مدونة متألقة في مٌحادثة عميقة مع " الفوضى _ (2 زائر)

[Selene]

بشهر 5 سافرت لجزر الكناري و كانت اول سفرة الي بالطيارة من لما سكنت بألمانيا
ف حسيت بوقتها اني طلعت من الاتحاد الاوروبي بس كنت لساتني فيه لأنها تعتبر
إسبانية , المهم مابعرف كيف اشرحلكم انو لما وصلت هنيك ما بحكيلكم ما انبسطت
مبلا انبسطت لانو ما شفت البحر من 2017 و اشتقت لجو البحر و سهراتو بس
حسيت بإنتماء فظيع لالمانيا , حسيت اني مو مرتاحة نفسيا , و ما بعرف و ماكنت
استوعب كيف الناس بتحب تسافر كتير ؟ حسيت اني شخص مو بس بيتوتي ( بحب ضل بالبيت
اكتر من اني اطلع ) طلعت كمان ( دولديدية ) يعني ما بحب اطلع من الدولة الي
انا فيها بالرغم من انو هون الروتين قاتل مو بس ممل بس ما بعرف حسيت ضايق خلقي
و من تاني يوم للسفرة و انا عم عد الأيام لأيمت ارجع لألمانيا

و والله العطيم لما كنت بالطيارة بالرجعة كنت جمب الشباك , لما شفت المانيا من فوق
حكيت الله عدناااا الى الووطن و كنت طايرة فرح و اهلي كلهم كانوا زعلانين انن راجعين
الا انا , حكيت ياااااااااي رجعت للوطن

حسيت رجعتلي روحي . انا بعرف انو هي حالة نفسية بتكون موجودة عند اشخاص و أشخاص لأ
يمكن هاد اقرب جواب قدرت اوصلو انو كيف في ناس بتحب تسافر كتير

اوكي السفر حلو و بيبني الشخص خبرات و تجارب بس ما بقدر ابعد عن مكان الي بعيش
فيه كتير بحس ما بعرف كيف اوصفلكم الاحساس بصراحة

و لما رجعت لبيتي , حكيت يالله ما احلى البيت و لما صرت اسمع الماني و احكي الماني
احكي يالله ما احلى هاللغة مع اني ما كتير فان للغة بس حسيت اني حبيتها اكتر لما
ما كنت اسمعها كل يوم ! كل شي اشتقتلها كأني غبت عنها سنة مو اسبوع

حكيت ببالي انا هلأ عرفت انو انا جوي مو جو سفر ابداَ ممكن اني سافر3-4 أيام اكتر شي
اما اسبوع ؟ لا اسفة

ان شاء الله رح ورجيكم جمال هالمكان قريباَ بتدوينة منفصلة

دمتم بخير ​

 

[Selene]

​

الفعالية الأسبوعية

كيف تٌعالج مزاجك؟ ما هي الأمور التي تجعلك تشعر بالمتعة ؟
او بالعامية شي ترتاح وتروق فيه لما تكون مضايق وطفشان
دعونا نستمع لأذواقكم المختلفة ​

في كتير شغلات بتخليني روق :

1- الرياضة اكيد و خاصةَ رفع الأثقال لأنو بتخليني فرغ غضبي عن طريقها و الرياضة بشكل
عام بتفرز هرمون السعادة و آخر التمرين ما بضل عندي اي طاقة اني فكر بشي سلبي

2- الأركيلة - مو طبيعي اديه بتخليني روق خاصةَ اذا في أجواء حلوة متل أغاني أو فلم أو شخصي المفضل معي
.
3- اني احضر انمي أو تابع مسلسل , لأن هالشي رح يلهي تفكيري و ممكن يعدل مزاجي اذا كان كوميدي

4- اني كون جمب ناس بحبهم و بخلوني فضفض متل اهلي و الحب
.
5- اني اقعد ع اللاب و بالأخص اني صمم لأن التصميم بخليني بعالم تاني تماماَ

6- اني العب سكيت Inline Skating يعني ما تتخيلوا اديش هالشي بخليني روق


​

 

[Selene]

هالتدوينة رح تكون عن سفرتي لجزر الكناري

محتوى مخفي: اضغطوا هون لتشوفوا التدوينة ;)

طبعاَ رح تنسحروا من جمالها لأنو ما شفت هيك جمال ابداَ بالأخص الرمل البركاني !!

