مدونة فخمة كن قوياً ،، فالحياة تميت الضعيف قهراً (3 زائر)

[A S T E R]

فشة غل

وللحديث بقية من أجل التوضيح لكم
في تدوينة أخرى


هم من حقهم أن يجتمعوا ويقولوا:

"القضاء" : مصدر معرف ب(ال) يحمل معنى ليس فقط التهديد اللفظي بل والتهديد العملي فالموضوع ليس (دعوة لاغلاق) ولا (تحذير من الانجرار) لا لا لا لا الموضوع القضاااااء بالقول والفعل باللسان واليد والقدم كمان !!!

"على جميع" : تعميم مطلق زيادة في التوكيد على المعنى السابق وبيان الانفعال والغضب الصادر من الجملة وجرسها.

"أشكال التمييز ضد المرأة" : استخدام اصطلاح التمييز بالمعنى السلبي لتأجيج مشاعر سلبية تجاه المجتع، ودفع السامع -من خلال استحثاث جانبه الشرير واستثارة حقده وغضبه- إلى مهاجمة أسرته ومجتمعه.

فيجوز لهم استخدام هذا المسمى المستفز والمتعالي والفوقي
" القضاء على جميع أشكال التمييز ضد المرأة "

أما آبائنا وأجدادنا وحكماء كبار السن في مجتمعنا من خطباء ومصلحين ودعاة، هؤلاء لا يجوز لهم أن تثور حميتهم وأن ينفعلوا ويستخدوا كلمات من مثل (ندعو لإغلاق) (نحذر من ) ... الخ مع أنها أقل تعاليا وأقل دعوة للعنف من (عنوان) الوثيقة فقط ناهييك عن محتواها ( محتواها دا حكاية تانية خالص )

والله حُقّ لعشائرنا ومصلحينا وحُق لكل غيور أن ينفعل ويصدع بالحق بالحكمة والموعظة والتي هي أحسن،،، وفي حالة سيداو التي هي أحسن هي:- أن تعلو في الخطاب فوق لهجة سيداو ووقاحة سيداو وغطرسة سيداو.

فمثلاً يمكننا أن نقول بكل عزة وعلو :
" بَشِّرِ الْمُنَافِقِينَ بِأَنَّ لَهُمْ عَذَابًا أَلِيمًا * الَّذِينَ يَتَّخِذُونَ الْكَافِرِينَ أَوْلِيَاءَ مِنْ دُونِ الْمُؤْمِنِينَ أَيَبْتَغُونَ عِنْدَهُمُ الْعِزَّةَ فَإِنَّ الْعِزَّةَ لِلَّهِ جَمِيعًا "
صدق الله العظيم
​

بقلم أخي​

​

 

[A S T E R]

اتفاقية العهر !


- الي ما بحب يسمع حكي في السياسة او انتقاد السلطات فلا يكمل قراءة وبرضو التدوينة طويلة كثير -



حابة أحكيلكم سبب كتابتي للتدوينة إلي فوق
والي هي من كتابة أخوي ،
زي ما تقولو فشة غل على الي بصير عندنا بفلسطين

السلطة الفلسطينية -الموقرة- من شي كم سنة دخلت ووقعت على اتفاقية اسمها اتفاقية سيداو
وهي اختصار لجملة
(القضاء على جميع أشكال التمييز ضد المرأة )


اضغط هنا

هاد الاتفاقية تم إقرارها من قبل الجمعية العامة للامم المتحدة عام 1979
ومن وقتها بلشت الدول اشي يوقع عليها ولازم ينفذها وفيه دول رفضت توقع عليها
سلطتنا وقعت عليها يمكن قبل خمس سنين
بس ما نفذت وما سنت قوانين عشان تنفذ الاتفاقية

ولكن حاليا ومن وقت قريب بدأت السلطة تحاول تنفذ قانون قانون
وتسنو في المحاكم لحتى انها تمتص غضب الشعب
وأول قانون سنه عباس - المصدي - هو رفع سن الزواج الى سن 18

ما بدي أقعد اناقش واحكي في هاد القانون بس همي كلمتين ورد غطاهم
الله من سابع سما ما حدد سن للزواج ..
والرسول ما حدد..
كان حديثه واضح..انه الي بكون قادر على الزواج جسديا ونفسيا وماديا يتزوج
ما حدد سن معين
فمين احنا لنحدد؟
زي شغلة المهر مش محددة وحرام يتحدد المهر

فهو عباس عرف من وين يبدا في تطبيق الاتفاقية في فلسطين وبلشها من هاد القانون لحتى يقدر ينفذ باقي القوانين يلي كلها لا تمت للإسلام بصلة بتاتاً

طبعا يا جماعة قانون رفع سن الزواج في جنبه استثناء
ويا حزركم شو هالاستثناء بس
انه اذا صار ظرف ..مثل حملت بنت قبل سن 18 بسبب علاقة عاطفية وزنت
هون مو مشكلة بنزوجها
مش قلتلكم اتفاقية عهر اسمها

يعني عادي يا بنت الحلال بدك تحبي وتطلعي مع الشب الي تحبيه وتغلطي معاه وتحبلي كمان مو مشكلة بنزوجك

اما لو وحدة اجاها عريس بالحلال وهي عمرها 17 او 16 او حتى 15 ..
هون لا وغلط عظيم وما بجوز وبنحبسو الأهل اذا رضيو يزوجو بنتهم قبل 18 سنة !!


شفتو لوين واصل فيهم العهر ؟

وهاد طبعا نقطة في بحر من القوانين الي تضمنها الاتفاقية

تضمن الانحلال من ولاية الأهل وانه بحق للبنت تروح وتيجي دون ما حد يحكي معها

وإلغاء قوامة الرجل على زوجته ومساواتهم في الطلاق
واحنا بنعرف الاية الي تقول " الرجال قوامون على النساء "
ولكم مين انتو لتيجو تحللو ما حرمه الله ؟!!!


وانه بحق للوحدة تروح تتزوج مين ما بدها دون ولي !!
تخيلو ..يعني دون ما يكون ابوها او اخوها راضيين
عادي اختارت شب تروح هي وياه عالمحكمة وعادي بزوجوهم

واحنا بنعرف الحديث الي بقول انه لا زواج دون ولي وانه باطل وتعتبر زااانية !!

وانه ما فيه عدة للمطلقة او للأرملة
تخيلو يا جماعة الوحدة تطلق بيوم وتروح ثاني يوم تتزوج اذا مثلا اجا حدا في وقت قريب

واحنا منعرف الاية الي بتحكي عن العدة وواضحة

وانه بحق للمرأة تنسب المولود لإلها
يعني لو وحدة زنت وجابت بيبي تقدر تنسبه الها او لأي عيلة..محلولة المشكلة

ولكم وانا بحي عن الاتفاقية وقلبي بغلى غلي
لأنه كل شي بتحكي عنه مستفز

وقانون ثاني انه بسمح للإجهاض
بالله عليكم صح كله أشياء مستفزة؟!

وفيه قوانين تقول انه المساواة في العمل في كافة مناحي الحياة ومن هالحكي
وممنوع الاتجار بالجنس ومن هالحكي

بس ما علينا ..عارفين انه فيه أمور فظيعة بتصير وغلط ومش من ديننا وإسلامنا

بس همي بمسكو هاي الأمور الي بتصير وبحطوها ذريعة لحتى يقدروا يلغو حتى الاحكام الشرعية
مو بس الشغلات الغلط الي بتصير ضد المرأة

بستغلو أي حادثة بتصير ضد النساء لحتى يطعنوا في الدين وفي الإسلام

وانه ديننا واسلامنا مش منصف المرأة وانت يا بنت لازم تتمردي
على هاد الأحكام وانها لازم تلتغى !

