح و بيجتهد حتى لو كان بيعرف انو شغلو مارح يودي ولا رح يجيب و مع هيك بضل بحاول .
المحاولة هي نوع من انواع مرحلة التعايش و كتير مهمة بأنك تكون عايش .

ف انا بصراحة ماعدت اعرف اني انا من اي نوع ؟ كنت بيوم من الايام من النوع التاني بس هلأ عنجد بطلت اعرف انا
من اي نوع . اذا ضليت على هالحالة رح اتحول على مرحلة عايشة بس عم بتنفس و مو حابة كون هيك متل سجن لأنو
الناس الي متلي الي مفعمين بالحيوية وفيهم فضول ليستكشفوا كل ش يجديد و محبين للحياة و فجأة انطفت هالشمعة
من حياتهم ف رح يضيعوا . لا رح يعرفوا يتعايشوا ع المرحلة الاولى ولا هن من المرحلة التانية . بس هيك واقفين بالنص !

ف صدقاَ هل انا عايشة ؟ ولا بس عم بتنفس ؟
و انتوا جاوبوني هل انتوا عايشين ولا بس عم تتنفسوا ؟​

 

[Selene]

-​

​

​

​

​

​

Teach me how to let go of things not meant for me​

علمني كيف أترك الأشياء بسلام التي لم تعد تعني لي .​

​

2016 United Arab Emirates |Dubai Art​

​

أشياء ادركتها في 2018\2019 :​

​

1. إذا خشيت السقوط : اقفز​

2. لا تثق بنصائح الآخرين بعد كلمة : سمعت​

3. التجاهل ليس حل و التناسي جريمة بحق النفس​

4. لا تتوقع الأفضل منهم الا امك ​

5. تجارب الآخرين قد لا تناسب طريقتك و لا تهمك​

6. استقامة الحياة نوع من انواع الاعوجاج​

7. التعاسة جزء من مهمة التعايش​

8. اترك بينك و بين نفسك مسافة للعودة​

9. تمسك جيداَ بالأصدقاء القٌدامى​

10. مواجهة الأخطاء اعظم مصحة نفسية​

11. وجه العمر يحتمل أكثر من صفعة​

12. رضى الناس هو الوجه الآخر للمستحيل​

13. تظاهرك بالقوة مشنقة بطيئة​

14. التبرير جزء من فوهة البركان​

15. لا تنتظر​

16. ارتبط بنفسك قبل ان ترتبط بإنسان اخر​

17. عندما تكون خياراتك كثيرة لا تبحث عن الأسهل​

18. رهانك على الانتصار خطوة اولى نحوه​

19. التعب مرآة الحياة​

20, لا تتوقف لا تتوقف لا تتوقف​

​

​

 

[Selene]

-











^ صور فريش صورتهم اليوم المغرب قبل العاصفة من شباك صالتنا .


يا جمااااعة جايتكم من قلب الحدث الدنيا عم ترعد و تبرق و الشجر عم يروح شمال و يمين
و عم بطلع صوتو و الصوت كتير حلو وكل هاد لأنو في عاصفة اليوم ههههههههه صح انو شي مو حلو
بس حاسة في اكشن لأني من زمان ما شفت عاصفة و خاصتاَ بمنطقة طبيعية ع3 و كاتبين اليوم بموقع
المواصلات الرئيسي بألمانيا انو في رحلات رح تنلغى . ياريت لو فيني صورلكم بس للأسف بليل و الموبايل
ما بصور بموضوح . بس هلأأ صورتلكم فديو مشان تسمعوا صوت الرعد و المطر اديشو حلو

و معلومة حلوة انو هون بيقطعوا كل الشجر الي قريبة من سكك القطارات مشان لو صدفت عاصفة متل هي
ما يكسر الشجر و ينقلب للسكة و هيك و هون لدرجة كتير كبيرة بخافوا ع الروح ف لو في عاصفة دايركت بيلغوها
مو انو بخلوها و بخلوا القطار يمشي شوي شوي لا بيلغوها نهائيا . ف والله العظيم ما بكذب عليكم كاتبين ع الموقع
من العصر انو في عاصفة و رح نتلغى بعض الرحلات و انا ما سدئت فكرت الموقع سكران طلع عنجد هن عندن
طاقم بس بينتبه لحالة الطقس . تخيلوا من العصر مع انو العصر كان الجو بجنننن و هادي و فجأة صارت عاصفة و
انا هيك خيييبة كيف عرفوا بهل السرعة . حتى موقع الطقس الي بكون بالأيفون ما بكون كتير دقيق يعني كتير
مرات بكون ماشية عليه ع اساس مافي مطر و بكون لابسة لبس انو مافي مطر و فجأة ما بشوفا الا و مطرت .
يعني هن عنجد عندن اجهزة تانية غير المواقع العادية للطقس .

و اديش تمنيت تكون العاصفة الصبح مشان ينلغى الكورس لانو مافي قطارات بس على حظي كل عاصفة بتجي
بليل . يا ايتها العاصفة ترا انتي فاهمة الموضوع خطأ ترا في عواصف بتطلع الصبح لا تكوني خجلانة و ورجينا
بدائعك و الغيلنا الكورس شي يوم بس سبحان الله هو هيك دائما ان كان هون ولا بالامارات مافي ولا
حتى حاول اني مرة عطل بس مشان حالة الجو .