جزر الكناري هن 8 جزر و نحن رحنا على جزيرة اسما (

محتوى مخفي: اضغطوا هون لتشوفوا التدوينة ;)

Las Palmas )

https://www.facebook.com/video.php?v=949204756409933

هاد فديو صورتو للرمل البركاني و لو ركزتوا رح تشوفوا انو بيلمع نفس الألماس

طبعاَ بالحقيقة غير , بالحقيقة بيلمع بشكل خيالي بكل الأوقات حتى بليل

https://www.facebook.com/video.php?v=636688145067935

بهل المنطقة مافي كاسر أمواج ف بتشوفوا كتير ناس بمارسوا رياضة الركمجة

https://www.facebook.com/video.php?v=184504987641355

و هون المفروض تعتبر من العجائب السبعة من شدة جمال هالمكان

تخيلوا كنا نشوف ببرامج الأطفال صحراء و بعدا بحر , ما كنت صدق انو ممكن هيك منظر يكون موجود !

لحتى رحت على هالشاطىء اسمو Dunas de Maspalomas

عنجد كانت تجربة كتيييير حلوة لألي , خاصةَ انو الرمل ناااعم بشكل و طبعاَ اخدنا كتير صور هنيك

https://www.facebook.com/video.php?v=954576495788993

ممكن يكون هالفديو اوضح للبحر و الصحراء مع بعض

https://www.facebook.com/video.php?v=3409720932575161

مشان تشوفوا صفاوة المي !!!
هالمكان اسمو Puerto De Agaete

https://www.facebook.com/video.php?v=1040961913941363

https://www.facebook.com/video.php?v=824958885667441

https://www.facebook.com/video.php?v=816431676287141

https://www.facebook.com/video.php?v=1002872147557493

انسحرتوا من المنظر متلي !!

هدول كلن من نفس المكان , ميناء Agaete

https://www.facebook.com/video.php?v=968382087816110

هالمكان اسمو Caleta de Abajo هالمكان عنجد خيااااالي بشكل !
عبارة عن ممر صخري بكون طويل و داخل جوا البحر
ف بتشوفوا الموج عن قريب و صفاوة المي بتاخد العقل !

https://www.facebook.com/video.php?v=659663889401080

https://www.facebook.com/video.php?v=230394463135916

https://www.facebook.com/video.php?v=3582717485337770

بتحسوا المي شكلا غريب عنجد مو نفس المي الي منشوفا كل يوم !

https://www.facebook.com/video.php?v=805161350960883

https://www.facebook.com/video.php?v=654979349528244

عنجد انو هالمكان مٌهيب !!

https://www.facebook.com/video.php?v=287805910325201

https://www.facebook.com/video.php?v=167063009691234

قلت ما بخليا بخاطركم هاد فديو مصورة فيه السمك و هو بالمي من كتر ماهي صافية

https://www.facebook.com/video.php?v=971457247403470

هاد الفديو من ميناء Mogen

https://www.facebook.com/video.php?v=267100752665924

هون كنا ع قمة جبل و نسيت اي جبل

https://www.facebook.com/video.php?v=1306039836647953

https://www.facebook.com/video.php?v=956170108919918

https://www.facebook.com/video.php?v=1773618639756843

هالمكان اسمو Playa de Veneguera

هون الطريق الي بودي للشاطىء النائي الموجود بالفديوين السابقين , و كان طريق عنجد صعب
و طويل بس شو بدكن بالحكي بيستاهل هالتعب !

طبعاَ ما تتخيلوا اديه مليان صبار ع الطريق الي بودي ع الشاطىء ! صبار من كل الانواع كأنو هنيك موطنها !

هالشاطىء كلو بركاني , الرمل كان كلو أسود و بيلمع نفس اول فديو حطيتو
و المي صااااااااافية و حلوة و الرمل ناعم و نضيف

حرفياَ ما كان في حدا غيرنا ع هالشط لأنو مو سياحي و صعب الوصول الو

https://www.facebook.com/video.php?v=224121463783583

اما هون عبارة عن مسابح طبيعية , بتكون محوطة بصخور ( عاملة شكل المسبح ) و لما يصير مد , مي البحر بتدخل و بتنحبس جوا
و هالمكان مجهز بكل شي حرفياَ من غرف تبديل لحمامات و حتى المسبح نفسو فيه مكان لتطلع و تدخل عليه نفس المسبح العادي