ما بقهرني غير إنه الغرب ..عندهم المرأة مهانة مذلولة حتى وهي معها حقوقها ومنفذين قوانين
واصلا كل هالقوانين هي شقاء وتعاسة للمرأة

لأنه ديننا ما حرمنا من حقوقنا بل العكس
كانت المرأة مهانة ذليلة بالجاهلية وأجا الإسلام وعززها وكرمها
وبكفي انه الرسول قال استوصوا بالنساء خيراً

أعطاها حقها تمارس دورها في التعليم انها توخد علم وتتعلم وانها تشارك بالحياة السياسية ولكن ليس الحكم
وسمحلها تكون قاضية حسبة كمان
وغيرها كثير من الامور
وجعلها عرض يجب أن يصان من قبل كم من هو محرمها من اخ او زوج او أب

المرأة مش محرومة من شي وما بدنا هاي الاتفاقيات لحتى تعطينا حقوقنا
حقوقنا واصلتنا من ديننا
ولو هسا حد رح يجي يقولي انه في نساء مش واصلهن حقوقهن ومظلومات
اوك ماشي وانا بعرف بهالشي
بس غلط وحرام نحط هاد الحالات ذريعة لنطلع من بوتقة الإسلام وتعاليمه !

زمان بس كان مطبق الإسلام المرأة ما كانت مظلومة
بالعكس كانت الها بصمة كبيرة بالمجتمع الاسلامي
وكانت محافظة على عفتها وطهارتها وحياءها
حتى وهي بين الرجال وملتزمة بلباسها وتركت أثر وراها بخلدوه الأجيال
سواء من نساء الخلفاء او عالمات وصحابيات
وفوق كل هاد كانوا كلهم متزوجات وعندهم أطفال
ومع هيك نشرن علم اكثر من الرجال كمان

فهو الخلل مش بالدين ..الخلل في بعض الأشخاص الي فاهمين الدين غلط وبطبقوه بشكل خاطئ

بس مع هيك ما بجوز نرضى بمثل هيك اتفاقيات بتحرض النساء على رجالهن وإنها تكون منحلة،
وحالات العنف ضد النساء وغيرها فيه مثلها ضد الرجال عفكرة وياما سمعنا قصص بس ما حد بروجلها زي قصص النسوان

وشغلة ثانية بدي أحكيها إنه ليش ما بتعاطفوا مع الي بتعرضن للعنف من قبل الاحتلال او السلطات ؟!
ليش هدول ما بروجولهم وما بتعاطفوا معهن زيها زي باقي الحالات؟
دليل على انهم همي مش مصلحتهم حماية المرأة
هم هدفهم ،، واضحة الشغلة انها ممنهجة ومتكاتفين لحتى يطلعوا المرأة من التزامها وعفتها

وكمان شغلة بحكيها للجمعيات والي بروجو لهالاتفاقية
ليش بس تطلعن وتقولو بدنا سيداو ..ليش ما بتطالبن بتطبيق شرع الله؟!
لأني دايما اسمع النسوان بحكين انهن مع الدين ومع الاحكام الشرعية وانه الدين منصف المرأة بس انه فيه فئة من الرجال فاهمين الدين غلط
طب ما دامكن بتحبين الدين وموافقات على انه منصف ..
ليش بس تعترضن وتطلعن مسيرات ما بتطالبن بتطبيق شرع الله بدل شرع سيداو الحقير؟!!


الغرب بحسهم بنجلطو لأنهم بشوفو كيف المرأة فيها معتنى فيها بكافة مراحل حياتها
بداية من وهي صغيرة وطفلة عند ابوها مدللة
وبس تكبر عند زوجها
ولما تكبر اكثر واكثر أولادها بديروا بالهم عليها
بتشوفو كيف عنا الختاير الكل بحترمهن وبقدرهن والكل بكون حواليهن
وبحبوهن
اما عندهم الختاير مرميات ببيوت العجزة وبتكون قلوبهم تتقطع عشان يشوفو أولادهم !

بس قوانينهم المنحلة بتسمح لهاد التفكك الأسري وإلغاء الترابط العظيم والمقدس

فهمي مين لحتى ييجو ويملو علينا قوانين مش من اسلامنا ؟

احنا الحمد لله شغالين على الطرف المضاد وعاملين حملة ضد هاي الاتفاقية
وقاعدين بنوعي الناس بخصوصها
وانه لازم كل الشعب الفلسطيني ما يرضى فيها وما نسمح بتطبيقها
والحمد لله في رأي عام حواليها بعد ما انه ما كان حد فاهم شو هي
بس الشغل أتى بثماره
وأملي بالناس كبير وانهم ما رح يسمحوا لمثل هيك اتفاقيات تمر مرور الكرام

واحنا لساتنا شغالين في حملتنا التوعوية المضادة وما رح نمل زي ما همي ما رح يملو في محاولة اسقاط المرأة والسعي الى انحلالها ، أنا بقصد بكلامي الجمعيات النسوية الي شغالة على قدم وساق في الترويج لهالاتفاقية وبدعم من السلطة الفلسطينية الخايسة ويلي أخرى ما تسمح لحد يحكي رأيه
اول ما بلشنا شغل وتوزيع بيانات وتوعية في الناس عليها ..حبسوا قسم من الشباب ..مع انه البيانات الي نصدرها ما فيها شتم ..كلها فقط انتقاد لأفعال السلطة والجمعيات المدعومة من قبلها ..ومع هيك بحبسوهم
وبيجو يقولو بعدين ديمقراطية
وين الديمقراطية وانت تحبس أي حد بنتقدك او بقول كلمة حق وقال الله وقال الرسول ؟!!



وأول حركة تم عملها من قبل الفلسطينيين هو تجمع وجهاء عشائر مدينة الخليل وشوفو شو كاتبين

بيانهم


في النهاية بنقول :
"ويمكرون ويمكر الله والله خير الماكرين "


#تسقط_سيداو

​

 

[A S T E R]

ذكريات



من فترة بدي أكتب هاد التدوينة
سبق ومرة قلتلكم بدي أصير كل فترة لما أتذكر شي أكتبلكم من هالذكريات

هالمرة بدي أكتب عن بعض ذكرياتي في الانتفاضة

طبعا الانتفاضة الأولى كانت سنة 1987 وكانت ذكراها ب8/12
والانتفاضة الثانية كانت ذكراها بشهر تسعة وهي بسنة ال 2000 بلشت واستمرت كم سنة

وأنا كان عمري 7 سنين لما بلشت
بس متذكرة كثير شغلات فيها ومواقف

بس عنجد بتذكر انها كانت أوقات صعبة كثير
بس عشناها بقوة ..صح بتذكر كنت خايفة كثير بس اظهر بمظهر اني بخافش منهم
واني جريئة بس من جوا أكون مرعوبة على أهلي وعلى بيتنا وعلى بابا اكثر شي