المهم اني انا محتارة بفعالية الاسبوعية تبع مجتمع المدونين . ياخي ليش يا @SKY NET اخترت هيك فعالية
صعبة هلأ من وين جيبلك موقف صار معي بأسبوع ؟ كان المفروض تقلبهم الشهري يصير اسبوعي
لأنو صعب لاقي موقف ب اسبوع و مابدي ضيف بهارات مشان حط اكشن للسالفة و اخرتها رح تطلع سخيفة
اذا ما شاركت لا تزعل لاني ما بحب اكتب شي من افى ايدي ( تعبير سوري ) و مابدي اكتب عن
موقف سخيف بس مشان شارك . هلأ انا عندي موقف بس قصير يعني حاسة مو مستاهل اكتبو لانو رح
يطلع سطرين الا اذا حطيت بهارات .



هالتدوينة بتاريخ 5.6.2019 مشان لما ارجعلها بعد سنة اعرف انو بهل التاريخ كان في عاصفة ​

 

[Selene]

-



وجهكم عنجد خير علي ???



حاطين انو الرحلات رح تلتغى او تتأخر بسبب سقوط
شجرة على مسار مدينتي للمدينة الي رح روح عليها ?

حكيتلكم مارح تعدي ع خير اليوم ???❤​

 

[Selene]

-​

​

​

​

​

​

​

​

الجمال ليس الشعر الطويل و الساقين النحيفتين ،​

والجلد المُسمَر أو الأسنان المثالية , صدقني . .​

​

الجمال هو وجه الذي بكى و يبتسم الآن . ​

الجمال هو ندبة على ركبتك عندما كنت تسقط عندما كنت طفلا . ​

الجمال هو الدوار عند الحب الذي لا يسمح لك بالنوم .​

الجمال هو التعبير على وجهك عندما كنت تستقيظ من المنبه في صباح الباكر .​

الجمال هي الضحكة عندما تقول نكتة وانت الوحيد الذي يفهمها . ​

الجمال هو عندما كنت أبكي على كل ما هو عظيم .​

الجمال هو خطوط تميزت بالوقت . ​

الجمال هو ما نشعر به في الداخل والذي يظهر أيضا خارجنا .​

الجمال هو علامات تترك الحياة علينا .​

​

الجمال هو السماح لنفسك بالعيش ​

 

[Selene]

-


#تدوينة فعالية المجتمع الاسبوعية


اليوم صار معي موقف و الحمد الله انو خلص مو مسدئة حتى حاسة راسي رح ينفجر من البرد . والله الجو هلأ شي
بجيب المرض كتير اوفر بصراحة الصبح بكون حر وشمس و العصر بتصير عواصف و مطر و برد مو طبيعي
و اليوم ع اساس انو حر و هيك لبست بلوزة نوعا ما مفتوحة المهم انها خفيفة ع اساس انها بلوزة صيف المهم
ف بعد ما خلصت كورس و رجعت ع البيت و انا بالقطار فجأة ما بشوف غير القطار وقف . و انا هيم 0.0 يا ساتر يارب
شو صاير و طبعا كنت حاطة السماعات بداني و ما كنت اسمع الي برا ف كان عم يحكي المايكريفون انو في شجرة
وقعت ع السكة ف رح نوقف لبين مايشيلوها < انا مابعرف شو قصتهم مع الأشجار المهم توقيت قطاري بكون
ع نفس موعد الباص الي بروح لمدينتي يعني القطار بيوصل على ال 21 دقيقة و الباص بيتحرك على ال 24 دقيقة
ف مو القطار وقف ؟ و راح الوقت و هيك ف راح علي الباص لأنو القطار لبين ما وصل المدينة الرئيسية كان الباص
رايح . المهم ف لأني اليوم في هوا قوي متكنسلة المحطات ف هيك مافيني روح ع البيت لا بالباص ولا بالقطار
و لا حتى تكسي لانو ما كان في حدا . و انا تعباااانة و ماني فطرانة ولا متغداية . المهم ف اضطريت امشي من المحطة
الرئيسية للمدينة لبيتي مشي و الله رجلي واوا و راسي صار يوووجع لانو شعري مفتوح و الهوا بارد و عم يضرب ب
راسي وصلت ع البيت راسي عم يعمل هيك صصوووووووصوووووووصوووو و حتى لما وصلت ما بدلت تيابي
رحت غسلت ايدي و اكلت من كتر ماني جوعانة كانت ماما مسوية فطاير لحمة و فليفلة حمرة
و هلأ ما بعرف شو رح اعمل مع هالوجع الراس الي مو طبيعي . كنت متعودة دائما بعد الكورس سوي شيشة و اقعد
الا هلأ حتى عيوني مو قادرة افتحها :/

. . . . . . . . . . . . . . . . . . . . . . . . . . . . . . . . . . .