اسم هالمكان Roque prieto pools

https://www.facebook.com/video.php?v=1312702912663570

و هون صورت من فوق للبحر

https://www.facebook.com/video.php?v=6562447103815012

https://www.facebook.com/video.php?v=808461367227919

https://www.facebook.com/video.php?v=278327748016955

https://www.facebook.com/video.php?v=822982726125210

https://www.facebook.com/video.php?v=785056566684599

^ هدول الغيوم ع فكرة

بالإضافة بهل الفديوات كنا ع قمم بركانية مختلفة

https://www.facebook.com/video.php?v=281799577549689

هون كنا ع قمة جبل بركاني اسمو Pico de Pandama

شوفوا جمال الصور !

​

محتوى مخفي: اضغطوا هون لتشوفوا التدوينة ;)

​

​

بالصور السابقة اسم المكان : Jardin de la Marquesa

عبارة عن حديقة نباتات طبيعية , النباتات الي فيها معمرة و طبعاَ واضح هالشي من الصور !

عندكم أشجار الصبار لتوصل لهيك نمو بدها سنوات ! و هاد غير بتلاقوا زرعاتكم المفضلة الي عندكم بالبيت
بهل المكان بس بقد 10 اضعاف الي عندكم !

أغلب أنواع الزرع موجود هنيك و الي بيصدم أكتر , الي بيزرع و بحب عالم النباتات بيعرف انو في انواع نباتات بدها بيئة
معينة و دلوعة كتير يعني اي تغيير بسيط بتموت , هالنباتات كمان كانت موجودة هنيك و بأحجام كبيرة و هالشي الي صدمني !

انو اديش هالمكان عليه عناية و متابعة لموصلين هالنباتات لهيك أحجام ؟

هالمكان عنجد عنجد من أكتر الأماكن الي تستحق الزيارة و للأسف ماعندي ولا فديو الها من كتر ما سحرتني !

بالاضافة هالمكان فيو كمية طواويس بأعداد مو طبيعية ! و الأحلى من هيك رح تشوفوا صغارهم بيمشوا جمبهم

^ حتى نقشت اسمي على صبارة

هون بمطار لاس بالماس و نحنا راجعين, في فوق تراس خاص للمدخنين جمب الباب في هالصبار الموجود بالصورة
و متل مو شايفين في ناس ناقشين أسمائهم عليها كذكرى لو رجعولها ف انا نقشت اسمي عليها معهم

​

هاد ميناء Agaete​

هون الغروب من شاطىء لاس بالماس , اديشو حلو !
​

و هون صورت الغابات , تابعة للفديوات الي فوق

​

 

[Selene]

انا جديدة ع موضوع النباتات و الإعتناء فيها , ف شخص عزيز علي
هداني نبتة الأوركيد و معروفة انها نبتة دلوعة بشكل مو طبيعي , ممكن
بسبب أي تغيير بسيط أنها تموت !

مثال ع هالتغييرات :

1- لو مثلاَ كنتوا حاطينها بمكان معين نقول جمب التلفزيون , اذا شلتوها
و حطيتوها بغرفة النوم ممكن انها تموت . سألت امي و أخي و عرفت انو
هالنبتة ما بتحب تغيير المكان , خلص حطيناها بمكان معين خلوها فيه .

2- ممكن انها تموت لو نقلناها من قص لقص تاني , و هالحكي من تجربة
أخي , قلي كان عندو هالنبتة و كانت مزهرة و كل شي تمام , و لما نقلها
لقص تاني لأن هالقص كان مو مناسب ( صغير أو مافيه منفس من تحت )
ماتت معو .

3- ممكن انها تموت لو تعرض لأشعة الشمس زيادة عن اللزوم ,
معروفة الاوركيد نبتة منزلية و ما بتحتاج لأشعة شمس عالية .
ف ناخد بعين الإعتبار انو نحطها بمكان يجيه ضو شي بسيط .

4- النباتات عامة و بالأخص الاوركيد , كوني بألمانيا ف بفصل الشتاء
منشغل الشوفاج ( نفس المكيف بس بطلع حرارة ) ف من الخطأ ايضاَ
انو نحط اي زرعة و خاصةَ الأوركيد فوق الشوفاج ( بالغالب بكون فوق
الشوفاج رف ) ممكن انها تموت من شدة الحرارة .

