وهم الإنجاز (3 زائر)

[MEG]

-



مرحبا يا زهورة قلبي
كيفك ان شاء الله تكوني بتمام الصحة و السلامة

جذبتني المقدمة كتير و كيف ربطني فكرة موضوعك بمثال واقعي مريتي فيه

فكرة النقاش كتير مثيرة للاهتمام

بالنسبة الي الانجاز مانو مربوط بشي معين , و هو حرفياَ متفاوت بين شخص و تاني
شخص بشوف انو مجرد انو نام و صحة تاني يوم بصحة سلسمة يعتبر انجاز

شخص تاني بشوف هالشي تافه بالمقابل هالشخص بشوف انو لو رتب تختو اول ما يصحى انجاز

شخص تالت بشوف هالشي تافه و مانو انجاز بالمقابل هالشخص بشوف انو لو راح ع الشغل و كان يومو بسيط و سعيد انجاز

و الشخصين الاوليين بشوفوا هالشي تافه

ف بالمختصر الانجاز مالو معيار ابداَ ومالو مدى او سقف , ففينو البني ادم يخلي كذا انجاز من مختلف المستويات بحيث تصير لحياتو معنى
بنفس الوقت ما يحس انو لو ما سوى انجاز خاااارق يشوف حالو انو نكرة ما عمل شيء يذكر

و سبق و ذكرتي نقطة انو صرنا بزمن اذا الواحد ما نشر انجازو ع السوشل ميديا و الكل شافو ما بيعتبرو انجاز او انا بسميها ما بحس بالمتعة , انا معك بهل النقطة , و انا تعليقي ع هالنقطة انو هو ما عمل الانجاز لنفسو , بل للناس , لأن لو عمل هالشي لنفسو لكان حس بمتعة هالشي بدون ما ينشر و يورجي الكل انا سويت كذا . طبعاَ نشر كمرة وحدة بحس عادي بس لما الموضوع يتكرر كتيييير فهون بحس في خطأ

في انجازات حلوة لما تكون بينو و بين الشخص , هيك بحس متعتها خاصة للشخص نفسو

عندي كتيير انجازات يومية بعملها او اسبوعية , شهرية او سنوية ما عدت انشر شي , منها فقدت متعة النشر و حسيت اني بستمتع اكتر بالانجاز لما يكون بيني و بين نفسي .

و بصراحة من الآخر يعني , النضج نعمة لا تقدر بثمن , لأن النضج بعلما القناعة و البساطة بنفس الوقت و الرضى و السعادة بأبسط الشغلات
يعني لو برجع بالزمن لورا , اي كنت محاطة بدائرة كبيييير او نقول فقاعة الانجاز , كنت شوف اني كون بأرقى جامعة و عندي سيارتي الخاصة انجاز
هالشي اغبى شي كنت مقتنعة فيه , مع انو هالانجاز انا مالي علاقة فيه , و انو يكون عندي كم هائل من الرفقات حتى لو كانوا مو مناح انجاز بس مشان المظهر الاجتماعي الخاص فيني يكون مثالي حتى لو كان على حساب راحتي

بس مع النضج صرت اقرب للبساطة , و البساطة لا ارادياَ بتجيب السعادة و الراحة و هي انو صرت شوف لو بصحى الصبح و برتب تختي هاد اكبر انجاز برأيي بالرغم من انو شي جداااااااااا تااافه

بس مرة شفت فديو لجنرال عم يلقي خطاب عم يحكي فيه , اذا اردت تغيير العالم فابدأ بترتيب سريرك اولاَ
فلو انت سويت تختك كل صبح و اول ما تصحى فأنت بتكون انجزت اول مهمة لليوم و رح يخليك هالشي بالرغم من انو كتير بسيط تشعر بالفخر و رح يشجعك هالانجاز البسيط انك تعمل انجاز غيرو بغض النظر اديه مهم او اديه كبير و بنهاية اليوم رح تكتشف انك انجزت كتير مهمات بسبب اول انجاز بسيط سويتو و هو انك ترتب تختك , و حكى نقظة جداَ مهمة وهي انو انت اذا كنت مو مستعد انك تنجز هيك مهمة بسيطة ف ما رح تقدر تنجز مهام مهمة و كبيرة و الشي المضحك انو لو مرينا بيوم سيئ و كنا منزعجين , بكفي انو نرجع ع البيت و نشوف تختنا مرتب ( الي انا رتبتو ) هالشي رح يذكرنا بشي ايجابي سويناه و رح يخلي نهاية يومنا افضل