المهم اليوم كان الصف عم يقترح نسوي طلعة ع النهر قبل عطلة الصيف الطويلة لا و الي بضحك الاستاذ
سألنا انو شو بتفضلوا تاخدوا درس ولا نطلع ع النهر ؟ DAAAAH اكييد نروح ع النهر و فينا نشوي
و نجيب شيشة < اهم شي الشيشة صايرة ادمان و نجيب العاب متل شدة و تنس و اكل لا و الي بضحك في واحد معنا
بالكورس مانو منفتح ع العالم الخارجي ف عندو كلمة الكحول غريبة عليه ( متعلما جديد شكلو ) و 24 ساعة شو ما
حكينا بيحكي طيب فينا نجيب كحول ؟ و انا بموت بضحك عليه مع انو هو مالو علاقة بهل الامور بس
هيك يا كحول او غولف مع انو اصلا الغولف مو اي حدا بيلعبا بس هيك بيعمل حالو غبي و اذا الاستاذ سأل
سؤال بشكل عام بنط هاد و بحكي غوووووولف متتتتت و الاستاذ بينحول ؟ غولف ؟ و هو بفكر
شو دخل الغولف بالي حكيتو

المهم عطلة الصيف قربت و عم فكر روح مكان برا مقاطعتي لاني مليت منها عم فكر روح ع ميونخ او هامبورغ
ميونخ لانها تعتبر دبي المانيا و هامبورغ لانو فيا بحر و نفسي اسبح من زمان ما اخدت فيتامين البحر
و هاد غير عندي قرايبين هنيك ف عنجد عم فكر روح لهنيك بس لسا مابعرف

و هيك بكون خلصت يومياتي لليوم الي مابعرف شو احكيلكم عنها متل هم قلبي
نراكم في تدوينات اخرى مع السلامة يا حمامة



​

 

[Selene]

-

اخدت اختبار تحديد الشخصية الي من مدونة سكاي مع اني ما بسدء هالمواقع ما بتكون كتير دقيقة \
بس صدمتني بالنتائج النهائية بدكن الصراحة

اخدت اختبار من موقعين و كانت النتائج كتير متقاربة . اول موقع كانت النتيجة فنان المبدع :




كنت أريد أن أعيش الحياة، حياة مختلفة. لم أكن أريد أن أذهب إلى نفس المكان كل يوم وأن أرى نفس الناس
وأقوم بنفس الأعمال. أردت تحديات مثيرة للاهتمام.

^ الله الله كأنهم دخلوا قلبي و كتبوا هالكلام .

كن جريئاً واختلف

^ كانت مقولتي من و انا صغيرة بكككل شي و ما كنت حب انقل لا بمواضيع ولا حتى ب ستايلاتي
ان كان بألوان الشعر للبس .

نقاط القوة بشخصية الفنان المبدع :

متفائل وحيوي = مو دائما متفائلة بدكن الصراحة
مبدعة و عملية = صحيح
عفوية و عقلانية = كتييير صحيحة
معرفة كيفية تحديد الأولويات = هي النقطة اكتسبتها من تجاربي

نقاط الضعف :

عنيد = دقيقة اضحك هالشي 100%
غير حساس = مابعرف هالشي ليش كاتبينو كيف مبدع و غير حساس ما بتزبط مع بعض
و كمان مع تحليل الشخصية التاني كمان مو حساس لا اله الا الله ليش هيك بس انا حساسة كتير
بس بحاول اخفي نقطة ضعفي عن الكل < يمكن هاد السبب .

خاص و محفوظ = بمعنى انو صعب انو الواحد يتعرف علي هالشي نوعاَ ما صحيح بس مو دائماَ
بمل بسرعة = مليون بالمية مشان هيك سموني المزاجية .
سلوك المخاطر = هالشي كمان كان مكتوب بالتحليل التاني و صحيح .





تاني موقع كانت النتيجة المخترع ( هنا ) وكانت كتير متقاربة من الاولى

بعض من الاشياء الي كانت مكتوبة و لفتت نظري :

يمكن أن يقال عن المخترع أنه شخصية الأفكار المبدعة والجديدة، فهو يرى فرص وحلول في كل شيء من حوله. وأيضاً هو يملك القدرة والحماس على نشر هذه الأفكار ونقل حماسه لها للناس من حوله. بهذه الطريقة يستحوذ المخترع على الدعم لتحقيق أحلامه وأفكاره.

^ كنت دائما عندي هالروح الي انشر كل شي بحبو او اي شي ايجابي للناس التانيين و كنت لاقي لكل مشكلة
حلها حتى لو كانت معقدة


عندما يكون المخترع تحت ضغط، يفقد المخترع قدرته على توليد حلول وخيارات بديلة .

^ هل شي صحيح 100% و اعتبرها اكبر نقطة ضعف فيني .

على الرغم من أن المخترع يتوافق مع الكثير من الناس، إلا أنه يحيط نفسه بعدد بسيط من الناس صاحبي التفكير الناضج، والقادرين.

^ سبق و كتبتها بمدونتي اني بقدر يكون عندي كتير اصدقاء بس بحب يكون حولي بس كم من صديق
بيشبه طريقة تفكيري .

نقاط القوة :

من الممكن أن يكون جذاباً جداً.

^ و مشان مزاجيتي مرات كتير ما بحب كون هيك

يولي إهتمام بالغ بتطوير نفسه وبتطوير علاقاته الشخصية.

^ هالشي صحيح و كنت دائما افتح ع مقالات طرق تطوير الشخصية و كيف جعلها قوية .

غالباً ما يكون ذو قدرة جيدة على تحصيل المال ولكنه ليس جيداً في التعامل مع المال وإدارته.