5- الأوركيد نبتة تحتاج القليل من الماء , تحتاج سقي فقط يوم واحد
بالأسبوع و يفضل يكون بالمسا او الصبح بكير . و نحط ربع كاسة
مي بس , و لو زادت كمية المي أو سقيناها مرتين بالاسبوع ممكن تموت .

-

ف تخيلوا اني انا سويت معها رقم 1 و 4 و يعني كنت انتبه انها مو مبسوطة
بسبب انو أزهارها كانت عم تهر , فكرت انها عم تجددهم ما فكرت انها بهل
الحركة عم تموت ( بحكم اني ما عندي خبرة كافية بالزرع ) . حكتلي امي
عن موضوع السقي و اني ثبت يوم و ربع كاسة مي و اني شيلها من فوق
الشوفاج , و من ذكائي الخارق حطيتها على طاولة وكانت الطاولة جمب الشوفاج
و كمان ما فاد هالشي , كملت النبتة بهر أزهارها لحتى ما بقت ولا زهرة
و انا زعلت كتير لأني بحب هالزرعة لأنها من شخص عزيز علي ! و انا بعرف
انو البناتات بشكل عام لما تنهدى من شخص بتحبوه المفروض ما تموت لأنكم
بتحطوا حبكم فيها ( بعرف انها خرافة ) و لو ماتت يعني انكم ما بتحبو هالشخص
و انا جد تضايقت مع اني كنت اهتم فيها .

وصلت الزرعة لمرحلة انو أطراف ساقها يبست و صار لونهم أصفر و انا
هون تضايقت بزيادة و فهمت انها ماتت . قمت شلتها من الصالون و حطيتها
بالمطبخ على اساس اني كبها , و كنت دائما انسى اسأل وين بتنكب ( لأن
هون كل شي معين الو مكان خاص للكب ) ف راحت الايام و ضلت
أسبوعين بالمطبخ , مع اني ما كنت اسقيها لأني كنت متأكدة انها ماتت
ما بعرف كيف , قمت انتبهت انها عم تطلع براعم صغيرة ع طرف
الساق و انا استغربت و عرفت انها لسا ما ماتت , انبسطت خير الله .

و مو بسبب انو هالشخص هداني ياها ع آخر الشتاء ف لما اعتدل الجو
شلتها و حطيتها ع نفس الطاولة جمب الشباك بدون ما شغل الشوفاج لأنو
ماعاد في برد . و صرت اسقيها مرة بالاسبوع و عَيِر يوم و الي هو
كل سبت ( بحكم انها ويكند ) و صرت جيب قطنة و بللها مي و نضف
أوراقها و ساقها من الغبرة , و هيك بعد اسبوع تقريباَ فتحت أول
زهرة , انا هون انبسطت كتير و لما اختي اجت لعندي و شافتها انصدمت !
حكتلي لك كيف عاشت عندك هي ؟ حكيتلها ما بعرف حطيتها
بالمطبخ اسبوعين و عاشت لحالها . حكتلي انو هالزرعة اذا دخلت
بمرحلة انها بدها تموت مستحيل تعيش لأنها دلوعة و حكتلي وقتها
قصة اخي ( مع انو اخي خبيرة بالزرع بس ما بعرف كيف زبطت
معي و عاشت عندي ) و حكتلي كمان أنو غريب عاشت لأنو
القص الي حطيتيها فيه صغير و مسكر من تحت , ف المفروض
انو الزرعة تضايق او تعمل ردة فعل بس ما بعرف كيف عاشت !

و هون عرفت انو هالمقولة صحيحة انو لما تنهدى الزرعة
من شخص بتحبوه و بتعطوها الحب بتعيش

و هلأ حاسة الزرعة نفس بنتي الصغيرة مستحيل انسى ولو للحظة
اني اسقيها او اهتم فيها , و هلأ فتحت 5 أزهار و طبعاَ اخدوا وقت
و مطلعة براعم كتار و كلهم رح يفتحوا قريب

انا كتير مبسوطة انها عاشت , صحيح انو ما عندي الخبرة الكافية
بالزرع عامة و بالاوركيد خاصة , بس ما كانت نيتي انها تموت
حاولت بشتى الطرق اني خليها تعيش و مشان هيك زعلت لما فكرت
انها ماتت !

و هلأ رح ورجيكم صور كيف صارت الزرعة و شوفوا براعمها
ما احلاهم !!