وهي قلقيلية لانه كان فيها كثير من المقاومة ففاتو عليها بحصار قوي كثير
ودبابات ..تخيلو يفوتو دبابات قد البلد على شوارع وحواري صغيرة
ما بنسى منظر الدبابة شو بخوف عن قرب
بتذكر مرة كنت بركض من بيت سيدي وبدي اروح على بيت اهلي وهي طبعا كانت منع تجول
بس مهو البيوت جنب بعضها
كنت رح اطلع من الزقاق وامبل عشان أوصل بيت اهلي الا هي بوجهي الدبابة
انا صفنت وتمسمرت بمحلي وارتعبت من المنظر ..وهي مشت واستنيت لراحت ورحت لبيتنا
ما كان فيه مسافة بيني وبينها ..كويس ما اندعست وقتها

أصعب أيام كانت أيام المنع
نقعد بالاشهر بالبيوت ممنوع حدا يطل حتى من شباك
الدبابات موزعة هون وهون
لا وقال يفكوا المنع بس ساعات ويرجعو يعملو منع

شو قد الواحد بحس بالذل والاهانة من تصرفاتهم
خاصة الرجال
لما مرة طلبو من كل رجال البلد يتجمعوا في مدرسة
وبقولو عملولهم هناك تفتيش وانه يشلحوهم اواعيهم ..اذلال اشي مش طبيعي
بتذكر بابا وعمامي ما راحو ..اتخبوا في أرضهم

أصعب مواقف هي لما يجو يفوتولك عالبيت ويطلعوكم ويحكولكم بدنا نفتشو
تتصوروش كمية الرعب الي كنت ارتعبها
ما بعرف كم مرة تفتش بيتنا
بس في مرتين بتذكرهم وما بنساهم

اهلي كانو عايشين بالإيجار بشقة من خالي..وحوالينا كل دور خوالي كمان
بس بعدها بفترة قصيرة انتقلنا لبيت أهلي الحالي لما عمروه

فبتذكر لما طلعونا من بيتنا الي كان عند بيوت خوالي
وكل الحارة طلعوهم من بيوتهم
ليش؟
لأنهم كانو بدوروا على مطلوب في عمارة قريبة كثير على بيتنا
وطلعونا عشان بدهم يفجروا العمارة الي متوقعين انه فيها المطلوبين .. الله يرحمهم

كل عيلة راحت عند حد من قرايبها بمنطقة ثانية من البلد
احنا رحنا عند دور عمامي ..بنص الليل ..بس طلعت من البيت كنت أبكي واسأل امي بيتنا رح ينهدم يا ماما؟
وهي تقولي لا ..ان شاالله ما بصيرلو شي

طبعا القنبلة الي استعملوها لتفجير العمارة الضخمة قد ما اوصفلكم ياها ما رح اخلص
كل الناس وقفت على سطوح بيوتهم ليتفرجو
الصوت كان رهيييب بشكل مش طبيعي ..انهزت كل البلد
والسما كلها ضوت وصارت نهار من كثر ما هي قوية


الله يرحمهم الي توفو في العمارة هديك
المهم بس رجعنا ما كان صاير شي بالبيت
بس في بيوت ثانية الي كانت اقرب عالعمارة تضررت كثير

ثاني مرة طلعنا من بيتنا ،، واحنا ببيت اهلي الحالي كنا
طلعونا ليفتشوه وكانو قبلها هادمين بيوت كثيرة
وياالله شو كنت خايفة يهدموه وكنت شايفة الخوف بعيون ماما وبابا على بيتهم الي ما لحقوا يفرحو فيه
بس الحمد لله برضو عدت على خير وما صار شي


أحلى شي بالانتفاضة برغم الخوف كنا نطلع في عز منع التجول
بتذكر بابا كان يوخدنا كلنا انا واخوتي وخواتي ونروح على الأرض
بنساش كيف كنا نطلع ونضل نتلفت وران وقدامنا
ونوقف هون ولا هون اذا سمعنا او شكينا يكون فيه جيب يهود
تعرفو لو يشوفونا بنطخونا دون تردد هههه
بس كل الناس أصلا كانو يطلعو بالمنع
يعني بالعقل مستحيل نضل قاعدين بالبيوت اشهر متواصلة
وفيه زلام كانو يطلعو على اشغالهم بس يضلهم مسكرين بواب اشغالهم
مثل الي بتكون اشغالهم بمناطق بعيدة او مش مركزين تجمعهم اليهود فيها

وفيه مرة من المرات على سيرة المنع ..ما كنا عارفين هي منع او لا
او اذا على كل البلد او لا
مهمي كانو يعملو أحيانا منع على نص البلد
ففي مرة من المرات طلعت عالمدرسة ومدرستي كانت باخر البلد
وقريبة عالجدار
وياما رموا علينا مسيل دموع اليهود والبنات يغمى عليهم
عانينا في هديك المدرسة واحنا صغار..كانت لزق الجدار وحتى بس انبنت ما سمحو انها تكون للأولاد عشان ما يروحو الأولاد ويجننوهم هههههههههههه تخيلو خايفين من أولاد صغار وحجار
فعملوها للبنات وانا درست فيها معظم سنين دراستي بالمدرسة

فالمهم وانا رايحة وبس قربت على منطقة المدرسة شفت زي جندي من بعيييد
ومش مميزة انه هو جندي او لا
وبيحكي معي من بعيد وبصرخ وانا مش فسامعتو..صوتو مش واصلني
وكان معصب عالاخر بس شافني وكان بدو يطخني ..أشّر عليي بارودتو

انجن جنونو ..وهو بس قرب علي عرفت انه جندي ..وضليت متمسرة محلي
لحد ما قرب شوي علي وسألني شو بعمل وقلتلو رايحة عالمدرسة
وحكالي روحي منع تجول
-كويس بفهم عبري -

وضليت راكضة مثل الطيارة ..ههههههه


معاناة عنجد هديك الأيام ومش عيشة
واصلا لحد هسا عيشتنا مش عيشة ولو ما فيه قصف وغيره ومنع
بكفي التضييق علينا في كل مناحي حياتنا
وكل اشي مرهون فيهم
وبكفي ما نقدر نروح ونيجي حتى جوا الضفة براحتنا
حواجز دايما حاطين
وبس يجي عبالهم يفتشو..استنى ولا تستنى في طابور السيارات
وهي كلها الضفة فش اصغر منها
بس لما بدنا نسافر جواتها وكأنه ابصر وين رايحين ..بتوخد الطريق وقت أطول من الي تستحقه

وغير أنه سلطتنا بتطبع مع اليهود وبتخدمهم وهي مثل ذراعها اليمين ..فيعني العيشة بتخزي أكثر من قبل لأنه لما تكون عارفة أنه اولاد بلدك همي الي بساعدوا وبحموا كيان يهود

وغيرها كثير شغلات..مثل انه بس يجي عبالهم او يشكوا في حدا معو سلاح بطخوه سواء كان رجل او امرأة ..ياما طخوا نسوان عالحواجز بحجة انه معها سكينة قال

الله المستعان

الله يخلصنا منهم ويا رب الجيوش العربية والإسلامية تتحرك بشي يوم وتيجي تحرر فلسطين
وغيرها من البلاد المضطهدة
أملي فيها كبير وانه الخير في امة محمد ليوم الدين ق9ق8

​

 

[A S T E R]

تابع لفعالية الاسبوع

ما الذي كسبته من سنه 2019 ؟
ماذا قدمت لك سنة 2019 ؟
ماذا كسبت من 2019 وماذا خسرت ؟




أسعد الله مساؤكم بكل خير ق8

بعد ما فكرت منيح الليلة لما شفت سؤال الفعالية ،
ما حققت شيء مادي وملموس بالمعنى الحرفي