^ صحيحة و مشان هيك هالسنة رح ادخل ب اكبر تحدي عن كيف بقدر اتحكم بصرفي

يأخذ علاقاته الخاصة بشكل جدي.

^ للأسف بس صحيحة مشان هيك كنت اخسر الأغلب بس هاد ما حسيتو خطأ
لأني انسانة ما بحب العب و ضيع وقت بالعلاقات يعني يا تكون منيحة يا بلاها

نقاط الضعف :

دائماً يكون ولعاً بالأشياء الجديدة، قد يكون هذا على حساب نجاحه الشخصي أو علاقاته.

^ والله صحيحة و بقووووة كنت دائما روح للأشياء الي بتجذبني حتى لو على حساب
جامعتي كنت شوف سعادتي على حساب اهم الاشياء بحياتي و هاد كان اكبر خطأ

مخاطر لدرجة كبيرة

^ كلمة كبيرة قليلة فيني كتير بحب المخاطرات و المغامرات بس بالعقل مابحب كون متهورة بغباء

صفات المخترع :

قائد بطبيعته، ولكنه لا يرغب بالتحكم بالناس.

^ هاد الي حاولت اقنع حالي فيه و خاصتاَ اني من برج الاسد الي وجعوا راسي فيه
عندي صفات اني كون قائدة و قوة شخصية بس صدقاَ مابحب اني اتحكم بحدا او حتى اني
افرض رأيي لشخص .

حي ونشيط، يمكنه بث الحماس في الناس.

^ من هالناحية صحيحة مية بالمية خاصتاَ لو شي بحبو من طريقة كلامي الفرحة بتدخل قلب
الشخص الي عم بحكي معو .

الأعمال التي تناسب المخترع :

انسوا كل الي انكتب بالموقع و ركزا على مهندس
يا جماعة مهندسسس . مو مسدئة يعني رح امشي بالتخصص هاد مع انو صعب مو ؟

تعزيز نقاط قوة المخترع :

رؤية الجانب الآخر من أي مشكلة.

^ كنت من و انا صغيرة رفقاتي يجوا لعندي كانوا يسموني حلالة المشاكل
كنت دائما شوف اي مسكلة من اكتر من جهة مو من جهة وحدة و هالشي الي حببني بعلم النفس .


القدرة على العمل على أكثر من مشروع ومهمة في الوقت ذاته.

^ الله يخليلي الجامعة و المدرسة الي خلت هالطبع فيني لحد هلأ
حتى لو انتبهتوا بنزل اكتر من موضوع بالاسبوع و كلهم منسقين و افكارهم مدروسة نوعا ما
بحب كتير اشتغل ع اكتر من شغلة بنفس الوقت . و مرات قليلة اذا كان عندي مشروع ضخم
ف هاد بشتغل عليه لحالو متلاَ موضوع ختم الاداري الي اخدتو هالموضوع كان هو بس الي
عم بشتغل عليه كنت حاطة كل طاقتي عليه عدى عن ذلك ف ايه اكتر من شغلة بنفس الوقت

قدرة على المواجهة في النقاش أو النقاش لوحده ودون أي دعم ومساندة.

^ طبعا اذا شي عندي خلفية عنو . اذا شي بعرفو و متأكدة من معلوماتي مابدي اي مساعدة من حدى
و بقدر اثبت وجهة نظري عن طريق العلم الي اغلب المناقشين بيفتقدوا هالنعصر لأنو اغلبهم بناقشوا
على حسب مبادئهم و الاشياء الي تعلموها و هن صغار و ما كانت صح .

مشاكل متوقعة لدى المخترع :

عدم القدرة على رؤية الاحتياجات العاطفية والإجتماعية للأشخاص القريبين منه.

^ كنت بيوم من الايام عاطفية و بهتم لهل الشي بس مابعرف التجارب الي مريت فيها غيرتني صرت
اهتم اكتر للمنطق من اكتر من المشاعر و للنتائج النهائية اكتر .

الميل لأن يكون متعجرفاً أو متغطرساً، والحط من قدر الأشخاص الذين لا يتفقون معه على الحلول.

^ عاد هي خطأ 100% انا من النوع الي بحب غير مبادئي اذا ما كانت صحيحة لأنو اي شخص معرض
للخطأ و انا انسانة متفتحة و بتقبل كل الآراء و خاصتاَ الانتقادات لانها هي الي رح تحسني .
و اصلا من طبعي ما بحب شوفة الحال و التكبر بغض النظر ع الباقي .

النصائح العشرة للنجاح كمخترع :

واجه نقاط ضعفك!

^ انا انسانة كتير واقعية من و انا صغيرة كنت كتير صارح حالي بصفاتي السيئة
و حاول اني اتفاداها او اني خففها . و كنت اقرأ عن الشخصيات الناجحة و منها انو نواجه اخطائنا
او نقاط ضعفنا و هالشي من صفات الشخصية القوية .

تحدث عن أفكارك!

^ كنت حب احكي عن افكاري فقط للأشخاص الي بحس اني مهمة عندهم و بتهمهم افكاري
متل اهلي بالمرتبة الاولى و رفقاتي القريبين مني . اما كل من هب و دب لا لاني بحس حالي تافهة و افكاري كمان

اخرج من المنطقة المألوفة لديك!