_________________________________________________________________


​

 

[Selene]

أي شخصية خارقة كنت تتمنى أن تصبح مثلها عندما كنت صغيراً؟ وما سبب حبك لها او امنيتك هذه؟ حدثنا عنها
لأجعل السؤال بنطاق أوسع يمكنك اعتبار الشخصية من كرتون او انمي او فيلم او شخص واقعي تمنيت من صغرك ان تكون مثله

​

اكتر شخصية كان نفسي كون متلها هي سوبر مان !
اكتر شخصية خيالية بعشقها !

يعني كاريزما , جاذبية , قوة و فخامة كلها موجودة بنفس الشخصية !

طبعاَ تحية خاصة للممثل هانري كافيل لأنو اقتبس الشخصية بشكل احترافي !

و انا اساساَ حبيتها منو !!

وطبعاَ نزل مسلسل سوبر غيرل الي اقتبست دور المرأة على انها سوبروومن

طبعاَ هون و حتى و انا عمري 28 بتخيل اني كون مكانها !​

 

[Selene]

-




متخيلين انو انا اعتبر بدولة عالم اول و منزلين قانون بخص المعسل
و هالقانون الصراحة يعني غبي !

تخيلوا بعد ما مسك الرئاسة حزب الخضر و الي هو يعتبر مع البيئة
نزل قرار انهم يمنعوا كل احجام المعسل من ربع كيلو و طالع نهائياَ
من السوق !

و الي ببيعهم بيسلخوا جلدو على عضمو !

و يعتمدوا العلبة الصغيرة الي بتعمل راس اركيلة واحد

و احزروا شو كمان ؟

العلبة الوحدة ب 4 يورو و نص بينما الربع كيلو كان سعرو يتفاوت
من 15 لِ 23 يورو و الكيلو لسا ارخص

طيب نفسي افهم لشو هيك قانون ؟ يعني قال يعني هيك هن
حموا البيئة ؟ ولا قللوا من المدخنين ؟

طيب ما كان الاولى انهم يشددوا على السجاير اولاَ بعدين يجوا لعنا ؟

لأن في كتير شباب و بنات صغار بالعمر حتى ما كملوا ال 18 سنة بدخنوا !

بينما الاركيلة اساساَ صعب انها تدخن بأي مكان

و فوق هاد اساساَ قبل هالقرار كان في تشديد على المحلات الي بتقدم اركيلة

انو ممنوع اي شخص تحت ال 18 سنة يفوت ! مو بس انو ما يأركل لا ممنوع يفوت !

عنجد مرات بحس المانيا مابتنزل قرارات صائبة و محدا بيعرف شو المغزى منها ؟

قال يعني مع البيئة !

اذا العلبة الوحدة فيها نايلون الي بكون حافظ للمعسل و تخيلوا لو واحد بأركل
كل يوم يعني 7 علب هاد اذا بس مرة باليوم يعني 7 اكياس نايلون


هلأ انا لا مع و لا ضد التدخين بس انو دولة على اساس فيها
حرية و هيك عملت . لكن على اي حرية بيحكوا عنها ؟

لا لا تحكولي عن الأل*** !

اي حريتهم معطوبة


و الي بستغرب فيه عنجد انو هون بشددوا مليون تشديد
ع التدخين و للشرب محدا هون ! ع اساس انو هو كتير
مفيد للصحة !

بتحسوا المشروب هون بالنسبة الهم متل الهوا الي بيتفسوه !

لا و فوق هاد احزروا شو !

رح يرفعوا اسعار منتجات كاملة الدسم من منتوجات الحليب نفس الجبنة , اللبنة , اللبن , الحليب و الزبدة , قال ليه ؟ لأنها مضرة للصحة
و انو في نسبة سمنة كبيرة بألمانيا !

و قال انو رح يخفضوا من سعر نفس المنتجات هي الي بتكون خالية الدسم او دسمها قليل

يعني والله ما بعرف ليه حسيت انو ( ام ) الي عم تنزل هالقوانين !

يعني شو دخلنا نحن انو ما ناكل كامل الدسم ؟ بس لأن كم شخص ماعم يعرفوا ينحفوا ؟

امانة الله مو مسخرة هي ! مرات بتجيني لحظات ما بطيق شي اسمو المانيا من ورا هالقرارت
الغريبة قبل ما تكون غبية !