و انا سويت هالشي , كان صعب بالرغم من انو يعتبر شي سهل , اني رتب تختي , بس لا لما يكون كل يوم
و كل يوم كنت سويه و حتى لو مالي خلق , اتذكر كلامو و احكي ببالي ع الاقل كون سويت انجاز اليوم , و بعد ما رتبو كل مرة كون بمزاج حلو
كنت لما مر بيوم مو حلو او يوم حس اني ما انجزت شي , احكي ببالي لا صح انا انجزت اليوم شي كتير مهم و هو اني رتبت تختي

و عنجد شي بضحك انو لما ارجع عالبيت و شوف تختي مرتب لا ارادي بكون مبسوطة , منو انو تختي مرتب و منو اني بتذكر انو هاد انجاز انا سويتو على قد ماهو تافه و بسيط

ف ما بعرف ليه الناس ملتيهة بالانجازات الكبيرة و المهمة و هي ابسط شي مو قادرة تنجزو ؟ و اي للي بيقرأ تعليقي , متأكدة انك مو كل يوم بترتب تختك و قاعد بتدور ع الانجازات الكبيرة , مو الاولى ترتب تختك اول بعدها تروح للمهام الاصعب؟

كمان حابة اذكر نقطة انو التدرج بمستوى الانجاز كتير مهم , يعني مو واحد عمرو ما عمل انجاز ( بالنسبة الو ) يروح ينط لآخر مستوى و يحكي لازم اعملو و المصيبة انو نسبة 90% انو ما رح ينجح لان بكون صعب او فوق مستواه او طاقتو ووقتها رح ينحبط اكتر و يحس حالو فاشل و هو ما بكون فاشل بس هالشي بكون تدريب , بالاول يبدا بالانجازات البسيطة بالنسبة الو مو بالنسبة للمجتمع هي اهم نقطة لان متل ما ذكر كلمة انجاز متفاوتة بين شخص و التاني , ينجزهم فترة بعدها يعلي العيار و هيك .

و بالنسبة انو نركز ع كذا مجال بدل مجال واحد مو خطأ اذا الشخص قادر على هالشي بس كمان انو حدا بركز ع مجال واحد و بانجز فيه كمان مو خطأ , بالاخير حتى لو كان الانجاز بطيء ف يعتبر تقدم و انجاز , الشطارة مو بكترة الانجازات الشطارة بقديه هالبني ادم قادر انو يستمر بعمل هالانجازات الفترة الزمنية و هل هو فعلاَ مبسوط ولا بس عم يعملهم كأنو روبوت وواجب عليه ؟

الشخص الي بركز ع جانب الصحة مثلاَ اكتر من جانب تاني مو خطأ بضل افضل من الي ما بأنجز شي بنوب باي مجال

في اشخاص ما بتقدر تركز بكذا مجال و هالشي واقعي , بتشوف هالشي صعب , مثل : اني ركز ع درجاتي بالدراسة بنفس الوقت على ادائي بالجم بنفس الوقت على نظامي الغذائي الصحي

هاد ابسط مثال كتير صعب بشوف انو الواحد يأنجز بالثلاثة بنفس الوقت , بس حكيت صعب مو مستحيل و هالشي بيتطلب Discipline فظيييع
لأن لو بدي ركز ع درجاتي يعني وقت اطول بالدراسة وقت اطول اغلب يومي راح بنفس الوقت طاقتي راحت لو ضغط ع حالي و تمرنت شوي رح قصر بالتمرين بس بكون تمرنت اخر اليوم يادوبب لاقي طاقة اني اعملي اكلة نظيفة او بكون عاملة اكل من قبل بيوم

هيك عقلية كتير صعب تنبنى بس مو مستحيل بس الي عم حاول احكيه انو مو الكل عندو ياها و كتير بالنسبة الو بشوف هالشي صعب كتير يصير مشان هيك بشوف انو شدة التركيز بكذا مجال بتتفاوت بين شخص و تاني , ممكن نركز عمجال واحد بعد فترة مجالين بعد فترة 3 و هيك لحتى عقلنا الباطن يتعود و اهم شي العقل الباطن برأيي لان بصير الواحد يعمل الشي لا ارادياَ لأن عقلو الباطن حافظ هالروتين , بعد ما يوصل هالمرحلة يدخل مرحلة جديدة بعد ما عقلو الباطن يتعود ع روتينين يدخل التالت . برأيي هيك افضل شي