^ اعتقد قصدهم اطلع برا دائرة الراحة عندي . و هالشي ماشية عليه بالميلي كل شي بسويه جديد و غير مألوف
و بحب التغيير و اني اتعلم اشياء جديدة و غريبة علي ان كان بالرياضات دائما بتعلم الرياضات الصعبة و الغريبة
و بالتصميم بحب اني اتعلم فنون الصعبة و كان اكبر تحدي الي اني اتعلم فن الدمج .

تعرف على مشاعرك وعبر عنها!

^ عاد هي انا جدا جدا جدا جدا سيئة فيها ان كان مع اهلي او مع رفقاتي و ماعم حاول لاقي حل ابداا !
و للأسف كلما حاول اني احكي بزيد الطين بلة يعني ياريت لو ما حكيت . و الأهلم انو بيجي هالاحساس السيئ
و الفظييييع اني بعد ما احكي عن مشاعري بندم بعدين انو ليش حكيت !! ( اذا حدا عندو حل يساعدني )

افترض الأفضل دائماً!

^ لاني كنت بدبي و حتى اخدت من طباع حاكمها . لا اقبل الا بالمركز الأول .
بمعنى اخر ولا مرة افترضت شي سيء ان كان لمستقبلي او لحياتي هلأ . حتى العقبات الي بمر فيها هلأ
رح تعلمني بالمستقبل و تخليني اقوى فهل شي مارح يغير تفكيري من هالناحية .





خليت ماما و اخواتي ياخدوا هالتحليل طبعا على الموقع الاول بس ماما طلعلها شخصية المسلي
ما توقعت بصراحة و كان تحليل الشخصية كتير حلو و ماما حكت انو المكتوب كان صحيح
و اختي طلعلها شخصية التنفيذي و اختي انصدمت من النتائج ما توقعت بهل الدقة و عنجد لما قرأت معها
حكيتلها كتير بلبقلك تخصص الاداري Management كانت تدرس هالتخصص بالامارات يعني تخيلوا لأي
درجة هو دقيق



​

 

[Selene]

-

رجعتلكم يا جميلين طبعا لاني نادر ما يصادفني موقف احكي عنو او يوميات . بالعادة كل الايام
بتتكرر اكيد الاغلب نفسي ف حابة احكيلكم عن ماضيي الجميل .


*

لما كان عمري 17 كنت كتير حب اسمع راب عربي مع اني قبل ما كنت من محبين الاغاني العربية ابدا كان
كل ميولي للانجليزي بس بتعرفوا المراهقة و ايامها تعرفت ع واحد صدف انو هو بغني راب و هو الي
عرفني ع هل العالم ما بكذب عليكم الراب العربي حلو بس الناس الي فيه مو مناح هن الي مخلينو
وسخ بحركاتهم و كلامهم < عصبت طبعا مو الكل في ناس و النعم فيهم ولليوم فرحانة اني عرفتهم


*


المهم اني دخلت عالم الراب العربي بالمنتديات من سنة 2011 لسنة 2016 و كنت تقريبا مسجلة بأغلب منتديات
الراب وقتها , طبعا هلأ ضل موقع او تنين منهم و الباقي تسكر للأسف . واول منتدى راب تسجلت فيه كان وكر
العصفور لما دخلت المنتدى كان ما يقارب 5000 عضوية مسجلة و انصدمت من هالكم الهائل من المسجلين
ف رحت و سجلت و بلشت اتعرف ع هالعالم و اكتر منتديات كنت مشاركة فيها كان منتدى فانس راب لاني كان
المدير صديقي شخصيا ولا ما كنت دخلته < كل هالمنتديات الي ذكرتها تسكرت و راحت الذكريات


*

لما دخلت هالمجال تعلمت كتير اشياء بتخص الراب متلا كيف بقيم اداء الرابر من اغنيتو ؟
من ناحية الفلو يعني كيف بيلحق اللحن كل لحن الو طريقة غناء معينة او من ناحية قوة الكلمات و القوافي
كلما كانت القوافي صعبة او غريبة كلما كانت احلى او وضوح الصوت ما يكون اللحن طاغي ع الصوت
او قوة الهندسة الصوتية طريقة لعب الرابر بحركات الصوت و تغييرها . و اشياء اخرى . ف هل شي كتير
عطاني خبرة بهل المجال لدرجة كنت ادخل و ابدي رأيي بالرابرية و عرفت الفرق بين
الاغاني الهادفة و الدسات ك مصطلح انو الاولى تهدف لموضوع معين اما الدس بكون متل حرب كلمات
والي بكون دسو اقوى هو الي بفوز < كأنها معركة و كانت اكتر نوعية دسات كنت حبها هي
الي لما الرابر يمسخر واحد بإستخدام الكناية او التشبيه بدون سب كنت حس هالنوعية من الدسات اقوى من الدسات
الي بكون فيها سب لانو السب حسيت بنزل من مستوى الرابر و سهل اما التشبيه و الكناية اصعب ولانها بدها تفكير
و استخدام تشبيهات قوية