مع انو نزلوا كم قرار هالفترة و كانوا مناح بس كمان هالقرارين يعتبروا مسخرة
ما بعرف ليه حاسة رح تصير هالدولة بيروقراطية ! و رح يصيروا يوجهونا بالغصب




​

 

[Selene]

بالرغم من انو الاسود والابيض هن الوان حيادية
بس الاسود يعتبر لون دافىء والابيض بارد

معلومة غريبة ، على اي اساس صنفوهم هالتصنيف ؟

نحن منعرف انو اللون الدافىء بكون فيه نسبة احمر كبيرة فيه والعكس بالبارد مع اللون الازرق

بس الابيض والاسود ؟ ​

 

[Selene]

-

من تحضيرات مهرجان

Landshut Hochzeit

ان شاء الله رح احكي فيه بتندوينة منفصلة

بس اسمعوا هالعزف ما احلاه

Halooooooooooooo​

 

[Selene]

-

" أيّ نوعٍ من المجانين أنا لدرجة أنّي حينما أفكّر في كل من حولي
لا أشعر إلّا بالازدراء؟ وكيف لي ألّا أزدري نفسي بالطريقة ذاتها؟
من أين يأتي حبي الغريب لنفسي، وأنا لستُ مختلفاً عن بقيّة شركائي
المواطنين السخفاء؟ - راي لوريغا .​

 

[Selene]

-




انا اليوم متت رسمي
لما خلص تمرين برتاح نفسياَ لاني سويت اهم شي باليوم
و هو اني روح اتمرن

بتقدروا تحكوا انو 75% من التعب بروح بس فكر اني خلصت تمرين و خلص صار وقت الراحة

اليوم تمرنت صدر و باي و ما تتخيلوا اديش حاسة جسمي من فوق عم يوجعني

خاصتاَ الباي منفوخة بشكل

انا ما كنت حب ابدا العب الجزء العلوي من جسمي قبل لأنو كتير ضعيف
و بحس بأوجاع رهيبة وقت و بعد التمرين ! و بالرغم من اني باخد اخف وزن
موجود و مع هيك كان بالنسبة الي صعب اني كمل العدات يعني بالمشرمحي
بدي وزن بدون وزن !!

المهم , بعد معاناة دامت لشهور ليوم الصدر , و حاول اني قوي الجزء العلوي
و خاصةَ منطقة الصدر , ف بلشت بوزن 2 كيلو و كانت ايدي ترتجف تخيلو
و هلأ وصلت احمل 8 كيلو و بدون رجفة ؟

اكتشفت لما العب كل عضلات جسمي رح اقوى كلني حتى لو ما كان اليوم يوم صدر

مثلاَ لما العب ضهر و تراي - هون رح تقوى التراي و اساساَ التراي عضلة مساعدة بتمرين
الصدر
ف لما تقووا كل عضلة بجسمكم رح تشيل عنكم حمل خاصةَ خاصةَ العضلات المساعدة
لأنها كتير بتساعر برفع الوزن أثناء التمرين ( التراي مثلاَ بيوم الصدر عضلة مساعدة )
فمن المهم انو نقويها و نعمللها تمارين خاصة
و انا وصلت هلأ لمرحلة انو سواعدي صاروا مناح , كبار نوعاَ ما و مشدودين عكس قبل
ف كانت ايدي بالاساس ما بتقدر تشيل الوزن لأنها ضعيفة فما بالكم الصدر ؟

- ف نحن دايماَ منعمل ( صدر و باي و ضهر و تراي ) الصدر بتشتغل معو التراي و الضهر بتشتغل معو الباي
ف مشان ما نتعب زيادة بالتمرين كون عضلة التراي بالاساس عم تتحرك مع تمرين الصدر ف منمرن الباي
و هيك مع تمرين الضهر , و بهل الحركة منكون حركنا العضلتين مع بعض بيومين مختلفين

- في منهم بيلعبوا ضهر و باي و صدر تراي بس هون رح يصير اصعب , تخيلوا انكم مثلاَ بتمرين الصدر
ال Flat Dumbbell Bench Press هون التراي عم تتحرك و عم يروح مخزون طاقتها بهل التمرين
ف تخيلوا تلعبوا كمان تمرين خاص للتراي ؟ هون رح يكون متعب بزيادة - بس رفيقي حكالي انو هو بالأساس
ما بيلعب كتير تمارين الها يعني تمرينين بس - بس بالنسبة الي انا بلعب 4 تمارين مشان هيك
بحب افصلها عن يوم الصدر , لان بحب ركز عليها بتمارين خاصة .