ولكنها سنة مثل باقي السنوات تعلمت خلالها أمور كثيرة
أخطأت فيها كثير كمان

لا أقول إني ملاك بالدنيا وما بخطأ،
ليس في حق أشخاص
ولكن في بعض المواقف أسأت التقدير ولكني تعلمت ،
وتقدمت كثير في الكتابة في مجال اخر غير الي تشوفوه بالمنتدى
ولاقيت إعجاب من أخواتي الماشيات معي في هذا الطريق

كسبت إنه خطابي وكلامي للناس تحسن كثير من خلال مشواري في الدعوة
ولاقيت إعجاب واحترام وتقدير من الناس الي بروح عندهم على بيوتهم وبناقشهم بفكري

صح ذكرتلكم قبل هيك إني بغلب عليي طابع العصبية،
ولكن هذا الأمر مقتصر على الي حواليي مثل زوجي أو أهلي فقط
اما باقي الناس ما بعصب
وكثير ناس بحكولي انت لامبالية وهادية
بحكم شكلي وبحكم إني ما بسمح لعصبيتي تظهر أمام الناس
لأنه باختصار ماشية على الاية الي ربنا بقول فيها

" ولو كنت فظاً غليظ القلب لانفضّوا من حولك "

ماشية عليها في تعاملي مع الناس في كل مناحي الحياة ولو مين ما كان الي قبالي ،، قريب أو بعيد
اذاني او ما اذاني ،، ورابطتها في اية

" ادفع بالتي هي أحسن "
- يلي تعلمت أحكيها من بابا لأنه دايماً يذكرنا فيها -

حتى في وحدة من رفقاتي بشي مرة كنا انا وهي نتناقش على الانستغرام على شي منشور بالتعليقات
ودخل شب على تعليق رفيقتي وصار يسب ويقاتل مجرد انه كان ظاهر انا ورفيقتي من كلامنا شو انتمائنا
وصار يغلط علينا وعلى الانتماء أو الحزب الي احنا منه
انا صرت ناقشه بكل أدب واحترام
وما غلطت ولا نص غلطة لحتى ما يكون علي أي مأخذ

وبوقتها رفيقتي حكتلي ( أغبطك على هدوءك )

طبعا أنا بزعل كثير من هاي المواقف
وبشكل عام ما بدخّل حالي بمتاهات على مواقع التواصل ،
لأنه عندي قناعة انها مش منصة للنقاش المحترم ، بل لازم يكون وجهاً لوجه
وبتعرضلها بالواقع كمان ومن ناس مقربة مني بس بستعين بالله

وهاد بصراحة شي تعلمتو خلال هاد السنة لأني اشتغلت كثير بهالسنة بالدعوة بحكم إنو بناتي كبروا شوي وصرت أتفرغ أكثر لهالشي
.
.
.
في هالسنة كمان خضت تجربة لأول مرة مع الأطفال وتعلمت كيف لازم يكون التعامل مع الأطفال

صح انا أم وقبلها كان عندي أخت صغيرة وهي بمثابة بنتي وبعرف كيف التعامل معهم

بس لما تعاملت مع بنات صغار هالمرة
هالتجربة خلتني أفهمهم اكثر ولأنهم أكبر من بناتي

وعرفت كيف أحتويهم وأخليهم يحبوني
وتعلمت كيف إنه بدها طولة روح ونفس طويل في التعامل معهم وإنت تعلمهم وتعطيهم شي جديد

وإلي أبسطني اكثر إني لما تركتهم فترة لأنه كان عندي ظروف
وطلبت إنهم يعفوني من هاد الجلسة معهم ويعطوها لحد ثاني

طلبو إنهم يرجعو لعندي لانهم بحبوني
ورجعولي إياهم ..صح كنت مبسوطة إنه عملي معهم أثمر
وإنهم بحبو يتلقوا مني ،،
بس بنفس الوقت عاتبتهم وقلتلهم إنه احنا هون بنتعلم الدين وبغض النظر عن الشخص إلي بعلمكم لازم إنتو تتقبلوا أي حد ولا تتعلقوا فيي، لأنه ما تعرفوا شو ممكن يصير معي وأترككم كمان مرة
انبسطوا من كلامي وتقبلوه وحكولي حاضر

وانا من جوا كنت راضية عن نفسي بالإنجاز إلي بحدثوا فيهم من خلالي
وهاد بالنسبة إلي إنجاز كثير كبير لأنه مش أي حد بكون قد هاد المسؤولية

- أنا بعطيهم دروس دين ..قصص قرانية وعن الصحابة والرسول وحفظ قران وغيرها من الأمور البسيطة -


وقبلها كنت مجربة مجموعتين مختلفات من البنات ،
بس لظروف معينة رحت من عندهم لحد ما حالياً أنا استقريت على هاد المجموعة ،
ومع هيك مع إنه كانت فترتي قصيرة مع المجموعات الي قبل ، كمان حبوني كثير وكانو حابين ضل معهم

فهاد هي التجربة الجديدة علي الي جربتها بهالسنة
وصدقاً علمتني كثير وصقلت شخصيتي بشكل أفضل من قبل
وخلتني أفهمهم أكثر واعطيهم بمحبة وعطف وحنان
.
.
.

كسبت كمان معرفتكم جميعاً
صح صرلي أكثر من سنة بالمنتدى بس أنا أول ما رجعت للمنتدى ما تعمقت بمعرفة حد
بس لما غبت ورديت رجعت حبيت إني أعرف الأعضاء أكثر بحكم محبتي للأنمي تون
.
.
.
أهم مكسب إنه مرت هالسنة دون ما يرجعلي وجع حمى البحر المتوسط

هو صحيح مرض مزمن ورح يضل مرافقني العمر هو والدواء الي بشربو عشانه ،
بس انبسطت انها مرت سنة دون ما اذوق هالوجع الي لا يحتمل
.
.
.
.

فهي فعلياً لو بدي أدقق اكثر كمان شو الي كسبتو أو خسرتو بهالسنة
مش هالتغيير الجذري
بس أنا بالنسبة إلي غيرتني للأحسن في فهم الحياة

وفي كيفية التعامل مع الناس وإنه بده صبر كثير،
وتعلمت إني ما أركز على أخطائي بل إني أتعلم منها وأصححها وأمشي لقدام لأنه ما فيه حد ما بغلط ،
وعندي قناعة إنه حتى لو غلطنا سواء مع أشخاص أو بحق أنفسنا مو معناها إنه احنا سيئين أو نحكم على غيرنا من خلال غلطه ، ما في حد كامل وبما إنه احنا دايماً نطلب العفو والمغفرة من ربنا ليش أنا ما أسامح غيري حتى لو غلط معي ، صح احنا بشر بس سهل جداً إنك تروّض نفسيتك لحتى ما يكون قلبك قاسي!
وأنا جربت هالشي وسامحت ناس سواء بالعالم الافتراضي أو بواقعي على أغلاط فظيعة عملوها معي بس نسيتها ومشيت لأنه ضلت مكانتهم كبيرة كثير بقلبي، ما بنكر تركت اثر فيي بس رجعتهم لمكانتهم وما حكمت عليهم من خلال هالأغلاطق8
تعلمت هالشي من أهلي لأني انحطيت بمواقف تجاههم توقعت ما يسامحوني بس سامحوني،
ما في شي ما بتسامح عليه