*

كونت صداقات كتير قوية بمجال الراب مع اغلب الي بغنوا او مع المصممين الكبار و كان في بالمنتديات نظام الروابط
بتنحط تحت عضويتي بتبين اي قروب راب بشجع وهيك و كان عنجد حلو و تحديات و خاصتا لما يعملوا مسابقات
و بطولات كان حماس . من هالناس الي كنت اعرفهم MJ شخص كتير والنعم فيه حتى عقليته مختلفة 360 درجة
عن الي بعالم الراب و Deep Raw هالانسان مبدع بحق هو لبناني الاصل ولكن مولود و عايش بالكويت انسان خلوق جداَ
و ماعليه حراكات الرابرية الماكرة الي اغلب الرابرية يتصفوا فيها اكتر شي حبيت بأغانيه انو كان يدمج الانجليزي بالعربي
بشكل كتير احترافي و عندو كم من غنية بس بالانجليزي حتى من حلاوة اغانيه ما خطر ببالي انو هو عربي الاصل
حتى لقبو حلو عرف يختاره صح .

^ تخيلوا انو هاد عربي عرفتوا سبب اعجابي فيه عنجد انو موهوب بكل شي كلمات و الاداء واختياره للالحان


*

من الرابرز الي كنت اسمعلهم اكتر شي كنت اعشق سايندروم لأنو فلسطيني و اغانيه كانت بلهجتنا بتعرفوا لهجة
السوريين و الفلسطينيين متقاربة نوعا ما ف كنت حس بسهولة اني افهم الكلام او اني غني مع الغنية عكس اذا
كانت بكلمات اماراتية . هاد غير انو هالشخص فعلا فعلا ترك بصمة بعالم الراب لحد اليوم . هاد غير انو كان
يشيب راس كل رابر خليجي و كان الكل يعملو مليون حساب اذا كان بأي بطولة يعني كان حامل اسم
بلاد الشام ككٌل وقتها و كان عندو كتير جماهير من سوريا الاردن و فلسطين


*

اكتر البومات الي من كتر ما سمعتهم حفظتهم صم البوم الشمس توقع هالالبوم دمار شامل خاصتاَ اغنيته الشمس
توقع كانت الكلمات كتير بتشبهني و قريبة من قلبي و هالانسان بيعرف كيف يوصل احساسه بكلماته و صوته .

^ اغنية الشمس توقع رهييييبة و بتعطي حماس لششخص لما يكون محبط
كتير بنصحكم تسمعوا للالبوم كل اغانيه حلوة .


*

البوم جنون و عبقرية كان البوم طفولتي فينكن تحكوا هيك كان اول البوم بسمعلو لرابر معين و كتير حلو الالبوم
يعني مافي غنية وحدة مو حلوة كل اغاني الالبوم كانت و مازالت المفضلة لدي . اغنية الليموناتي كتير عجبتني مع
انو نادر ما لاقي رابر ساكن بالامارات و بيحكي عن السياسة و اغنية حلم مدفون اغنية من عمق كلماتها بتخليك تدمع
و اغنية كيف انسى صحيح الاداء مقارنة ب اليوم كتير مختلف بس انا اكتر شي بيلفت نظري بالاغنية الكلمات و
كلماتها كتير حلوة و خاصتا مستعمل تشابيه كتير حلوة . اغنية صوت من الظلمة هي كانت فعلا شي خيااالي اعتقد
كان اخد فكرة الاغنية من ايمينيم و هي انو بكون في صوتين بالغنية صوت واحد شرير وواحد تاني و الي هو الرابر
نفسه و انو على اساس هالنفس الشريرة الي خلتو يشتهر و يصير عندو فلوس و بيوت و هيك و بيجي صوت الرابر
بيحكي لا و اتركني < حسيت اني دخلت بالجو > و بصير صوت الشر هو الي يحكي و يشرحلو . عنجد انو الاغنية كتير
حلوة خاصتا طريقة تمثيلو بالصوت بأول الاغنية بتحسسك كأنها حقيقة جد !

طبعا كتير ناس صاروا يحكولو انو هو من الليموناتي بعد ما نزل هالاغنية لأنو صوت الشر كان بمثابة صوت الليموناتي لانو
نفس الفكرة كانت . الليموناتي لحتى تدخلها و تصير منهم لازم تبيع روحك للشيطان و بعدين بيشهرك بيعطيك فلوس ف
صار حديث الموسم وقتها مع انو هو مو هيك كانت مجرد اغنية بس اشتهر من وراها بسبب هالموضوع

< المواضيع السخيفة بتشهر الواحد مع انو هو ما كان حاط ببالو انو رح يشتهر بسبب هالموضوع لانو ما كان مخططلو من الاساس


و كان سايندروم مع قروب دا السيز و كنت حب كل القروب حتى كانت عندي رسومات لما كنت 17 سنة من حبي
الهم . بعض من رسوماتي .



^ رسمة غبية بعرف بس هي قديييمة عليها غبرة لأسماء الرابرية الي كانوا ب Da Alcz
وكان لقبي وانا صغيرة COOL CAT

و كانت اغنية من اغانيهم اغنية همي مكتوم هالاغنية انتشرت انتشار واسع على اد مانها حلوة و خاصتا بارت
ثري باكو الي كان بقروبهم كان مشهور بستايل الميدوسيت الي هو يحكي مجموعة كلمات دفعة وحدة و بنفس واحد
كان يعطي روح للأغنية .

