الختم الماسي فَواصِل مِن حَياة (3 زائر)

[YAFA]

كيف الحال جميعًا عساكم بخير
لنكون صريحين سبب الموضوع هذا انه كنت
بدور شي سريع وسهل بمعايير الاداري لضيق الوقت
والأمانة ما كان سهل كثير كان مستفز من عدة
نواحي من قياس الصور ومن حجمها كمان
لو الصورة الوحدة تشد حيلها شوي توصل جيجا
مش عارف ع شو رغم انه الجودة مش خارقة لهدرجة
الصور تصوير 3 جوالات مختلفة لأنه الصور
تجميعة 3 سنين ونص تقريبًا ف يعني لا انا ما
بطلع كل يوم ولا بسرح وبمرح طول الوقت بين المدن
عدد الصور 64
صغرتها داخل الموضوع لانه كان مستحيل
اصغر حجم الصور بالفوتو بدون ما تخرب الجودة
واستخدمت المحتوى المخفي حتى ما يكون تحميل
الصفحة ثقيل بس
وبس والله ورمضان كريم
وشكرًا وعفوًا

 

[YAFA]

محتوى مخفي

خليل الرحمن مثل ما بنحكيلها، هي من اكبر المدن يلي بالضفة -واكثرها اغنياء- واحلاهم
لهجة بعد لهجة اهل القدس واكثرهم كرمًا كمان، زيارتنا لها كانت قبل سنتين بالغالب وهي بعيدة عنا كثير
ف يادوب وصلتها مرتين بحياتي
والصورتين يلي تحت من البلدة القديمة فيها في طريقنا للحرم الابراهيمي

هاي في طريقنا نزلنا بس لنشوف القدس من بعيد بعدين كملنا الطريق

من داخل الحرم الابراهيمي مقامات لابراهيم واسحاق عليهم السلام وزوجاتهم
المقام ما في داخله شي، القبر الحقيقي الاقوال انه مدفون تحت الارض بعمق
كبير والدخول له مستحيل ما في بوابات او غيره محاط بحجارة من مئات او الاف السنين
اما المقام فهو نفس مكان القبر بس على الارتفاع يلي نشوفه نحن
وفيه عليه زجاج وشبابيك حديدية ف كمان محدا بدخل لجواهم

يوم ما رحنا كان يوم سبت وكان ممنوع فيه يتم الاذان بمكبرات وسماعات
ف كان المؤذن واقف هنا واذن بصوته بدون مكبر
عدا عن انه كل زوايا المكان فيها كاميرات مراقبة من اليهود وأي تجديد
بالمكان ممنوع قطعًا وهالشي ملحوظ لان السقف فيه شقوق كثيرة
غير التشديد وكمية البوابات يلي على اطراف الحرم وتدقيقهم بالتفتيش
بكل انواعه وفي اوقات البوابات تكون مسكرة وممنوع دخوله نهائي
في زيارتي الاولى للخليل برضو جينا للحرم الابراهيمي قبل سنين كثيرة
وقتها كان في مسيحيين اجانب جوا المسجد يتمشوا براحتهم

محتوى مخفي

آخر مرة زرت القدس كان بتاريخ 1-8-2023
بهذاك الوقت كان في تصاريح تسمح للشخص يدخل المناطق المحتلة
بس مرتين في السنة وكنا مخططين الزيارة الثانية تكون بالشتاء لحتى
نشوف الثلج هناك والاجواء الحلوة بس من بداية الطوفان ولليوم
التصاريح ممنوعة ولليوم ما حدا من اهل الضفة من ذاك الوقت
قدر يروح للقدس إلا حالات نادرة وبأوقات قليلة والوضع العام
يقول انه حيستمر الحال هيك ع طول ف شكلها هاي الزيارة الاخيرة
لوقت ما يأذن ربنا
-الصورة اخذتها من ارشيف ستوري الانستا عندي وكانت الجودة سيئة
ورفعتها بالفوتوشوب

محتوى مخفي

بيرزيت من مدن الضفة الملاصقة ل رام الله
هذا اصله بيت قديم عمر اكثر من 100 سنة بتوقع ف تم تحويله لمطعم
بأكلات شعبية -واسعار مريخية- بس المكان رهيب يذكرنا ببيوت سوريا

هذا الطابق كان فخم من جوا فيه اكثر من غرفة وبأثاث قديم

محتوى مخفي

النقلة النوعية من البيت التاريخي لمكان جديد

-حب التصوير جوا محلات الديكور-

ارخص من هيك ما حتشوفوا -900 شيكل يعني 300 دولار-

هاي وردة طبيعية ع ذمة صاحبة المحل وكمان رخيصة جدًا
500 شيكل بس - 160 دولار
لو عجبتك بس مشكلتك في اللون ما عليه كل الالوان موجودة المهم رضاك وجيبتك