وكمان الحمد لله أثبتت جدارتي في كثير مواقف خلّت الي حواليي يشكروني ويبدوا إعجابهم ،
وتشجيعي عند كل أمر بحدث معي
وعلمتني إني ما أخلي للحزن والزعل مطرح ، لأنها فعلياً هاد حياة وحدة بنعيشها
فلازم نعيشها صح ونستغلها أحسن استغلال وما نسمح للسلبية تسيطر علينا لأنه الموت بأي لحظة جاي فالواجب علينا إننا نعمل ونقدم أكثر لحتى ربنا يحسن خاتمتناق9ق8

​

 

[A S T E R]

السلام عليكم ورحمة الله وبركاته

يوووووووووووووه يا جماعة الخير شو زمااااان ما كتبت باالمدونة

اكثر من 3 سنين ..طلع الغبار عليها اطنان

بالبداية كيف حالكم؟

شو الأخبار ان شاء الله بخير؟

شفتو؟
قد ما اغيب الا ارجع ..
13 سنة مرو على تسجيلي بالتون

بالقديم سجلت فيه سنة 2010 وبعدها اندمج وصارت قصص ما بعرف اذا تعرفوها

وكلنا جينا هون سجلنا في هاد لما سكاي عملو في سنة 2013 ،،
وعندي عضوية قديمة من اول ما انعمل المنتدى بس تركتها لأني التهيت بحياتي..
كنت غيب بالاشهر والسنوات بس اطل اسلم واطلع ،،

بعدها قررت ارجع بعضوية جديدة ونشاط جديد فسجلت هاي ،،

بس هو ليش هيك المنتدى صاير؟

انا اول ما رجعت للمنتدى بعضويتي الجديدة كان الوضع كثير غير..
وانا كنت نشيطة وعرفت ناس كثير مناح وكان المنتدى تدب فيه الحياة ،،
هسا بفوت وبطلع وهو مثل ما هو ،، ميت ،، ماله نايم ؟

ان شاء الله يرجع النشاط زي قبل واحسن

المهم ايام ما فتحتها المدونة كنت اصغر ،،
والله صح مش هالفرق ، بس تصدقو؟

السنة الواحدة بتفرق فما بالكم في اكثر؟

صار عمري 30 سنة ، صدقا انه العمر مر بسرعة

مش اني عندي عقدة بالعمر زي باقي الاناث،، لا أكيد ،
بس انه هيك مستغربة ومصدومة انه خلص انا كبرت كثير وصار عندي عيلة ،
بس من جوا ما بحس حالي كبرت ، صح تغيرت بالتفكير وبالعقلية ،
بس انا كأسماء ما تغيرت ولساتها أسماء الطفلة موجودة بس مطفية نوعا ما

فعلا بني ادم ما بحس بالوقت ولا بعمره بالمرة ،، استشعرت انه قديش احنا بتكون الدنيا ماخذتنا عالاخر

وما تنتبه لحياتك الا وهي مارة قدامك وكأنه بلمح البصر

مع انه بنعيش كل لحظة فيها، ننبسط نزعل نتوجع ننكسر ننجح نفشل نعمل انجازات ،
بس مع هيك لما خلص يمر جزء كبير من عمرك بتحس قديش انه راح بسرعة وبتحس قديش انه في امور عملتها ما كان لازم تعملها ،
وفي امور عملتها كان لازم عملتها على افضل حال ، وانك كان لازم استغليت كل لحظة بحياتك لارضاء رب العالمين على اكمل وجه ،
حتى وان أديت ما عليك من فرائض وغيرها ، بس الا ما تحس حالك انك كاين مقصر بحياتك الي مرت بسرعة ،
ولازم تستغل الباقي من عمرك لتزيد من قربك من ربنا وتستشعر رقابته في كل امر تقوم فيه وتعيشها بما يرضي الله
لحتى بس تيجي لحظة الموت تيجي وانت مستعد الها مش تكون خايف منها

المهم ،،
مش عارفة مالني تعمقت بس من سيرة عمري

بس حبيت اكتبلكم افكاري بما اني من اسبوعين وفيتهم ا0
وان شاالله انبسطوا وانتو تقروها

وكمان شغلة بحب احكيها ،،
انه شكرا شكرا أخوي @REINER على قرائتك للمدونة ،،
من كم يوم هيك تفاجئت لقيت اشعارات من المدونة ، فانبسطت ،
بحب الناس تقرا الشي الي بكتبه،، سواء قريتها كلها او لا ، بتمنى انه الي قريتو اعجبك ، واستفدت منها

ذكروني اشعاراتك في اشعارات حبيباتي @iMAYAKIH @SAIRYU اول ما عرفتهم ،
راحو ع مدونتي وقروها كلها حرف بحرف دون مبالغة ووصلني يومها اشعارات منهم ،
وبعتولي انهم قروها كلها واستمتعواا فيها ،، كثير انبسطت
بكلامكم يا بنات يومها ،

وكل ما اتذكر لحظاتنا الاولى مع بعض ببتسم وبدعيلكم بالخير ،
الله يسعدكم ويرضى عنكم ويوفقكم يارب


بس هيك حبيت اجي واسلم عليكم ونفض الغبار عن مدونتي

وحابة ارجع اكتب فيها كل فترة

زمان كانت مدونة مميزة ومعظم تدويناتي مختومات، بزبطش ترجع مميزة ؟



نراكم على خير

​

 

[A S T E R]

يسعد صباحكم بكل خير يا رب



مينوري وستار وأمبر وجون وجولز كلكن منورات المدونة
اول مرة بتشوفوها بتوقع


حبيت أعلق على كلام @J u n بتدوينتها واجاوب على سؤالها بخصوص المنتديات

بالبداية بتفق معاك يا جون في كل كلمة قلتيها بخصوص جو المنتدى حاليا وجو المنتدى زمان ،
سواء المنتدى القديم او هاد المنتدى بس قبل ما يتغير النظام

هو من ناحية .. انا حببيت التغيير والتطوير وكذا بس من ناحية اخرى ..
جد الواحد بحن وبشتاق لنظام المنتديات زمان وكيف كانت

انا اكثر شي زعلت عليه بخصوص أي تحديث او تطوير هو انه كل مواضيعي خربت والصور راحو

خاصة موضوعي هاد

الختم الماسي - Friendship Isn't A Big Thing ~

Diamond 22/3/2021 عموري ~ اطلق من يسوي موضوع اهداءات واطلق اهداءات هم ق1ق1 استحقيتيه بجدارة ق1و2 Friendship Makes Life More Beautiful السلام عليكم ورحمة الله وبركاته كيف حالكم ؟ إن شاء الله تكونوا بأتم صحة وأحسن حال يا أحلى أعضاء ؟ بالبداية بما انه االمهرجان التوني كمان يومين بحب أحكي...

www.anime-tooon.com

هاد الموضوع أهديت فيه اعضاء كثير صورة مكتوب فيها اسمهم عند القبة ،
وما تتصوروا ردة فعلهم شو فرحتني اقسم بالله ،
لدرجة اني بعد فترة لما رحت الاقصى رجعت عملت كمان صور لمجموعة ثانية من الاعضاء وحطيتهم برد اخر بالموضوع نفسه ،
والكل كثير انبسط والله ،
الي قهرني انه لحد هسا في قسم ما شافو الاهداء ،
لو فاتو بشي يوم وشافو رسالتي بالخاص الي فيها الموضوع ما رح يشوفو الاهداء ،
بس لساتهم الصور عندي قبل التعديل عليهم بمحادثتي بالتيليغرام مع المصصمات ،
فأي حد بشوفو وما تكون صورته موجودة يبعتلي وبطلعلو اياها من الارشيف