^ الفديو انا صممتو سنة 2012 لأغنية رهييييبة

هاد غير طريقة انتقائهم لاسمهم بالبطولات و كان اشهر اسم اختاروه هو 666 طبعا هاد رمز الشيطان بس كانت
حركة حلوة متل فرض هيبة و خوف للمشتركين . حتى طريقة لفظهم للاسم بالاغاني كان كتير حلو كانوا يحكوها
تلت ستات < يعني بنت كنوع من المسخرة للخصم او تربل 6 كان كتير حلو اختيار الاسم و عبقري

^ طبعا مافيني اعرضلكم غنية من اغانيهم بالبطولة لأنها اغاني دسات يعني كلام عيب و هيك


*

كنت اسمع لسلوم انجل كان عندو كم من غنية حلوة

في غنية اسمها ليالي الشوق الها اكتر من جزء بس اكتر جزء حبيتو هو الجزء التاني هي الغنية غبية تقريبا
بس لانها تحمل ذكريات طفولتي

*

و كنت اسمع لرابر قطري كان لقبو سفاح الدوحة بس للأسف اعتزل و كنت كتير حب طريقتو بالغناء و اكتر شي
كان مايل عليه هو الاغاني الرومنسية كتير حبيت طريقة كتابتو للكلمات و طريقة تشبيهو بعض مما كتب ..

ابي اتكلم عن ذيك الي بقلبي سكن حبها . . ابي اتكلم عن الي لندن ظلمت من بعدها

لاني هو كان يدرس بلندن كان اقرب شي الو ف خلى التشبيه بلندن كان عشقي الاول و الاخير وللأسف اغلب
اغانيه راحت اغلبها من اليوتيوب . .

^ كانت من اجمل اغانيه رهييييبة .

*

و مغني اسمو ريفو كان كتير رومنسي ب اغانيه كان هو مايل اكتر للكورسات من انو يغني راب كانت اغلب اغانيه
متل غناء عادي بس كانت النتيجة كتير حلوة و لحد هلأ انا عم اسمع اغنية ما اتمنى فرقاج الاغنية قديمة
من سنة 2012

^


*

من المغنيين الي عم اسمعلهم هلأ مغني كويتي اسمو VORTEX قسما بربي هالرابر مو طبيعي يخربيتو شو
انو رهيب كل غنية سمعتها الو كانت شي خرااااافي و اكتر اكتر شي عجبني فيه انو هو الي بصور فديو كليباته
عنجد بحترم هالنوعية من المواهب

من اكتر الاغاني الي حبيتها لفورتيكس :

^ الكورس رهييييييييييييب

^ اللحن رهييييب بخليك لا ارادي ترقص و الكورس حلو كتير و مضحك
مقطع فورتكس التاني .

و كان كتير يذكر كلمة دوامة ب أغانيه لاني كان اسم قروبو و حبيت طريقة ذكرها بكل اغنية من اغانيه

*

طبعا عالم الراب عالم ضخم مو صغير مارح اقدر اختصر هالعالم برد واحد بس حطيت القمة من الاغاني
و المغنيين الي حبيتهم طبعا ما بخفي عليكم راب العربي كتير تطور من 2011 ل 2019 ان كان من
نوعية الالحان او بالاداء او بفكرة الاغاني بشكل عام . صاروا الرابرية كتير متفتحين يتطلعوا ع الشغل الاجنبي
و يحاولوا يطلعوا شي حلو بالراب العربي . رابرية غنت بالانجليزي و بالعربي و الاتنين ابدعوا

و للأسف كتير خففت سماع الراب العربي لاكتر من سبب من هالاسباب اني عم حاول اعطي فرصة لباقي
انواع الاغاني اني حبها بتعرفوا اني بمسك فن معين بضل عليه لحتى مل منو

ان شاء الله تكونوا استمتعتوا معي بهل فقرة نراكم بتدوينات اخرى

​

 

[Selene]

#تدوينة فعالية المجتمع الاسبوعية





انا رح احكي عن مادتين مادة كنت حبها بالمدرسة و مادة كنت حبها بالجامعة
مع انو الاختيار صعب لاني عندي اكتر من مادة بحبها بس رح حدد بس مادتين

طبعا ما بخفي عليكم انو بالمدرسة كانت اكره المادات المادات العلمية مع اني كنت داخلة علمي
بس العتب مو علي العتب ع المدرس الي كان يخلي الطالب يشعر بالملل بمادتو لأنو بعد ما
كبرت اكتشفت انو مافي ولا مادة مملة هاد كلو يعتمد ع المعلم !

المهم كنت كتير حب الفيزيا ك فلسفة طبعا الفيزيا تعتبر فلسفة و قانون تحفظه اما الباقي فبيجي
ع تطبيقك الصحيح للرياضيات و كنت اعشق الفيزيا بكل شي لحد هلأ بحب اقرأ مواضيع عامة
بتخص الفيزياء طبعا ك ثقافة مو تطبيق و حل حسابات . هي الفيزيا بتبلش نظريات و فلسفة و بتنتهي
بالتطبيق . المهم شو ؟ المهم نفهم الفكرة العامة < متل ما بحكوا اهم شي النية

و كما ذكرت بأحد تدويناتي ( الذين يجعلون الفيزياء مملة هم مجرمون ) و عنجد هن هيك لأنو الفيزياء ممتعة لأبعد حد و وين ما التفنا رح نشوف انو الفيزيا متداخلة بحياتنا .