سويت هالشي عن تجربة لما كنت مركزة ع الجم , طبعاَ عقلي الباطن تعود ع الروتين لحتى بعدها بديت شغل دخل شي جديد اول فترة كان صعب مشي الجم مع الشغل كان تعب مو طبيعي ووقت ضيق بعدها عقلي الباطن تعود فصار عااادي مشي الجم مع الشغل , هلأ انا جاهزة دخل روتين جديد بكل سهولة بدون ما يتأثر الجم ولا الشغل فيه و هو اني صرت ركز ع اكلي

و من زمان بطلت قارن حالي بأي حدا شوف انو عامل انجاز , متل اغلب رفقاتي تجوزوا , انا لسا بالنسبة الن انجاز , بالنسبة الي اني لسا ما لقيت الاختيار الصح , مثل انن تخرجوا و انا لسا بحكي انو كانت خيرة ما تخرجت بوقتي لأن انفتحلي ابواب كتيرة و احلى من الي كانت متوفرة عندي قبل . خلص انزرعت ببالي قناعة الله يسعد كل حدا انجز , هن الن طريق و انا طريق مختلف و انجازات مختلفة .

المقارنة اول قاتل للسعادة حتى لو كانت على سبيل اني كون افضل من فلان بشكل ايجابي كتشجيع , لأن قد ما اشتغلت ع حالي و ركزت لو ما زبطت و انجزت نفسو عمري عمري ما رح حس بالرضى تجاه نفسي و ليه بالاساس لحط حالي بهيك خانة و هيك نتيجة ؟

مع انو الحياة مفتوحة و اوسع من انو نضيق نظرتنا تجاه الانجازات أنو نقارن انجازنا بإنجاز غيرنا !

و اخر شي حابة اني احكي , اني انا بمر بيوم عادي جداَ بس لان كنت مبسوطة فيه حسيت اني سويت فيه اكبر انجاز
و لما يجي اخر اليوم و كون ع تختي و ع مخدتي فوقي سقف هاد اكبر انجاز
و لما تجيني فكرة اني بتمام الصحة و ما بشكي من اي وجع او مرض هاد اكبر انجاز
لما تكون علاقتي مع اهلي صحية و بتجنن هاد اكبر انجاز
لما يكون عندي اكل بالبراد و ما يكون فاضي هاد انجاز

قد ما بمر بأيام سيئة بس هالشغلات بالنسبة الي اكبر انجاز اكبر من اي انجاز ممكن اعملو بحياتي

الناس صارت تركز ع الانجازات المادية او الكبيرة و متناسية ابسط الانجازات الي موجودة بحياتها و بالاساس مو معتبرتها انجاز بل شي طبيعي روتيني

لا اعزائي مو طبيعي ولا روتيني , ففي كتير عوائل علاقتها مو صحية مع ولادها , و ناس ما بناموا من الوجع و ناس ما عندن بيت homeless ,

ف صدقوني ابسط شي بحياتكم بالاساس هي انجاز

و لو في شي من الي انذكر مو موجود مو الاولى نشتغل عليه بالاول ؟ اي اي

ننجز بانو نخلي جودة اكلنا افضل لأن الانجاز اولى بنفسنا اكتر من غيرنا
ننجز بانو نحسن علاقتنا باهلنا لو كانت متوترة
ننجز انو نهتم بصحتنا اكتر و ننتبه عليها
ننجز انو نقرر هاليوم نبتسم حتى لو ما كان جاي عبالنا نبتسم
ننجز انو نهتم بصحتنا النفسية و نفهم مشاكلنا و نحاول نحلها

يعني هيك انجازات , ما مليتوا من الكماليات ؟ ووهم الانجاز على قولى زهورة ؟

بحس بعد ما الواحد ينجز بهدول كلن بيحكي ببالو , انا هلأ ما عاد في شي بيقدر يوقف بوجهي ما بقدر انجزو
حرفياَ اذا الاساسيات منجزين فيها صرنا جاهزين نروح لأصعب المهام

شكراَ زهورة ع هالموضوع الاكتر من رائع , ان شاء الله يكون ردي ضمن الموضوع , مرات بحس اني بطلع من الموضوع لا ارادياَ

​

سيلين يا سيلين ♡⁩♡⁩
كتير كتير كتير حبيت تعليقك واستمعت بكل نقطة وحبيت اضافاتك اللي لحالها تعتبر موضوع كامل ماشاء الله فنانة ومحاورة قوية