أمبر وستار ان ذا دارك واورانوس طلبو مني نفس الشي، مش ناسيتكم يا بنات ،
بس ارجع هناك رح اعملكم حتى لو بعد سنة رحت

المهم بالنسبة الي يا جون انا ما سجلت في أي منتدى غير التون سواء زمان او هسا

وضليتني افوت عليه كل فترة ولو اغيب ، وبالاخر رجعتلو

بس على قولتك جد بشتاق للتون القديم وللاعضاء الي عرفناهم هناك ،
لحد هسا بتذكر ايامي معاهم وما نسيتهم ، بس ما بعرف شي عنهم وكل واحد بحياته ،
جد محزن ، خاصة لو كنا نعرفهم عن قرب

بس ضحكتيني وانتِ تحكي عن لقبك
ترا انا كتبت هون بالمدونة شو كان اسمي وهاي رح ارجع اكتبه ( Daniel lover )

على قولتك شو كنا نفكر يا بنت الحلال

هاتِ قولي اسمك وما تستحي يلا او ابعتيلي بالخاص

اكيد ما رح اعرفك لانه الناس الي كنت اعرفهم مش كثر مقارنة بالاعضاء الموجودين لانه كثير كان فيه اعضاء

بتذكر كان في صديق اسمه فرعون المنتدى مصري وكان 13 سنة عمره ،
كان صغير وكل ما اغيب هو اكثر حد يسأل عني وكثير كان يحترمني ويعاملني انه كأخته الكبيرة

وروزاليندا يلي هي اجت هون بس غابت وتركت ،
كانت من اكثر الاشخاص المؤثرين فيي وفي شخصيتي لأنها كانت رائعة بكل ما تحمل الكلمة من معنى ،
بشوف اخبارها عتويتر ، ضفتها بعد سنين

وكان في واحد اسمه هاري بوتر بس اسمه ادم من الجزائر ، كمان كثير كان كويس ومحترم جدا
ورنا الفلسطينية يلي كنا الروح بالروح وضلينا عتواصل لفترة بعدها انقطع التواصل بيننا ، الله يوفقها وين ما كانت

وكالن العراقية واختها دوف واخوهم احمد – يلي هو سكاي- ،

كانو من اروع البنات الي عرفتهم خاصة كالن ،
كمان من الشخصيات الي كنت قريبة منها وأثرت فيي كثير ،
وتواصلنا برا فترة بعدها انقطع التواصل بسبب الاحداث الي صارت عندهم

وغيرهم كثير يلي مش عارفة اتذكر اساميهم ،
جد الواحد كل ما كبر بتصير بعض الذكريات تتفلت منه

وبخصوص هل زمن المنتديات راح؟
اه طبعا راح وراح وانتهى واندثر ، بس تجيبي سيرتهم بستغربو الناس انه لسا بتفوتي ،

ليش؟
السبب واضح خلص الناس بطلت اهتماماتها بالمنتديات خاصة انه كل شي متوفر عالنت ،
فأي حد بدو أي فيلم أي مسلسل أي كتاب حتى او أي انمي او أي برنامج ،
كله بتلاقيه بمواقع عالانترنت ، زمان كان الاعتماد عالمنتديات لانه اشخاص محددين الي بفهمو لهالشغلات وكيف ينزلو ،
اليوم لا صار متوفر واليوم الكل بعرف يجيب أي شي

والسبب الثاني هو بسبب اكتساح مواقع التواصل الساحة واستحواذها على عقول الناس صغير ولا كبير ،
فأكيد محدا رح يدخل منتديات وهو مركز على مواقع التواصل خاصة انه احنا في عصر التفاهة ،
والعالم كله لااحق هالتفاهة سواء عرب ولا اجانب

فأكيد خلص زمن المنتديات انتهى ،
وحتى التون للأسف واضح فيه قلة النشاط والخمول وما اعتقد يرجع مثل عهده زمان

بالنسبة الي انا حبيت جو المنتدى اكثر ،
بفوت مواقع التواصل بس الحمد لله مش مدمنة عليها نهائيا وبستخدمها للفايدة وعشان انشر فكري خاصة عالفيس ،
بس المنتدى احلى والناس الي فيه احسن ، والحلو فيه انه الكل بحترم الكل بغض النظر لو انت مثلا ما تستلطف حد معين بس الجو العام في المنتدى هو الاحترام بيننا والانضباط ،
وهو هاد الحلو فيه ، وفيه كثير بستمتعوا بمساعدة بعض بمحبة ،
لو بدنا نضل نحكي عن المنتديات ما نخلص ،
بس هيك حبيت جاوب عسؤالك وكلامك ذكرني بأيامي الحلوة بالقديم وقلت اتذكرها بتدوينة

​

 

[A S T E R]

16/6/2015 – 16/6/2023

لقد مضت 8 سنوات على أول مرة أحسست فيها بأن العالم بأسره لن يخفف عني ألمي

ثمان سنوات مرت على أول مرة ضحكت فيها من قلبي ضحكة مثقلة بالتعب والإرهااق حينما رأيت ابنتي البكر لأول مرة

ثمان سنوات مرت على أجمل وأفضل شعور في حياتي

لقد اعتقدت وقتها لوهلة بأنني في حلم ،
ليس بأن الأمر كان مستحيلاً ، لا ،
ولكن بسبب أنني لم أكن أستوعب أنني أصبحت أم

انشطرت مني روحاً تقاسمني كل شيء ،
سواء في شكلها في عقلها في قلبها في ضحكتها الساحرة

ثمان سنوات مرت وهي تكبر أمام عيني وكلي فخر بها وبشخصيتها وبشقاوتها وحنيتها المفرطة وإحساسها بالمسؤولية ،
وكلي يقين وأملي بالله كبير بأنها ستبقى على هذا الحال وأفضل حينما تكبر ، بالاستعانة بالله في تربيتها

حبيبتي رواء ،
يكفي حرف الراء في اسمها يحمل كل الرقة ، مثلها تماماً

لن أستطيع أن أوفي حقها في الوصف فهي ألطف الأطفال وأحنّهم وأجملهم ،
اعلم بأنها ليست فائقة الجمال في نظر غيري ولكنها في نظري جميلة الجميلات

وبإذن الله سأبقى على هذا المنوال في تربيتها لتكون من الصالحات المصلحات الفالحات في الدنيا والاخرة ،
وأن تصبح ناجحة في حياتها وفي تعليمها ومعاملتها للناس ، تماماً كما علمتني أمي أن أكون

الله يقدرني على تربيتها وتربية خواتها تربية صالحة ،
والله يعيني أنا وياهن على صعاب الحياة ونكون سند لبعض يارب

ما بتتصوروا هيك شو مبسوطة فيها وشو بحبها رورو ،
والله ما بميز بينهم نهائياً ، لا بالقول ولا بالفعل ،،،
بس صدقاً الشي مش بإيدي رورو الها معزة خاصة بين خواتها ،
ورح تضل معزتها خاصة حتى لو جبت اطفال ثانيين سواء ذكور او اناث