اطلالة من سما رام الله وقت الغروب بالواقع احلى بالصور غريب الشكل

محتوى مخفي

نابلس المشهورة ما تحتاج تعريف اكثر مدينة احب اروحها ومش بعيدة عن مدينتي كثير
ساعة بدون حواجز - 6 ساعات مع حواجز- حسب مزاج اليهود وقتها يوقفوك او يمشوك
اول ثلاث صور كانوا في قرية تابعة لنابلس نسيت اسمها

هاي داخل البلدة القديمة بنابلس المكان اسمه خان.. نسيت التكملة
كان فيه وقتها معرض كتب وصورت كلشي الا الكتب

من الحلويات المشهورة بنابلس والقدس خصوصًا اسمها راحة الحلقوم
صورتها لصاحبتي المصرية يلي تحبهم حكتلها اختاري يلي بدك واخذتهم معي لثاني دولة
وين تلاقوا صاحبة مثلي

محتوى مخفي

معلومة ما ذكرتها قبل وانا نفسي ما كنت اعرفها الا من كم سنة
انه طلع عندي اصول من يافا -جدتي ام ابي- من يافا بس تزوجت
طلعت من هناك، جدي وجدتي متوفيين من اكثر من 30 سنة لهيك
نادرًا ما نتكلم عنهم وما بعرف عنهم الكثير

-هاي برضو من ارشيف ستوري الانستا كانت بنفس يوم زيارة القدس-

 

[YAFA]

محتوى مخفي

في جامعة خضوري، بتدرس فيها بنت خالي رحت معها للاستكشاف مرة

محتوى مخفي

مسجد محمد الفاتح الاشهر بالمدينة

الصورة من بلكونة بيت اخوي

هاي الكاسة المفضلة عندي جبتها من الخليل وقتها مرينا ع مصنع خزف وزجاج
يعملوا الصحون والكاسات يلي عليها النقوش المشهورة تبع صحون اللبنة والزيت وهيك
ولا ما كانت فاضية وحطيتها مشان الصورة بس كانت بآخرها

من زاوية اخرى من شباك مطبخ البيت، وين ما اشوف كم غيمة بصورها سريع

هاي أجدد صورة بالموضوع صورتها قبل يومين وعاجبتني اكيد رهيبة

اول صورة اصورها بجوالي الحالي قبل سنة ما وقفت حتى صورتها وانا ماشية بس للذكرى

هاي الصور من اوائل الصور يلي صورتهم بالجوال يلي قبله

هاي الصورة عاجبتني لسبب ما مع انه غريبة

من الصور القديمة برضو بس بحبها،وضعي مع القمر مثل الغيوم كثير بصوره
تخيلوا هالصورة وقتها كانت الدنيا فجر قبل وقت الشروق بلحظات والاجواء رهيبة احلى من الصورة

فنانة ولا فنانة؟ فنانة

طبعًا مع كل جمل الغزل بالقهوة كاستي كان فيها كابتشينو بظرفين سكر
انا من اعداء القهوة

صورة من نفس المكان الفلتر من خيارات المعرض بالجوال مش من برنامج
كان في انعكاس اربعة خمسة عالزجاج مسحتهم الله يخلي تطورات الفوتوشوب

عشان الواحد ما يصدق اي شي يشوفه هالصورة قصتها اني بعدما
سويت الشاي لمحت الكتاب عالرف وشفته يليق لصورة ف صورتهم
ورجعته مكانه وشغلت فيلم

هاي وقت بديت العب Ghost of Tsushima واللعبة رهيبة جدًا جدًا
ك اجواء وقتالات وحوارات وقصة
لا تقارن ب assassin's creed shadows نهائي احلى منها بكثير
ولو اثنينهم باليابان - يلي يحب يجربها يخلي لغة الحوارات ياباني افخم من الانجليزي

وهاي وقت بديت ب red dead redemption 2 من افخم الالعاب برضو
ولسا ما كملتها كانت الدنيا صيف وقلت اللعبة بدها اجواء شتوية ولليوم موقفة فيها

محتوى مخفي

عزبة جلعود قرية تابعة لقلقيلية فيها عدد قليل جدا من البيوت والسكان
اما اغلبها فهي اراضي زراعية واغلب الاراضي مزروعة زيتون
اهل المدن بشتروا بالقرى لان اسعار الاراضي هناك ارخص بكثير
هاي الارض لـ عم امي وقتها كان موسم قطف الزيتون
رحنا -ع اساس- نساعد بالقطف ويعني قطفت عشرة عشرين حبة
واخذت استراحة لباقي اليوم، كانت اجواء رهيبة ع كثر ما صورت الارض
بس ما صورت الزيتون وقت القطف وهو عالأرض كنت عايشة اللحظة

هاي الارض يلي ع حدود ارض العم، نسيت شجر شو صراحة

مدخل الارض،فيه شجر غير الزيتون شي للزينة وشي للاكل، الارض فخمة جدًا ما شاء الله
الله يباركلهم فيها وفيها بيت صغير وغرف وصالون ومطبخ وجلسة حلوة

الصورة الختامية هناك قبل ما نروح وختامية الموضوع كمان
ومن المفضلات عندي

استغفر الله وأتوب إليه-الحمدلله-لا إله إلا الله-الله اكبر