فأول شي أريد أنوه عليه، لا تعتذري أبدًا عن "الخروج من الموضوع" لأنك بالعكس تمامًا كنتِ في صلب الموضوع بل وأضفتِ أبعاد ما كنت منتبهة لها فحرفيًّا مهما الانسان حاول يتمعن بالأشياء وحاول يتثقف ويجرب ويتعلم بسن صغيرة، في نهكة خاصة تضاف لشخصياتنا إلا مع تقدم العمر ومايكتسبها الا مع الكبر ربما هي بحد ذاتها "النضج" اللي أشرتي له! فأنا أوافقك الرأي وبقوة ولكن بداخلي شي غريب أني أرفض أرضخ لكلامك ربما لأني لساتني صغيرة وأبحث عن الانجازات القوية فوق النعم والبديهيات اللي مفترض أكون ممتنة لها زي الصحة والعائلة فرغم ادراكي أن القناعة كنز لا يفنى إلا أني لساتني أركض فماأرفض كلامك بل ومتأكدة من صحته لكن أعجز أوافقك الرأي بشكل كامل عشان أنا بحد ذاتي ماينطبق علي ومش مقتنعة ولساتني في الفترة العمرية اللي حكيتي عليها انك داخل فقاعة الانجاز اني كون بأرقى جامعة و عندي سيارتي الخاصة وعندي جسم رياضي ومثقفة ومتقنة عدة لغات وكاتبة عدة مؤلفات وناجحة ماديا واجتماعيا ونفسيا وثقافيا !

فأعجز أعبر لك عن مدى استمتاعي بقراءة الرد، حبيتو وظلم أني ماأجاوب على كل نقطة بس الحين وقتي ضيق وماأريد أؤجل أكثر

فتعرفي إيش أكثر شي لمسني بكلامك؟ حكايتك عن ترتيب التخت حرفيا أنا انسانة تكره الترتيب كرهًا جمًّا لدرجة مستعدة أطبخ فطور الصباح لكل افراد العائلة بالمقابل يرتبولي سريري وفعلا أصحا قبلهم بنص ساعة عشان فقط يكفيني الوقت أجهز فطورهم قبل ماروح للدوام بس عشان هم يرتبوه بدل مني فأنا جدا مفتقدة انجاز الصباح اللي ذكرتيه بالمقابل لما نجتمع على الطاولة والكل ياكل من اللي طبخته ومرتاحين وعلى ذوقهم احس بدفئ عجيب

فصدق يعني لما نبدأ بشي بسيط ونلتزم فيه، نبني عادة الالتزام نفسها مو بس العادة اللي قررنا نسويها. يعني مو المهم إنك رتبتِ التخت او طبخت الفطور او رسمتي او كتبت. بل المهم إنك التزمتِ بقرار اتخذتيه وتعودتي تلتزمي بيه
تعودتي تكتبي يوميا او ترسمي يوميا او ترتبي يوميا او تطبخي يوميا كيف ماكان مزاجك زعلانة او مروقة، تعبانة ولا مرتاحة، طالما أنك قررتي فمعناه تلتزمي وهذا بحد ذاته إنجاز نفسي ضخم يبني الثقة بالنفس شوي شوي فمش مهم الكمية او الجودة او لذيذ ولا مش لذيذ عادي المهم الالتفاتة، فهي لنفسي قبل الناس اني أبرهن لشخصي قدرتي وتكون زي طبطبة اذا يومي ماكان مثالي بالدرجة اللي ابغاها


فااا... يزعلني جدا اني مارديت عليك أبكر —بل وللأسف تأخرت . مع هذا أريد أحكيلك قد ايش تعنيلي الكثير مشاركتك ♡⁩♡⁩

مو عشان صداقة ولا عشان رد جميل بيننا انك تكتبي موضوع ارد عليك واكتب موضوع تردين علي.. لا!!
بل فكرة أن موضوعي أثار في نفسك رغبة حقيقية بالمشاركة وكنت صادقة بأراءك وارتحتي بالكلام ومااكتفيتي بمدح سطحي يعنيلي الكثير أنك بذلت جهد عشان تثري النقاش ، وطبعا هيي فرصة عشان أسمع أفكارك أنا دايما أعتبر مداخلاتك مثرية وممتعة سواء تدويناتك او مواضيعك او حتى تعليقاتك

+ مش مدح على فكرة أتكلم بكل موضوعية
فاا

شكرًا سيلين على وقتك الثمين