كبرت اسم الله عليها ، الله يحميها ويحفظها يارب ، ادعولها

اول ما فتحت المدونة كانو صغار وكنت دايما اكتب انه مسك مجننتني

هسا خلص كبروا وجبت وحدة ثالثة تجنني

رواء اليوم صارت 8

مسك 6 ونص

وسلمى رح تصير سنتين الاسبوع الجاي

ولساتهم كلهم بجننوني بس مش مثل زمان ،
اليوم خلص بس سلمى مشيبتني

الله المستعان



في أمان الله

اه صح يسلمو يا @Detective JoulZ على الطقم الخرافي ، ابدعتِ

​

 

[A S T E R]

السلام عليكم ورحمة الله وبركاته​

تابع لفعالية الأسبوع​

كيف تٌعالج مزاجك؟ ما هي الأمور التي تجعلك تشعر بالمتعة ؟
او بالعامية شي ترتاح وتروق فيه لما تكون مضايق وطفشان
دعونا نستمع لأذواقكم المختلفة ​

بكل صراحة ، هذا الموضوع حساس بالنسبة لي

لم ذلك ؟

لأنها تمر عليّ أوقات كثيرة أشعر بخنقة واكتئاب و- طفشان-

أحب فيها أن أقوم بأمور تخفف عني ولكنني لا أفعلها لأنها غير متاحة لي طول الوقت بحكم أنني أم ،
وليس من المنطق أن أقوم وأخرج وأترك ورائي ثلاث أطفال فقط من أجل أن أرفّه عن نفسي

سيقول أحدكم بأن آخذهم معي ، ولكنه ليس بالمنطق ،
ذلك لأنه لن تتصوروا مقدار الإزعاج عندما تصحب أطفالك معك ، وأنت ذاهب للروقان وليس ان تنزعج وترجع

لست بصدد التذمر أو عدم احتمال مسؤولية أطفالي ،
ولكنه فعلاً أمر مرهق ، أن لا تستطيع الذهاب إلى أي مكان وقت ما تشاء ، بسبب الأطفال وبسبب الأوضاع السائدة عندنا

ولكنني سأخبركم ما يجعلني في مزاج جيد ،

إن كنت أستطيع الخروج فإنني أفضل الركوب في سيارة والذهاب إلى أي مدينة أخرى غير مدينتي ،
والاستمتاع بكوب قهوة والنظر إلى جمال بلادي برغم المنغصات التي أراها – وأقصد بها اليهود –
هذا أكثر شيء يجعلني سعيدة جداً ،
وليس شرطاً أن أذهب إلى مكان معين ، فقط البقاء في السيارة مع شيء أشربه واغنية أسمعها يجعلني في قمة السعادة

ولكن ، نرجع إلى الواقع الحزين

إنني لا أفعل هذا الأمر غير كل شهرين أو 3 أو 4 وأحياناً تمر سنة دون أن أخرج من المدينة ...

عوضاً عن ذلك أحاول الترفيه عن نفسي بالذهاب إلى أرضنا والاستمتاع بكوب من الشاي على النار ،
خاصة في الليل ، فهذا الأمر يشعرني ولو للحظات بالروقان ولكن هذا الروقان يقطع بأصوات بناتي وهنّ يتقاتلن
كما أقول لكم ليس هنالك مجال لمثل هذه الأمور في حياة الأم ،
إلا إذا ذهبت بعيداً عن أطفالها في رحلة استرخاء لعدة أيام – وأنا يستحيل أن أفعلها –
بمجرد أن أصبحت أم وجب علي أن أتحمل وأستغني عن أمور من أجلهم ،
ولماذا سمينا أمهات والجنة تحت أقدامنا ؟

بسبب ما تتحمله الأم كل يوم وتضحي بكل شيء حتى براحتها من أجل أطفالها ،
لا أحب كلام الأمهات اللواتي يقلن بأنه من حق الأم الابتعاد عن أطفالها عدة ايام من أجل الترفيه عن نفسها ! ،
لا أقول أننا لسنا بحاجة إلى الترفيه ، بلى ، ولكن مع أطفالك ، أو لا تذهبي على الإطلاق
- بالنسبة لي أخرج بدونهن لمدة أقل من يوم ليس أكثر -

الأمومة أمر عظيم ، لا يقدرنه أمهات اليوم ، والأنانية تلازمهن ،
لا يستوعبن بأنها ما أن أصبحت أم فهي يجب أن تضحي بكل شيء من أجل أطفالها ،
لا أقول بأن لا تهتم بنفسها أو لا تخرج نهائياً ، ولكن بالمعقول

عندما لا أستطيع الخروج من المنزل ،
أكتفي بصنع شيء لأشربه ومتابعة مسلسل أو فيلم لوحدي آخر الليل بعدما أقوم بتنييمهن ،
أو أقرأ كتاباً أحبه ، هذا الأمر البسيط كفيل بأن يخرجني من حالة الطفش او القرف

ومن الأشياء التي تجعلني سعيدة هي التجمعات العائلية البسيطة ،
مثل اجتماع أهلي وأخوتي وخواتي ، أو اجتماع أهل زوجي ، ذلك لأنني مخلوق اجتماعي ويحب الناس ،
فرؤية الناس والحديث معهم تخرجني من المزاج السيء

كما الحديث معك يا غالية @RO-CHAN ،،

صراحة فعلاً ودون مبالغة ،
لم اعتقد في يوم بأن ألتقي بشخص الكترونيا ،
ويكون بالنسبة لي الصديق الثابت المميز الحنون والذي اضحك معه واشكي له وينقلب مزاجي في لحظة من حزينة إلى سعيدة ، حفظك الله



إلى هنا انتهبت

شكراً على القراءة لكل من قرأ

دمتم بود

​

 

[A S T E R]

​

سؤالي إذا هل ستتنازل أم لا؟
وأعتذر لايوجد وسط بينهما، ومن يتنازل قليلا يتنازل كثيرا ... وليس لزاما أن يتصور الأمر على أنه مسابقة لتحديد
الألفا، فيمكن ان يكونا إعتمادا وإسنادا ودعما وثقة في الطرف أو الأطراف الأخرين لقيادة تلك الدفة.
سؤالي بصيغة أخرى، هل ستقود أم تقاد ؟ ..
(بليز لا أحد يقول لي نص نص لاني للحين ما شفت أكثر من رئيس واحد يمثل كل بلد)
هو فقط سؤال أريد أن أحرك به فكرة و تساءل معين عن مدى اهمية العلاقة لك وأي دور ستلعب مدافع أم مهاجم ..​

يسعد أوقاتكم

قبل شوي قرأت تدوينة الغالية ساي
وذكرتني اني قلت مع حالي اني رح اجاوب على سؤال أخونا @ENORI من لما قرأت تدوينته
حتى وقتها قلت لرو قريت شي حلو عند اينوري وبدي جاوب عالسؤال بتدوينة ولهسا بصحلي لأني بضل انسى

صحيح أتفق معك في جزئية أنه لا يوجد وسط
فإما أن تكون قائد وإما أن تكون مقود
ولكن أحياناً هناك نوع من العلاقات يحدث فيها أن لا تكون القيادة التامة لطرف واحد

بالنسبة لي وعلى مدار ثلاثون عاماً
اختلفت كثيراً
فمثلاً في المدرسة كنت أقود
حتى أنني رشحت احد المرات لأن اكون رئيسة مجلس الطلبة وقد كان لأول مرة يشكل حينها
ولكنني رفضت لأسباب تتعلق بالخروج من المدرسة وأهلي يرفضون ذلك