ف هل التمرين يعتبر اساسي بيوم الصدر و ممكن تختلف الزاوية تبعيتو و هالتمرين بالذات كتير بتتفعل
عضلة التراي فيها حتى رح تحسوا بانو ايدكم مشدودة من الجوانب .

-

و انا صرت كتير حب اتمرن صدر , هو بصراحة مو بس الصدر كل عضلة من جسمي غير الرجلين
مثلاَ الكتاف و الضهر ! ما تتخيلوا اديش بيفرق جسمكم , يعني مثلاَ الصدر بيعطيكم محيط مفصل ولما
تشدوا صدركم لقدام ( نفس ما واثق الخطوة بيمشي ) بكون شكلو احلا و هاد غير انو بشد المنطقة و بخفف
من الدهون بالمنطقة و هي تعتبر منطقة يعني غليظة من ناحية اللبس و ببين فيها الزوائد بشكل ملحوظ

اما الاكتاف مع انو هاليوم كريه بالنسبة الي بس وصلت لمرحلة فيه صار كتفي يتفصل و تبين العضلات فيه
و هون يعني كتير كتير كتير مهم انو يتمرن لأنو كتير منستخدم كتفنا بالحياة العملية و بساعدكم كتير لما تقووه
و هاد غير لما تمرنوه و تبرز العضلات هون كتفكم بيعرض و بصير احلا و بارز خاصةَ لما تمشوا و تفردوه بثقة
ببين اكتر و اكتر

اما الضهر اول سبب اني عم مرنو لأني بحب الفساتين المفتوح ضهرها و بشكل عام تاني جزء مثير
بعد الرجلين هو الضهر , و كتير صعب تلاقوا نتائج فيه لبعد فترة طويلة تقريباَ , لأنو الدهون كتير
بتتجمع حوالي الضهر من المنتصف و الجزء السفلي . و كمان لأنو يعتبر أهم جزء و هو مهم نفس
ما مهم نمرن رجلينا لأنو هو بشيلنا . فلما نقوي الضهر رح يستحمل ضغط أكتر . و فائد اضافية
أنو لما نمرن الضهر بساعد كتير للأشخاص الي عندهم انحاء بالمشي من الضهر , انو ما بكون ضهرهم
مستقيم , لأنو كل تمارين الضهر محتاجة انك تفرد ضهرك و تشدو و تخليه مستقيم مشان ما تجيك اصابة
ف هالشي من كتر التكرارات رح تاخدها عادة بالإضافة انو معروف بعد يوم الضهر رح تحس مشيتك اختلفت
لأنو ضهرك بتكون عضلاته شادة و اساساَ مارح تقدر تحنيه !

الرجلين كنت حب اتمرنها كتير بس هلأ لأ , لأني صرت اتعب كتير بتمارينها و اساساَ تماريني
مركزة و وقت الراحة كتير قليل ! و فوائد تمرين الرجلين لأنو بصراحة بحسو اهم جزء نفس
اهمية الضهر , لما تمرنوا رجليكم بتقوى الركبة و بتقوى العضلات المساعدة , حتى عضلة ال Glute
الي الاغلب بمرنها مشان الشكل و تناسى شو فوائد تمرينها , اساساَ هي بتساعد بشكل كبير بتخفيف الوزن
عن الركبة .

يعني انا هلأ عم اتمرن مو مشان شكل - الشكل هاد بالنسبة الي يعتبر بونص - بس مابدي لما اكبر بالعمر
كون متل هدول الناس الي بشوفهم قاعدين ع كرسي و مابيقدروا يمشوا الا بعرباية بتجر ( منتشرة كتير
بألمانيا بتكون كرسي مع عرباية بحيث الشخص بيقدر يمشي شوي لأنو الها مسكة و اذا تعب بيقعد )

و هاد لأنو جسمهم هٌلك ووصل حدو , انا ما بدي لما اكبر الناس تحكيلي ييي مبينة صغيرة بالعمر
انا كل همي انو اكبر بالعمر بصحة جيدة و جسم قادر انو يتحمل كبر العمر !

و قرأت مقولة عجبتني , الي بتعطيه لجسمك بعمر العشرين رح تحصرو لما تكبر

و هاد الي عم اشتغل عليه
​