,*

تاني مادة الي حبيتها بالجامعة هي مادة نظرية الالوان لانها كانت جديدة علي و انا من النوع الي ما بستخدم
ايدي كتير انا شاطرة بالرسم الديجيتال اكتر من اليدوي ف كانت هالمادة تحدي الي و كنت اكرهها بشدة لما ما
يزبط معي شي . خاصتا انو هالمادة مبنية ع الشغل اليدوي الكلاس كان 5 ساعات متواصلة و بهل ال 5 ساعات
كلها شغل بالايد و هو كيف نتحكم بالألوان و الدمج و تخيلوا لو اللون ما طلع معك صح بدك تضل تعيدو لحتى يزبط
و نحن لحتى نطلع اللون الواحد منضل مندمج ساعة و اخر شي يكون خطأ و نرجع نعيد

و الي بضحك اكتر انو كل لون الو كود معين مشان يطلع مثلا الاصفر و الاحمر بيطلع برتقالي صح ؟ ف تخيلوا تدمجوا
5 او 6 الوان بمقدار معين و تطلع خطأ درجة اللون و ترجعوا تعيدوا و انتوا بالاساس نسيتوا كيف طلعتوا اللون
الأول شيب راسي هالموضوع لحتى سألت الدكتور حكالي لازم يكون عندك مذكرة صغيرة تكتبي
فيها كيف طلعتي هالالوان مع كتر الاستخدام بتصيري تحفظيها < الله عليك الله لازم اكتب بالمذكرة 3 قطرات
من الاخضر و لحسة لون من الاحمر و مجراف من اللون الابيض مع ملاحظة لا تجرفي كتير انو ها شي بسيط مشان
ما يطلع اللون فاتح كتير )

و كنت بتذكر كتير واجبات كان يعطيني ياها و عيدها 5 او 6 مرات و بكل مرة بتاخد وقت طويييل و يطلع خطأ
بسيط و ارجع عيد من اول لتزبط و من هالاعمال كيف فيني ادمج لونين مثلا الاحمر و الاخضر بتدرج لوني
من الفاتح للغامق ليطلع بالآخر لون جديد و هو 50% اخضر و 50% احمر < شايفين التعقيد



^ هي مثال ع الواجب

و من الواجبات كمان كيف فينا نجيب تدرج لوني 2 واحد احادي من مشتقات الاسود و التاني اي لون من الالوان
الاساسية مثلا الاحمر و نخليهم متساويين بالقيمة اذا صورناهم و حولنا الصورة للأبيض و الاسود و طلعت
الصورتيين نفس درجة اللون يعني شغلنا صح . متل هيك

قبل



بعد



بتعرفوا هي اديشا صعبة لتطلع ؟ لانو لو كترت شوي لون ان كان من مربع الاسود او من مربع الاحمر طلع
الشغل خطأ . و الي بجيب الجلطة انو الورق الي منستخدمو سميك ما بتقدر تحط فوق المربع الخطأ لون و
تصححوا لأنو بيتكتل اللون و بتقل جودة شغلك ف رح تضطر انك تعيد

و لازم يكون الشغل كلو نضيف لازم يكون عندك لزيق خاص بالرسم الي بكون متل الورق و نحطو ع الحواف
بعدين نشيلو و انا لما كنت حطو كان يلزق بالورقة و تنشق معي بعدين
تعلمت اني لازم اول شي حط اللزيق ع تيابي الزقو و شيل الزقو و شيل لحتى تخف حدة اللزق الي فيه و ما
يشق الورق بس بعد فوات الالوان

و لازم ريشة الرسم ما تكون مليانة لون قال شو قال الدكتور لازم تمسحوها مسح باللون مو تغوصوا فيها
و انا كنت سبحها مو بس خليها تغوص باللون لدرجة كان اللون يتكتل ع الريشة

حتى طريقة التلوين الها تكتيكلازم ما تخلي خامة اللون بارزة ع اللوحة يعني لازم تكون فلات يعني ما تكون
متكتلة ع الورقة . و انا كنت حس بلوحتيهضاب و سهول من كتر ماهو مكتل

وهاد غير انو الدكتور بريطاني و بتعرفوا انو البريطانيين اديش بيتفلسفوا بالفن ما بيسكت ابدا و مابيعجبو
شي . بدو الشغل يا احترافي او مانو حلو بنوب . طيب مو كأنو نحن عم نتعلم ؟ بس مع هيك حبيتو

ومع كل هالاشياء الي مريت فيها بهل المادة الي عنجد شيبت راسي و مع هيك كتير حبيتها علمتني كتير اشياء
بتخص الرسم ان كان بالألوان المائية او الرصاص و الفرق بين الادوات الغالية و الرخيصة بنتيجة اللوحة النهائية
بس و مع هيك لحد هلأ بحس بمعاناة فيها . او برسم المائي و خاصتاَ نوع الاكريليك لانو سمييييك و ما بروح مع المي
يعني مو متل الالوان المائية بس تحط قطرة عبت اللوحة الاكريليك اقرب للمعجون .

,*​