في علاقتي مع أخواتي ، كنت دائما أحب أن اكون القائدة حتى على اختي الاكبر مني

ولكن ،،
عندما تزوجت ، اختلف الأمر
ففي علاقة الزواج ، الأمر ليس هناك قائد ومقود
هناك اثنين اجتمعا على أن يكونا عائلة قائمة على التقوى وتربية الأبناء تربية صالحة
كل منهما يأخذ بيد الآحر نحو الطريق الصحيح ويدعمه ويقومه
هما ليسا في حرب بين ادم وحواء كما توضحها فكر النسوية
بل هما في علاقة صحبة قائمة على المودة والرحمة
- لا حد يجي يقولي عن واقع بعض الازواج السيئين حاليا لاني بحكي عن الوضع الطبيعي والفهم الواضح للعلاقة من وجهة نظر صحيحة اسلامية -
فبالنهاية كل ما يحدث بينهما ناجم عن تفاهم ووفاق بينهما
ولا يحتاجا إلى قيادة
والقوامة التي هي للرجل ، هي ليست قوامة تسلط وحكم بل هي قوامة رعاية وحفاظ على الأساس في البيت

لذلك في علاقتي مع زوجي
فإنني لا أسعى أن أقود انا الاسرة ، على العكس ، من باب الثقة والمودة والدعم له فإنني مسلمة له الدفه

ولكنني من وجهة نظري علاقة الزوجين لا وجود للقائد والمقود اساسا ولكنني أجبت على ذلك بسبب انتشار فكرة من يدير شؤون الاسرة اكثر ، الرجل ام المرأة
ولكنه في الحقيقة هو امر مشترك بينهما

وفي الحياة بشكل عام ، استطيع القول بأنني أصبحت أميل للتنازل
كما ذكرت @SAIRYU وصلت لمرحلة لا يوجد طاقة ، ولكن عندما يتعلق الأمر بالمبادئ والقيم فإنني لا انقاد نهائياً ولا أتنازل
ولكن في الامور الدنيوية العادية فإنني اسلم الدفة على قول اينوري من باب ثقتي فيمن يقود سواء كان زوج او غيره

لا أدري اذا شطحت كثير عن الموضوع
بس ما بعرف حبيت اتفلسف شوي وكان هالكلام ببالي من اول ما قرأت السؤال

​

 

[A S T E R]

تابع لفعالية شهر 7

​

فعالية شهر يوليو

جميعنا نملك خيال، مهما كان حدوده ضيق أم واسع
لكنه وبلا ادنى شك يعيننا على مرارة الواقع! ويضيف ألواناً على صفحتنا الرمادية
لو كان بيدك اختراع شخصية خيالية، لـ حكاية، او لتمثيلية درامية!
او حتى ان يكون صديق من خيالك تحدثه بدلاً من مخاطبة نفسك! حدد النوع..
وأخبرنا كيف ستكون هذه الشخصية؟ صفها لنا شكلاً وروحاً وطبعاً!
وما الشيء الذي جعلك تختار هكذا صفات ؟
​

كمان هون رح اتفلسف شوي

بكل صراحة ،، لا أمتلك خيالاً واسعاً
مع أنني كلما تذكرت نفسي في سن الخامسة عشر وقررت وقتها أن أكتب قصص قصيرة
وبالفعل قمت بكتابة أربع قصص ، واحدة منها شجعتني على نشرها هنا وهي ألما @MAYURA

الذي يود الاطلاع عليها
هاي هي هنا

الختم الذهبي - قصة:: قلادة الصداقة

السلام عليكم ورحمة الله وبركاته،، كيف حالكم أعضاء أنمي تون الغاليين؟ لأول مرة رح أنزل شي في هذا القسم من المنتدى ، سواء من لما كنت بالقديم، أو حالياً وبما إنو صديقتي الغالية Alma على قلبي وأول إنسانة تعرفت عليها، من بعد ما رجعت للأنمي ، وبسبب نقها إني أنزل شي هون،ه1 قررت أنزل هالقصة،،بتمنى...

www.anime-tooon.com

القصص الأخرى بصراحة سخيفة وخيالية جداً
كنت متأثرة ما أشاهده على التلفاز من انمي أو افلام

ومع ذلك وإلى هذه اللحظة ، محتفظة بالدفتر الذي كتبت فيه تلك القصص ، وأضحك على نفسي كثيراً وعلى خيالي
أتذكر أنني جعلت أحدى اخواتي قرائتها ، ومن صديقاتي
- الى الآن نادمة على ذلك -

لا أدري لمَ لم أنمّي قدرتي على الكتابة القصصية وتنمية خيالي
أعتقد أن السبب هو مجرى حياتي الذي أخذ منحى آخر لم أكن أتوقع أنه سيحدق بهذه السرعة

ولكن ،
لنعد إلى ابتكار شخصية خيالية
بالنسبة لي دائماً أحدث نفسي ولم أتخيل شخصية أخرى ،
وإن كنت سأرسم شخصية خيالية في عقلي
فسوف أختار حيواناً لطيفاً مثل البومة اعتقد
أذهب إليها كلما جد معي أمر ما ،، أو كنت متضايقة او حزينة
وطبعاً ستكون ناطقة لأخذ مشورتها في كل أمر معي
لا أدري ولكنني اعتقد ما زلت متأثرة في شخصية البومة الحكيمة في بعض الانميات التي شاهدتها في صغري
كنت اعجب بها جدا واحبها
لذلك ان كنت سأتخيل نفسي مع شخصية خيالية فسأختارها هي من بين اي شخصية
ستكون بومة هادئة ورزينة وحكيمة وصوتها عذب ، وعيونها جميلة
-ما بعرف اذا في حدا مثلي بس انا بحب عيونهمم -

وتكون جالسة على غصن شجرة
كلما حدث معي شيء هرعت إليها لأشكي لها همي



في المجمل
نحن في خيالنا نرسم ما هو غير موجود وخيالي وما نتمنى أن يصير
أو نتمنى أن نصبح عليه في يوم من الايام
إن لخيالنا مهرباً ومتنفساً ليس من الواقع على ما اعتقد
بل هرباً من ذواتنا إلى شخصيات إما نطمح أن نكونها أو شخصيات داعمة لنا ولكننا لم نتلق الدعم بالواقع
إن الواقع كئيب والحياة كلها ليست وردية
ونحن في دار كبد وتعب ومشقة
فنقوم رسم خيالاتنا وتصوراتنا متجسدة إما في شخصيات اخرى ، أو نسخ اخرى من شخصيتنا أو احدث وفيرها

ولكن ، لا تجعلوها تسيطر عليكم فتغرقوا فيها
وتصابوا بصدمة الواقع الذي أنت فيه
وتنسى محاولة التغيير سواء في نفسك أو واقعك




ملاحظة : في النهاية حابة أحكي شغلة انه لا تفهموا قصدي ان ممكن الشخص ما يكون راضي عن نفسه
كلنا راضيين عن انفسنا ولكن بدرجات مختلفة
وكلنا لنا مميزات وعيوب ونطمح لان نكون الافضل
والهروب من الوقع الى الخيال يشكل منفساً لنا ولكننا في النهاية رجوعنا واستعانتنا دائماً بالله
فلذلك أذكر نفسي وإياكم دائماً بالاستعانة بالله في تعغيير أنفسنا أو واقعنا


-فش فايدة لازم اقلبها فلسفة وحكي زيادة -

تصبحون على خير

​